Мыекъопэ къэралыгъо технологическэ университетым Федеральнэ программэу «Къулыкъу ахьызэ рагъаджэх» зыфиIорэр игъэкIотыгъэу щагъэцакIэ. Федэ къэзытрэ общественнэ IофшIэнымрэ академическэ дисциплинэхэмрэ зэгъусэхэу студентмэ зэдагъакIо.

Адыгэ республикэ еджэпIэ-интернатэу макIэу зэхэзыхыхэрэмрэ зылъэгъухэрэмрэ зыщырагъаджэхэрэр ягъусэгъоу проектэу «Сэнэхьатым екIурэ лъэубэкъу» зыфиIорэр зэдагъэцакIэ. Ащ ишIуагъэкIэ интернатым щеджэхэрэмэ сэнэхьатэу къыхахыщтыр пэшIорыгъэшъэу къагъэнэфэн алъэкIы. Еджэгъу илъэсым икъежьапIэ кIэлэеджакIо пэпчъ ежь ыгукIэ нахь шIогъэшIэгъон кружокхэр къыхехы, сэнэхьатэу зыфытегъэпсыхьэгъэщтми нахь хэщагъэ мэхъу. ЯтIонэрэ илъэсым нэмыкI лъэныкъо къыхахын алъэкIы, фэшъхьаф сэнэхьатым зыфагъасэ.

Къыздэрмышъэ Сулиет япащэу сэнэхьатэу «МэшIогъэкIосэ щынэгъончъэныр» зыфиIорэмкIэ егъэджэнхэр тхьэмафэ къэс студентмэ зэхащэ, макIэу зылъэгъухэрэм ыкIи зэхэзыхыхэрэм сэнэхьатыр Iэрыфэгъу къафэхъунымкIэ адэIэпыIэх. Экологием ыкIи тыкъэзыуцухьэрэ дунаим икафедрэ шIэныгъэ-ушэтын IофшIэнхэр щагъэцакIэх ахэмэ яшIуагъэкIэ зипсауныгъэ зэщыкъуагъэ цIыфхэр машIом зэращаухъумэщт шIыкIэхэр агъэнафэх. Пшъэрылъэу агъэуцугъэм къыдыхэлъытагъэу ыкIи проектнэ практикумым къызэритрэм тетэу, студентхэр къэбар-мэкъэгъэIу Iофтхьабзэхэм, мэшIогъэкIосэным ищынэгъончъагъэхэм, гумэкIыгъо зиIэ сабыйхэр егъэджэгъэнхэм адэлажьэх.

Лъэныкъоу «Технология швейных изделий» зыфиIорэм феджэрэ студентхэу КIэдэкIое Нафсэт зипащэхэр кIэлэцIыкIухэм IэкIэ ашIышъущтхэр арагъэшIых, обществэм хэзэгъэнхэм, щыIэныгъэм къыхэмызынхэм афэшI ащэшъунхэу зэфэшъхьаф сувенирхэр, шIухьафтын пкъыгъо цIыкIухэр къафаугупшысых.

Икъоу зэхэзымыхрэ сабыйхэмкIэ нахь Iэрыфэгъоу къафыхахыгъэмэ ащыщ адыгэмэ ядышъэидэ искусствэу «Адыгэ идэкIэ» зэджагъэхэр. Студентхэмрэ кIэлэеджакIохэмрэ зэгъусэхэу зыдэлэжьагъэхэ проектхэр мызэу, мытIоу ныбжьыкIэ дизайнерхэм язэнэкъокъоу «Модный дебют» зыфиIорэм 2019-рэ ыкIи 2021-рэ илъэсхэм текIоныгъэхэр къыщыдахыгъ.

КIэлэегъаджэхэу Уджыхъу Маретрэ Сазонец Надеждэрэ зипащэ студентхэу лъэныкъоу «Ландшафтнэ архитектурэм» феджэхэрэм шIуагъэ къытэу къулыкъу ахьыгъ. Къэгъагъэ блэр зэфэшъхьафхэр зэхэгъэуцогъэнхэр, флористическэ композицие гъэшIэгъонхэр къэугупшысыгъэнхэр, къэкIырэ къэгъэгъэ лъэпкъ зэфэшъхьафхэм дэлэжьэгъэнхэр, нэмыкIхэри яIоф къыхиубытэщтыгъ, а зэкIэри кIэлэеджакIохэр ягъусэхэу агъэцэкIагъэх.

Лъэныкъоу «Ландшафтнэ архитектурэр» къэзыухыгъэмэ ащыщым еджэпIэ-интернатым ищагоу гъэсэныгъэ учреждением иадминистрацие ратыжьыгъэм изэтегъэпсыхьанкIэ проектыр зэхигъэуцуагъ. ЕджапIэм къыщыкIыщтыгъэхэм, зыдэлажьэщтыгъэхэм яягъэ римыгъэкIэу, ежь къэгъагъыкIэхэр, шIыкIэ шъхьафхэр къыгъотыхэзэ щагур ыгъэкIэрэкIэн ылъэкIыгъ.

МКъТУ-м иIофышIэхэмрэ истудентхэмрэ зэпамыгъаоу мыщ щырагъэкIокIырэ гъэцэкIэнхэм IофыгъошIухэр къакIэлъэкIох, еджэпIэ-интернатыр сэкъатныгъэ зиIэ цIыфхэр зыхэлажьэхэрэ зэнэкъокъоу «Абилимпикс» зыфиIорэм текIоныгъэхэр къыщыдахых.

Общественэ проектхэмрэ пшъэрылъхэмрэ ягъэцэкIэн дэлажьэхэзэ, программэу «Къулыкъу ахьызэ рагъаджэх» зыфиIорэ программэр студентмэ аушэтын алъэкIы.