Непэ Мыекъопэ къэралыгъо технологическэ университетым шIэныгъэ-практическэ конференциеу «ЛIэшIэгъухэм къахэкIыгъэ хабзэр — Адыгэ ИлъэсыкIэр» зыфиIорэр щыкIуагъ.

Iофтхьабзэм ипэублэм къэгущыIагъ мэкъу-мэщ технологиехэм яфакультет идеканэу Шъхьапэцэ Аслъан. ИлъэсыкIэм имэфэкI Iофтхьабзэ хэлажьэрэмэ зэкIэмэ ар афэгушIуагъ ыкIи конференцием къыдыхэлъытагъэ IофшIэн программэр дэгъоу агъэцэкIэнэу къяджагъ.

Конференциер гъэ къэс рагъэкIокIыныр хабзэ хъугъэ, мы мафэм проектэу «Адыгэмэ ямэкъу-мэщ чылэпхъэ хэшыпыкIыгъэхэр къэIэтыжьыгъэнхэр» зыфиIорэр атIупщыгъ. Мы проектыр социальнэ проектхэм я Урысые зэнэкъокъоу «Инносоциум» зыфиIорэм илъэныкъоу «ЧIыдэлъф лъэпкъмэ яшэн-хабзэхэр ыкIи культурэхэм якъэухъумэн» зыфиIорэм хэлажьэ.

Адыгэ Республикэм и Лъэпкъ музей илIыкIохэр, МКъТУ-м истуденческэ сообществэ хэтхэр ыкIи Политехническэ колледжым истудентхэр конференцием иIофшIэн хэлэжьагъэх. Джащ фэдэу, онлайн-шапхъэм тетэу Iофтхьабзэм къыхэхьагъэх Абхъаз къэралыгъо университетым агрономиемкIэ икафедрэ ипащэу Кама Чукбар ыкIи Къэбэртэе-Бэлъкъар университетым агрономиемкIэ икафедрэ ипащэу КIыщ Алим.

МКъТУ-м иIофышIэхэмрэ Урысые обществэу «ШIэныгъэм» ишъолъыр къутамэ илекторхэмрэ лекциехэм къяджагъэх.

— Мэкъу-мэщ продукцием икъыдэгъэкIын технологием икафедрэ ипащэу Мамсыр Нурбый докладэу «Адыгэмэ ямэкъу-мэщ чылэпхъэ хэшыпыкIыгъэхэр къэIэтыжьыгъэнхэр» зыфиIорэр къышIыгъ;

— Мэкъу-мэщ продукцием икъыдэгъэкIын технологием икафедрэ идоцентэу Мария Галичевам докладэу «Методы народной селекции сельскохозяйственных культур адыгов» зыфиIорэм конференцием хэлажьэхэрэр нэIуасэ фишIыгъэх;

— Тарихъ шIэныгъэхэмкIэ кандидатэу, МКъТУ-м тарихъымрэ фитныгъэмрэ якафедрэ идоцентэу ЦунтIыжъ Римэ докладэу «Адыгэ ИлъэсыкIэр: блэкIыгъэм итарихъ-культурнэ кIэн» зыфиIорэм ригъэдэIугъэх;

—Гъэсэныгъэ IофшIэнымкIэ деканым игуадзэу, техническэ шIэныгъэхэмкIэ кандидатэу Тхьайшъао Аминэт докладэу «Пищевая ценность аутентичных сортов сельскохозяйственных культур адыгов» зыфиIорэр къышIыгъ.