НыбжьыкIэмэ ядунэе фестиваль щыкIогъэ Дунэе технологическэ хабым Мыекъопэ къэралыгъо технологическэ университетым истуденткэу Елена Тарарыкинам проектэу «Разведение энтомафагов для высокопродуктивного органического земледелия» зыфиIорэр къыщигъэлъэгъуагъ.

Елена Тарарыкинар а 1-рэ курсым магистранткэу щеджэ, «Агрономия» зыфиIорэ лъэныкъом фэгъэзагъ, технологическэ предпринимательствэмкIэ Акселерационнэ программитIумэ ыкIи органическэ мэкъу-мэщ хъызмэтымкIэ проектищ иIэу хэлэжьагъ, «Стартапыр дипломым фэдэу» зыфиIорэ форматымкIэ ВКР-р къыухъумагъ.

Авторскэ проектэу «Разведение энтомафагов для высокопродуктивного органического земледелия» зыфиIорэр акселерационнэ программэу «Инновектор МГТУ-2022-м» къыдыхэлъытагъэу ыгъэцэкIагъ, ипэщагъэр мэкъу-мэщ продукцием икъыдэгъэкIын технологиеу пылъым икафедрэ идоцентэу, биологие шIэныгъэхэмкIэ кандидатэу Шъао Жанн ары.

Проектыр зыфэгъэхьыгъэр технологие «уцышъохэр» мэкъу-мэщ хъызмэтым нахьыбэ щышIыгъэнхэр, мэкъу-мэщым ихъызмэтшIапIэхэм къагъэкIыхэрэмэ биологическэ объектхэр нахьыбэу агъэпсэолъэнхэр, пестицидхэу зэрар къэзыхьыхэрэр щыгъэзыегъэнхэр, тыкъэзыуцухьэрэ дунаир къэбзэным лъыплъэгъэныр арых.

Джырэ уахътэм проектым икомандэ ушэтынхэр ешIых, материалхэр еугъоих, зэрегъэзафэх. ТапэкIэ энтомафагмэ якъэгъэкIын фэгъэхьыгъэ экспериментыр лъагъэкIотэщт.

— Мы Iофтхьабзэм сызэрэхэлэжьагъэр сэркIэ IофыгъошIоу щыт, сипроект къэзгъэлъэгъогъэ къодыеп, шIэныгъэхэмкIэ, акселерационнэ программэхэу МКъТУ-м сызхэлэжьагъэхэмкIэ, опытэу сиIэ хъугъэмкIэ садэгощагъ. Сицыхьэ пытэ телъ, проектым ишIуагъэкIэ тимэкъу-мэщ хъызмэтшIапIэмэ экологием икъэухъумэн нахь зыфагъэзэн алъэкIыщт. Сэгугъэ сиопыт ныбжьыкIабэмэ къашъхьэпэнэу, ар зэрэлъагъэкIотэщтым ыкIи зэрэхагъэхъощтым дэлэжьэнхэу, мэкъу-мэщ хъызмэтым зэхъокIныгъэхэр фашIынхэу! — къыхигъэщыгъ Елена Тарарыкинам.