Гурыт гъэсэныгъэ еджапIэу №3-м шъолъыр шIэныгъэ-практическэ конференциеу «Адыгэ чъыгхатэхэр лъэпкъ культурэм щыщ шIагъох» зыфиIорэр щыкIуагъ.

Пленарнэ зэхэсыгъом ыкIи Адыгэ чъыгхатэм игъэтIысхьан хэлэжьагъэх адыгэ чъыгхатэхэмкIэ экспертэу, проектэу «Адыгэ Республикэм игурыт еджапIэмэ ащырагъаджэрэ кIэлэеджакIохэм яушэтэкIо ыкIи практическэ амалхэр едзыгъо пчъагъэмэ ателъытагъэу гъэпсыгъэнхэр» зыфиIорэм хэтэу, МКъТУ-м и Политехническэ колледж икIэлэегъаджэу Кудаикъо Нурет ыкIи студентхэу Жакъэ Диан, Бэрэчэт Амир, Цэй Самира, Александр Погосовыр.

Кудаикъо Нурет къызэгущыIэм къыхигъэщыгъ, адыгэ чъыгхэу пхъэшъхьэ-мышъхьэхэр къызпыкIэхэрэр уплъэкIугъэнхэмкIэ, язытет зэгъэшIэгъэнымкIэ апэ дэдэ зишIогъэшхо къэкIогъагъэр шIэныгъэлэжь-селекционерэу Тхьагъушъэ Нухь ары. Ащ къыгъэлъэгъогъэ чъыгхэм адыгэ лъэпкъыр адэлэжьагъэу зэрэщытыр къыгъэунэфыгъагъ. Политехническэ колледжым истудентхэр усэхэу Адыгэ чъыгхатэмэ афэгъэхьыгъэмэ адыгабзэкIи урысыбзэкIи къяджагъэх.

Ащ фэшъхьафэу, гурыт гъэсэныгъэ еджапIэу №3-м ипащэу Пакъэ Муратэ тхылъэу «МыIэрысэхэмрэ къужъхэмрэ яижъырэ адыгэ чъыг лъэпкъхэм якъыхэгъэщын» зыфиIорэр ратыгъ, ащ МКъТУ-м и Политехническэ колледж ипащэу ХъутIыжъ Заурбэч ыIапэ кIэдзэжьыгъ.