Профессиональнэ IэпэIэсэныгъэу «Профессионалхэмрэ» 2024-рэ илъэсымкIэ Адыгэ Республикэм иапшъэрэ технологиехэм ахэхьэрэ лъэныкъохэм ащыщэу «Тыкъэзыуцухьэрэ дунаир къэухъумэгъэныр» зыфиIорэмрэкIэ шъолъыр Чемпионатым иедзыгъоу ныбжьыкIэхэр зыщызэрагъэнэкъокъухэрэр МКъТУ-м щылъагъэкIуатэ.

Мэзаем и 29-м зэнэкъокъум хэлажьэрэмэ агъэцэкIагъэр, апшъэрэ гъэсэныгъэр пштагъэми, анахь къинхэм ащыщыгъ. Мафэм иапэрэ кIэлъэныкъо макъэхэм яинагъэ ашын фэягъэ, мэкъэшыр къызфагъэфедэзэ ар ашIагъ ыкIи журналым зэфэхьысыжьхэр датхагъэх. Нормативнэ шапхъэу щыIэхэмэ макъэу ашыгъэр адештэмэ нэужым ауплъэкIужьыгъ. Мафэм иятIонэрэ кIэлъэныкъо зэнэкъокъум хэлажьэрэмэ IофшIэнымкIэ зиягъэ къэкIорэ лъэныкъохэр къыхагъэщынхэу щытыгъ: макъэм щыухъумэгъэ экраным иинагъэ агъэунэфыгъ, псолъэшI IофшIэнхэр зыщыкIорэ чIыпIэм макъэу къыхэIукIырэр егъэIыхыгъэным къыщегъэжьагъэу санитарнэ-гигиеническэ шапхъэмэ анэсыжьэу ауплъэкIугъэх, ахэр адештэхэмэ зэрагъэшIагъ. Зэнэкъокъум къытырэ десэхэр гъэцэкIэгъэнхэм фэшI, ащ хэлажьэрэмэ «Тыкъэзыуцухьэрэ дунаир къэухъумэгъэнымкIэ» нормативнэ ыкIи справочнэ документациеу фитныгъэ порталэу «ГАРАНТ» зыфиIорэм ихьанхэр Iофым къыдыхэлъытэгъагъ. Зэнэкъокъум ныбжьыкIэу хэлажьэхэрэр зэкIэ агу етыгъэу текIоныгъэм фэбэнагъэх, лъэшэу Iоф зэрашIэшъурэр къагъэлъэгъуагъ.

Гъэтхапэм и 1-м ящэнэрэ кIэух едзыгъор зэхащэгъагъ. Пчэдыжьым эксперт-гъэсакIохэр къэзэрэугъоигъэх ыкIи зэнэкъокъу программэр зэхафыгъ. Ащ гъэцэкIэнэу хагъэхьащтхэм атегущыIагъэх, зэрашырэ оборудованием Iоф зэрадашIэщтымкIэ инструктажыр акIугъ. Мы мафэм ныбжьыкIэмэ апашъхьэ къагъэуцугъэ пшъэрылъымкIэ хъызмэтшIапIэу агъэнэфагъэм Iоф зыщашIэрэ ужым пыдзафэу къыхэкIыгъэхэм язытет зэрагъэшIэн фэягъэ. Ахэр шапхъэм зэрэдимыштэхэрэр агъэунэфынэу щытыгъ. КIэух пшъэрылъэу зэнэкъокъум ипрограммэ къыдыхалъытагъэр тыкъэзуцухьэрэ дунаим зэрарэу рахыгъэр зыфэдизыр гъэнэфэгъэныр ыкIи ар къэухъумэгъэным пае Iофтхьабзэ зэфэшъхьафхэр зэхэщэгъэнхэр ары. Эколог ныбжьыкIэмэ къэбарэу къаIэкIэхьагъэр ежь-ежьырэу зэхафынэу, промышленнэ предприятием изытет зэрагъэшIэнэу, чIыдагъэу икIутыгъэм ибагъэ зэхафынэу ыкIи аварийнэ чIыпIэм зэрикIыжьыщтхэ шIыкIэр къаугупшысынэу щытыгъ. Дунаир къэзыухъумэрэ Iофтхьабзэу зэрахьащтхэм яспискэ ныбжьыкIэмэ зэхагъэуцуагъ, зэрарыр нахь макIэ зэрашIыщтым елъытыгъэу псэугъэх. IофшIэнхэр агъэцакIэхэ зэхъум нормативнэ ыкIи справочнэ шапхъэу щыIэхэр зэкIэ къыдалъытагъэх, фитныгъэ порталэу «ГИГАНТыр» къызфагъэфедагъ. IофшIэн хьылъэу къапагъохыгъэр дэгъу дэдэкIэ кIэлакIэмэ зэшIуахыгъ ыкIи чемпионатым икIэуххэу къаIопщыщтхэм адэгуIэх. Экспертмэ зэнэкъокъу мафэхэм зэфэхьысыжьхэр къафашIыгъэх, чемпионатым ицифрэ платформэ уасэу агъэуцугъэхэр рагъэхьагъэх, ахэри кIэлэеджакIохэм афэдэу зэфэхьысыжьхэм яжэх. Арэу щытми, площадкэм къыгъэлъэгъогъах зэкIэ ныбжьыкIэхэм аныбжь ямылъытыгъэу цIэ лъагэу «Профессионалыр» зэряфэшъуашэр!
Финансхэм афэгъэхьыгъэ площадкэм аужырэ, анахь зэнэкъокъу мэфэ хьылъэр щызэхащагъ: модулитIухэмкIэ гъэцэкIэнхэр аратыгъагъэх. Модулэу «Организация расчетов с бюджетами бюджетной системы РФ» зыфиIорэ агъэцэкIэным хэбзэIахьым фэгъэхьыгъэ хэбзэгъэуцугъэр къыделъытэ, хэбзэIахьыр зыщатырэ пIалъэр, зыфэдизыр ыкIи ащ иуплъэкIун Iофхэр.
УФ-м ибюджетнэ системэ, бюджетыр къэлъытэгъэныр, хэбзэIахьыр хэгъэкIыгъэныр ыкIи нэмыкIхэр гъэцэкIэным хэтыгъэх.Модулэу «Составление плановых документов и осуществление закупок государственными и муниципальными учреждениями» зыфиIорэ зэнэкъокъур агъэцакIэ зэхъум, ныбжьыкIэмэ гъэсакIохэр ашъхьарытыгъэх. Федеральнэ хэбзэгъэуцугъэм аужырэ зэхъокIныгъэу фэхъугъэхэм къатегущыIагъ Адыгэ Республикэм щэфэным ылъэныкъокIэ зэзэгъыныгъэ системэр гъэIорышIэгъэнымкIэ и Комитет итхьаматэу Мэкъулэ Назир.

Финанс Iофхэр зэрэбгъэзекIощтхэр, отчетнэ документхэр анализ зэрэпшIыщтхэр ыкIи финансовэ-хъызмэт IофшIэныр зэрипхъухьащтыр, бюджетнэ сметэр зэрэзэхэбгъэуцощтыр, бюджетнэ учреждениемэ мылъкур зэрагъэзекIорэр къызэрэплъытэщтыр, финансхэм алъэныкъокIэ нахь шIуагъэ къытэу узэрэлэжьэщтыр ыкIи нэмыкIыбэхэр студентмэ къаIотагъэх, Iофым зэрэхашIыкIрэр къаушэтыгъ. Къэралыгъо ыкIи муниципальнэ къулыкъухэм апае ящыкIагъэхэр ныбжьыкIэмэ зэрагъашIагъ, зэрэщэфэщтхэ документациер зэхагъэуцуагъ ыкIи къалъытагъ. Джы ахэмэ яIофшIагъэхэм шIуагъэу апылъыр зыфэдэм экспертмэ уасэ къыфашIыщт.

Мы мэфэ дэдэм Бухгалтерскэ учетымкIэ зэнэкъокъухэм якIэух едзыгъо зэхащэгъагъ, ащ МКъТУ-м иполитехническэ колледж ыкIи Мыекъопэ къэралыгъо гуманитарнэ-техническэ колледж ащеджэхэрэр хэлэжьагъэх. Бухгалтерскэ (финансовэ) отчетымрэ анализымрэ язэхэгъэуцонкIэ амалэу аIэкIэлъхэр зэнэкъокъум хэлажьэрэмэ къагъэлъэгъуагъ: финансовэ отчетностымрэ бухгалтерскэ балансым иликвидностырэ къагъэлъэгъуагъ, организацием мылъкоу IэкIэлъыр, банкрот хъуным ищынагъо щыIэмэ, ащкIэ къэлъытэным имодель зэхэгъэуцогъэныр, организацием ифинансовэ зытет нахь дэй хъугъэмэ е нахьышIумэ зэхэфыгъэныр, ащ организацием ипащэ щыгъэгъозэгъэныр.