Урысые студенческэ проектэу «УикIогъу» зыфиIорэм илъэтегъэуцо Мыекъопэ къэралыгъо технологическэ университетым щыкIуагъ, ар УФ-м гъэсэныгъэмрэ шIэныгъэмрэкIэ и Министерствэ иIэпыIэгъоу ныбжьыкIэ IофхэмкIэ Федеральнэ агентствэу «Росмолодёжь» зыфиIорэм егъэцакIэ.

МКъТУ-м истудент 300-м ехъу яплIэнэрэ сезоным кIэу къыхэхьагъэхэм зыщагъэгъозагъ: шъолъыр турэу сезоныкIэм ежьагъэм интерактивнэ шэпхъакIэу къыхэхьагъэхэр ыкIи апшъэрэ еджапIэ пэпчъ фытегъэпсыхьэгъэ программэхэр зэрагъэшIагъэх, ахэмэ ащыщых Урысыем къыхагъэхьажьыгъэ шъолъырыкIэхэм яапшъэрэ еджапIэхэри.

— Мощ фэдиз сэнаущыгъэ зыхэлъ сабыибэ плъэгъуныр, ахэр зэфэшъхьаф лъэныкъохэмкIэ яамал къызэрагъэлъагъорэм ущыгъозэныр гукъыдэчъ шъыпкъэу щыт. Проектэу «УикIогъу» зыфиIорэм ишIуагъэкIэ студентмэ яIэпэIэсэныгъэ къагъэлъэгъонэу, яопыткIэ, яIофшIагъэхэмкIэ зэхъожьынхэу амалышIухэр яIэхэ мэхъу. Сицыхьэ телъ, мыщ фэдэ Iофтхьабзэмэ ахэлажьэрэмэ ятворческэ гупшысэ закъоп зыхагъахъорэр, ахэмэ IофыгъуакIэхэр къафызэIухыгъэ мэхъу. Iофтхьабзэм хэлэжьагъэмэ зэкIэмэ сафэгушIо, ятворческэ екIолIакIэхэр, ягуетныгъэ джыри илъэс бэ дэдэрэ къыздырэхьакIынэу сафэлъаIо! — игущыIэхэм къащыхигъэщыгъ ныбжьыкIэ политикэмкIэ МКъТУ-м ипроректорэу БрантIэ Муратэ.

Проектым ифедеральнэ командэ зэрэIукIагъэхэм ыкIи лъэтегъэуцом афэшъхьафэу студентмэ къяжэщтыгъэх тематическэ мастер-классхэр. А Iофтхьабзэхэм нэIуасэ щафэхъугъэх зэнэкъокъу трекхэу «СэшIы» ыкIи «Апэрэу сыпхырэкIы» зыфиIохэрэм. Апэрэ мастер-классым ныбжьыкIэмэ илъэси 5-кIэ зызэралъэгъурэр, проектэу яIофшIэнкIэ нахь опыт къэзытыщтхэр, Iофыгъуи 10-у нахь амалхэр ежьхэм апае къэзытыхэрэр къыхагъэщыгъэх. ЗещакIомэ къаIотагъ мы проектым ухэлажьэмэ шIуагъэу къытхэрэр зыфэдэхэр, джащ фэдэу нэмыкI ныбжьыкIэ программэхэм ахэщагъэхэ хъухэмэ япшъэрылъхэр къадэхъунхэм нахь псынкIэу къызэрэфэкIощтхэр.

ЯтIонэрэ мастер-классым ныбжьыкIэхэм нэIуасэ зыщыфашIыгъ зэнэкъокъу трекхэу «СэшIы» ыкIи «Апэрэу сыпхырэкIы» зыфиIохэрэм. ГукъэкIхэр къагъотынхэм ыкIи ахэр заявкэ хьазыр ашIынхэм зыфагъэсагъ. IофыгъуакIэу зыщыгъозагъэхэм яшIуагъэкIэ, ныбжьыкIэмэ проектым зыкъыщызэIуахыщт къодыеп, IофшIэнымкIи еджэнымкIи ягукъэкIхэр зэкIэ агъэцэкIэжьышъущтых.

— Шъолъыр зэнэкъокъоу «УикIогъу» зыфиIорэр студентхэмкIэ амалышIу къэзытырэ Iофтхьабз, сыда пIомэ ащ ихьатыркIэ хэгъэгум истуденческэ сообществэ нэIуасэ фэхъунхэ алъэкIы. Проектым хэлажьэрэ ныбжьыкIэмэ яамалхэм ахагъахъо, нэIосабэ яIэ мэхъу. Сэ лъэшэу сигуапэ хъугъэ сигупшысэгъухэм якуп сызэрэхэфагъэр, ащ ишIогъэшхо къысэкIы! — ишIошIхэмкIэ къыддэгощагъ МКъТУ-м и Политехническэ колледж ия 2-рэ курс щеджэрэ НапцIэкъо Бэлэ.