Къэгъэлъэгъонэу YugBuild зыфиIорэм хабзэ зэрэхъугъэу Дунэе фестивалэу «Архитектурэм имафэр» щыкIуагъ — ар Iофтхьэбзэшхоу щыт, архитекторхэм япрофессиональнэ сообществэ зэхещэ.

Фестивалым къыдыхэлъытагъэу зэфэхьысыжьхэр ашIыгъэх ыкIи архитектурнэ произведениехэм афэгъэхьыгъэ ЗэIухыгъэ къэгъэлъэгъон-зэнэкъокъоу 2022-2024-рэ илъэсхэм рагъэкIокIыгъэм иаужырэ илъэс текIоныгъэ къыщыдэзыхыгъэхэр къыхагъэщыгъэх. Мыекъопэ къэралыгъо технологическэ университетым фильмищ къыгъэлъэгъуагъ: «Архитекторхэм ягъэсэныгъэ процесс игумэкIыгъохэр», «МашIом ищынэгъончъагъэ лъыплъэгъэныр», «Ольгинка: Суворинымрэ Масловымрэ ядачэхэр». Джащ фэдэу стартап шIыкIэм тетэу дипломнэ IофшIэнэу «Унищэу зэхэт фэтэрыр фотостудиеу шIыжьыгъэныр» зыфиIорэр, дипломнэ IофшIэнэу «Унэ гупэм иархитектурнэ зытет гъэтэрэзыжьыгъэныр» зыфиIохэрэр къыщагъэлъэгъуагъэх.

Профессиональнэ номинациеу телевизионнэ каналхэр ыкIи студиехэр зыхэлажьэхэрэм Пшызэ иархитектурнэ кIэным щыщ объектхэм афэгъэхьыгъэ фильмэхэр къыщагъэлъэгъуагъэх. Ахэмэ Пшызэ иархитектурэ зытет лъэхъанэ зэфэшъхьафхэм зыфэдагъэр къащытыгъ, Краснодар краим инепэрэ къалэ ыкIи къуаджэ псэупIэхэр, архитекторхэр, творческэ купхэр, гъэхъагъэхэр къагъэлъэгъуагъэх.

Экспертнэ осэшIмэ зэфэхьысыжьхэр IофшIагъэмэ зафашIыхэм, фестивалым и Гран-при ыкIи Дышъэ дипломыр къыфагъэшъошагъэх псэолъэшI ыкIи общепрофессиональнэ дисциплинэхэмкIэ кафедрэм идоцентэу Оксана Борсукым, фильмэу «Ольгинка: Суворинымрэ Масловымрэ ядачэхэр» зыфиIорэм пай. Фильмэм исюжеткIэ зэлъашIэрэ питерскэ шIэныгъэлэжьэу, тарихълэжьэу, тхакIоу Сергей Старкэм игъусэу авторым революцием ыпэкIэ агъэуцугъэгъэ дачэхэр къакIухьэх, яархитектурнэ зытет защагъэгъуазэ.

Студенческэ номинациемкIэ Мыекъопэ къэралыгъо технологическэ университетым чIыпIитIу къыхьыгъ, тыжьынрэ джэрзырэ. Фильмэу къэзыхьыгъэхэр:

— «Архитекторхэм ягъэсэныгъэ процесс игумэкIыгъохэр» — авторыр Фарида Мстоевар ары. Адыгэ Республикэм иархитектурэ лъэныкъо щылэжьэрэ специалистхэм зэдэгущыIэгъухэр адишIыгъэх.

— «МашIом ищынэгъончъагъэ лъыплъэгъэныр» — авторхэр Рама Стасрэ Артем Фоминрэ. Фэтэрыбэ зэхэт унэхэр машIом щыухъумэгъэнхэм фильмыр афэгъэхьыгъ. Ар гъэшIэгъонэу къэзышIырэр бзищкIэ зэрэзэдзэкIыгъэр ары (урысыбзэр, инджылызыбзэр, арапыбзэр).

Лъэшэу тигуапэу архитектурнэ зэнэкъокъум текIоныгъэ къыщыдэзыхыгъэмэ тафэгушIо! ТекIоныгъэм джыри гукъэкIхэр ыкIи проектыкIэхэр къакIэлъыкIонхэу, Iофэу жъугъэцакIэрэм гухагъо хэжъугъотэнэу тышъуфэлъаIо!

Джыри творческэ гъэхъэгъакIэхэр къыжъудэхъунхэу шъуфэтэIо!