Мы мафэхэм республикэм икъэлэ шъхьаIэ профессиональнэ IэпэIэсэныгъэу «Профессионалхэр» зыфиIорэм и Чемпионат ишъолъыр едзыгъо щызэфашIыжьыгъ.

Iофтхьабзэм хэлэжьагъэх чемпионатым иэкспертхэр, зэнэкъокъугъэхэр, гуфакIохэр, къэралыгъо ведомствэхэм ялIыкIохэр.

Чемпионатым ипрограммэ къызэрэдилъытэрэм елъытыгъэу Мыекъопэ къэралыгъо технологическэ университетым ыкIи МКъТУ-м и Политехническэ колледжым ястудентхэмрэ якIэлэегъаджэхэмрэ лъэныкъо 18-мэ ахэлэжьагъэх: ЗекIоныр, Тыкъэзыуцухьэрэ дунаим икъэухъумэн – ныбжьыкIэхэр, Бухгалтерскэ учетыр, Бизнесым ипрограммнэ зэшIокIхэр, Финансхэр, Предпринимательствэр, Рестораннэ сервисыр, Мобильнэ приложениехэм язэхэгъэуцон, Автомобиль псынкIэхэм ягъэцэкIэжьын – ныбжьыкIэхэр, Автомобиль псынкIэхэм ягъэцэкIэжьын – шъхьаIэр, Пщэрыхьан Iофыр, Сетевой ыкIи системнэ администрированиер, ПсэолъэшIыныр ыкIи штукатурнэ Iофхэр, Осетинскэ хьакухьалыжъомэ ягъэжъэн – ныбжьыкIэхэр, Осетинскэ хьакухьалыжъомэ ягъэжъэн – шъхьаIэр, Чырбыщ гъэтIылъыныр, Медицинскэ ыкIи социальнэ лъэныкъомкIэ улъыплъэныр, Банковскэ Iофыр.

Торжественнэ Iофтхьабзэм лъэныкъо зэфэшъхьафхэмкIэ студентмэ апэрэ чIыпIищыр къащыдахыгъ:

— 1 чIыпIэр — зэнэкъокъугъэ нэбгри 3;

— 2 чIыпIэр — зэнэкъокъугъэ нэбгри 8;

— 3 чIыпIэр —зэнэкъокъугъэ нэбгри 8. 

Профессиональнэ IэпэIэсэныгъэу «Профессионалхэр» зыфиIорэ лъэпкъ Чемпионатыр Iофтхьабзэ гъэшIэгъон хъугъэ, хэлэжьагъэмэ шIукIэ агу къинэжьынэу гъэпсыгъагъэ. Сэнэхьат зэфэшъхьафхэм арылэжьэщт ныбжьыкIэхэмкIэ ар амалышIоу щытыгъ, яакъыл щыхагъэхъуагъ, яIэпэIэсэныгъэ зыкъыщиIэтыгъ, нэмыкI отраслэмэ ащылажьэрэмэ зэпхыныгъэхэр адашIыгъэх. Тэгугъэ мыщ фэдэ Iофтхьабзэхэр тапэкIи зэхащэхэзэ ашIынхэу, ныбжьыкIэхэм хэхъоныгъэхэр ыкIи гъэхъагъэхэр ашIынхэм фэIорышIэнэу.

Зэнэкъокъу движением къыхэлэжьагъэмэ, ащ зиIахь хэзылъхьагъэмэ зэкIэмэ тафэраз, гъэхъэгъакIэхэр ашIынхэу тафэлъаIо!