Культурэм и Унэу Мыекъуапэ дэтым инклюзивнэ шIушIэ творческэ пчыхьэзэхахьэ щыкIуагъ, ащ зипсауныгъэ зэщыкъуагъэ сабыйхэр, къалэм ыкIи республикэм икъэшъокIо ыкIи иорэдыIо купхэр хэлэжьагъэх.

Пчыхьэзэхахьэм джащ фэдэу хэлэжьагъэх Мыекъопэ къэралыгъо технологическэ университетым истудентхэр, социальнэ проектэу «Уахътэм пхырыкIрэ хабзэхэр» зыфиIорэ социальнэ проектэу ахэм агъэцакIэрэр ащ къыщагъэлъэгъуагъ, проектыр программэу «Къулыкъу ахьзэ рагъаджэх» зыфиIорэм щыщ.

Проектым ипшъэрылъыр — сэкъатныгъэ зиIэ цIыфхэр художественнэ творчествэм хэгъэлэжьэгъэнхэр, адыгэ дышъэидэм фэгъэсэгъэнхэр. Ащ фэдэ IофыгъошIумэ апылъ цIыфхэм ягумэкIыгъохэр уахътэ гъэнэфагъэм ашъхьарахыщт, сэнэхьат тедзи арагъэгъотыщт.

Iофтхьабзэм щыгъын коллекциеу «Псыхъо фыжь», «ЩыIэныгъэм ичъыг», «Псэр ыгъэфабэу» зыфиIохэрэр къыщагъэлъэгъуагъэх, ахэр лъэныкъоу «Технология изделий легкой промышленности» зыфиIорэм щеджэрэ студентхэу Анна Горковенкэмрэ Лъэустэнджэл Дариетрэ зыгъэхьазырыгъэхэр, яхудожественнэ пащэр искусствоведениемкIэ кандидатэу, кIэлэегъэджэ шъхьаIэу КIэдэкIое Нафсэт ары.

Модэм истуденческэ театрэу «KStar» зыфиIорэм хэлажьэрэмэ кIэлэцIыкIухэр ягъусэхэу щыгъын коллекцием къэзэрэугъоигъэхэр нэIуасэ фашIыгъэх.

Аль Ахмар Нинель — джэнэ шъхьаIэр (коллекциеу «ЩыIэныгъэм ичъыг»);

Вероника Власовар — ежьашъо комплектыр (коллекциеу «ЩыIэныгъэм ичъыг»);

Дарья Грабийчук — гъончэджхэр (коллекциеу «Псэр ыгъэфабэу»);

Пчэнлъэшъу Тамила — сарафанрэ щыгъын тедзэрэ;

Малика Ахуновар (еджапI) — джэнэ фыжь (коллекциу «Псэр ыгъэфабэу»);

Анна Горковенкэр — автор;

Лъэустэнджэл Дариет — ассистент.

КъыкIэлъыкIорэ къэгъэлъэгъонхэр Къэралыгъо филармонием хэт «Майкоп Fashion» зыфиIорэм гъэтхапэм и 23-р къыщагъэлъэгъощт, модэм идунае зышIогъэшIэгъонхэр зэкIэ ащ къырагъэблагъэх.