БлэкIыгъэ тхьэмафэм къалэу Шъачэ бизнес-форумэу Slёt 2024-рэ зыфиIорэр щыкIуагъ, ащ изэхэщакIор ныбжьыкIэ предпринимательствэмкIэ Комитетэу «Урысыем икIэгъэкъонхэр» зыфиIорэр ары.

Мыекъопэ къэралыгъо технологическэ университетыр форумым къыщызгъэлъэгъуагъэхэр технологическэ предпринимательствэмкIэ «МКъТУ-м иинновектор» и Акселератор трекхэр ары — мэкъу-мэщ продукцием икъыдэгъэкIын технологиехэм якафедрэ ипащэу Мамсыр Нурбый, гъомлапхъэхэм ыкIи шхыныгъохэм ягъэхьазырын технологиехэм якафедрэ ипащэу Хъоткъо Зурет ыкIи кафедрэм иаспиранткэу Кудайнэт Саид.

Iофтхьабзэм къыщыхагъэщыгъэ темэ шъхьаIэхэр — предприниматель ныбжьыкIэмэ ясообществэ хэхъоныгъэхэр егъэшIыгъэнхэр, ныбжьыкIэ предпринимательствэм хэхъоныгъэхэр егъэшIыгъэнхэр, ащ фэгъэхьыгъэ гъэсэныгъэр ыкIи гъэсакIо Iофхэр. Бизнесым къыгъэуцугъэ упчIэ шъхьаIэхэм язэхэфын тегущыIэнхэу форумым нэбгрэ 200-м ехъу къекIолIагъ, ахэр Урысыем ишъолъыр 33-мэ къарыкIыгъэх.

«НыбжьыкIэ предпринимательствэм университетым хэхъоныгъэхэр щегъэшIыгъэнхэр» зыфиIорэ площадкэм къыдыхэлъытагъэу шIэныгъэмрэ гъэсэныгъэмрэкIэ Урысыем и Министерствэ, «Урысыем икIэгъэкъонхэр» ыкIи шъолъыр 12-мэ я Проектнэ офисмэ ялIыкIохэр зэIукIагъэх.

НыбжьыкIэ предпринимательствэм хэхъоныгъэ егъэшIыгъэным фэгъэхьыгъэ Шапхъэм сессием щытегущыIагъэх, предпринимательствэм икультурэ университетым зэрэщагъэпсыщтым, гъогу картэхэр зэрагъэцэкIэщтхэм ягугъу ашIыгъ, ахэр Урысыем ишъолъырхэмрэ «Урысыем икIэгъэкъонхэр» зыфиIорэмрэ зэрэзэдагъэлэжьэщтхэм афэгъэхьыгъагъэх.

Iофтхьабзэм иплощадкэ джэгукIэ зэфэшъхьафхэр щызэхащагъэх, бизнес-джэгукIэхэр, «Полиэкономикэр», «Партнерскэ интеллектыр»; мастер-классэу «Эффективная коммуникация университет — бизнес-сообщество» зыфиIорэр, пилотнэ шъолъырхэм агъэцакIэрэ практикэхэмкIэ лъэтегъэуцохэр ашIыгъэх.

Предпринимательскэ сообществэмрэ университетхэмрэ ныбджэгъуныгъэ зэфыщытыкIэхэр агъэпсынхэмкIэ, ныбжьыкIэ предпринимательствэм иэкосистемэ хэхъоныгъэхэр егъэшIыгъэнхэмкIэ форумыр амалышIоу щытыгъ.