«Мобильнэ приложениехэм язэхэгъэуцон» зыфиIорэ лъэныкъомкIэ апэрэ зэнэкъокъу мафэр тыгъуасэ рагъэжьагъ, ар профессионалхэм я Чемпионат ишъолъыр едзыгъо къыдыхэлъытагъ.

Смартфоным имобильнэ приложениеу мыщ фэдэ шапхъэхэр зыпылъхэр зэхэгъэуцогъэныр гъэцэкIэным къыделъытэ: ОС-м иверсие анахь макIэу приложением къыубытырэр мыщ фэдэнэу щыт: Android - 11.0, iOS - 14.0.

Эксперт шъхьаIэу Сапые Азамат лъыплъагъ зэнэкъокъум хэлажьэрэмэ Модулэу А къызэрашIырэм — Приложением иархитектурэ, ащ классэу зэхагъэуцуагъэхэм кодыр ахэшIыхьэгъэн фае. Ащ ыуж мыщ фэдэ къэIотэнхэр ищыкIагъэх: классыр зыфытегъэпсыхьагъэр, зэхэзгъэуцуагъэм иавтор, программнэ кодым иэлементхэр зэрищыкIагъэхэр. Проектым иприложение зэхагъэуцо хъумэ, архитектурэр агъэпсэолъэнэу щыт, ащ бизнес-логикэр, доменхэр щызэтырафых.

«Предпринимательствэм» иплощадкэ зыщызыушэтырэмэ мэфищым къыкIоцI бизнес-планэу къагъэхьазырыгъэм имодуль къаухъумэнэу щытыгъ.

Лъэныкъоу «Предпринимательствэр» — ар команднэ зэнэкъокъу. НыбжьыкIэмэ япроектхэм хэхъоныгъэхэр яIэх ыпэкIэ ашIыгъэгъэ бизнес-планым елъытыгъэу, компаниер агъэIорышIэзэ, модуль пэпчъ IофшIагъэхэр къагъэлъагъохэзэ, ахэмкIэ экспертнэ уасэхэр къараты.

«Командэм ибизнес-план», «Тикомандэ ыкIи бизнес-гукъэкIыр», «ХэушъхьафыкIыгъэ купыр» зыфиIорэ модульхэмкIэ зэнэкъокъум хэлажьэрэмэ япроектхэр къаухъумэщтыгъэх. ОсэшIхэм рекламнэ роликхэм яшIыкIэ гъэшIэгъонхэр, бизнес-планым идэгъугъэ, проектым зэнэкъокъуныгъэу хэлъыр, нэмыкI лъэныкъуабэхэр къыдалъытэх, ахэмкIэ уасэ афашIы.

«Бизнесым фэгъэхьыгъэ программнэ унашъохэр» зыфиIорэмкIэ апэрэ мэфэ дэдэм зэнэкъокъум хэлажьэхэрэмрэ экспертхэмрэ апае инструктаж зэхащэгъагъ. Зэнэкъокъухэрэм Адыгеим медицинэ информационнэ системэ зэхащэнэу щытыгъ. Ащ пае платформэ зэфэшъхьафхэм приложениехэр ащызэхагъэуцох: desktop приложениер, web приложениер ыкIи мобильнэр, информационнэ системэм интерфейс ыкIи къэбархэр зыщызэхэугъоягъэхэ базэр тапэкIэ зэхагъэуцонэу щыт. ОсэшIмэ IэпэIэсэныгъэр, Iофэу агъэцэкIагъэр, системэхэм зарэрылажьэхэрэр къыхагъэщых. ИС-р зыфэдэр, ащкIэ лэжьэнхэм пае иметодикэ ашIэн фае, ар анализ ашIышъунэу, проектированием иприемхэм, ащ ыбзэ ащыгъозэнхэу щыт. Программнэ IофшIэнхэр зыгъэцэкIэшъухэрэр компание инхэм, гурытхэм ыкIи цIыкIухэм аштэнхэ алъэкIыщт.

Индустриальнэ экспертэу мы лъэныкъом иIэр — ООО «ЭДИАЙТ» зыфиIорэм ипащэу Валерий Немыкиныр ары, зэнэкъокъум игъэцэкIэнхэм защигъэгъозагъ ыкIи нэбгрэ пэпчъ Iахьэу хишIыхьагъэм уасэ къыфишIыгъ, кадрэхэм ягъэхьазырынкIэ чемпионатым ишIуагъэ къызэрэкIорэр къыхигъэщыгъ.