Мы зыгъэпсэфыгъо мафэхэм Мыекъопэ къэралыгъо технологическэ университетым Урысые шIэныгъэ-практическэ конференциеу «Апэрэ звеном щылэжьэрэ врачмэ адэбз узхэр къызэрэхагъэщыхэрэр ыкIи ащ зэреIазэхэрэр» зыфиIорэр щыкIуагъ.

А хъугъэ-шIагъэм университетым щызэфищагъэх наукэм щызэлъашIэрэ лIыкIохэр, ахэм ащыщыгъэх РАН-м иакадемикхэр, РОПНИЗ-м ипрезидентэу, псауныгъэр къэухъумэгъэнымкIэ Урысыем и Министерствэ хэхьэрэ ФГБУ «НМИЦ ТПМ-м» ипащэу Оксана Драпкинар; РАН-м ичлен-корреспондентэу, РОПНИЗ-м и Омскэ шъолъыр къутамэ итхьаматэу, псауныгъэр къэухъумэгъэнымкIэ Урысыем и Министерствэ хэхьэрэ ФГБОУ ВО «ОмГМУ-м» ипащэу Мария Ливзан; Урысыем игастроэнтерологмэ янаучнэ обществэ ипрезидентэу Леонид Лазебникыр. Конференцием джащ фэдэу хэлэжьагъэх лечебнэ факультетым идеканэу, медицинэ шIэныгъэхэмкIэ кандидатэу, доцентэу Беслъангъурэ Заремэ, госпитальнэ терапием ыкIи дипломнэ гъэсэныгъэ ужым икафедрэ икIэлэегъаджэу Хьалэщтэ Айдэмыркъан, я 3-4-рэ курсым ыкIи Мыекъопэ къэралыгъо технологическэ университетым и Мединститут истудентхэр.

Лъэпкъ проектэу «Адэбз узхэм ябэныгъэныр» зыфиIорэм итегущыIэнкIэ зэхэсыгъор рагъэжьагъ. А темэмкIэ къэгущыIагъ онкологием икафедрэ ипащэ ипшъэрылъхэр зыгъэцакIэу, ДПО-м илучевой терапие, медицинэ шIэныгъэхэмкIэ кандидатэу Дмитрий Вьюшковыр. Дунаим ыкIи Урысыем адэбз узхэм зэрэщябэнхэрэм ар къатегущыIагъ, узыр къыхэгъэщыгъэнымкIэ Iофтхьабзэу Урысые Федерацием щырагъэкIокIыхэрэр зыфэдэхэр къыIотагъэх.

«Адэбз узым ыпэкIэ хъурэ атрофическэ гастритыр» зыфиIорэ темэмкIэ къэгущыIагъ РАН-м ичлен-корреспондентэу, РОПНИЗ-м и Омскэ шъолъыр отделением итхьаматэу, псауныгъэр къэухъумэгъэнымкIэ Урысыем и Министерствэ хэхьэрэ ФГБОУ ВО «ОмГМУ-м» ипащэу, Сыбыр федеральнэ шъолъырым терапиемкIэ штатым хэмыт специалист шъхьаIэу, медицинэ шIэныгъэхэмкIэ докторэу Мария Ливзан. Докладым непэрэ зэфэхьысыжьэу адэбз узым ыпэкIэ хъурэ атрофическэ гастритым афэхъухэрэм, ар къызэрэхагъэщырэ шIыкIэхэр къыщиIотагъэх. Зэфэшъхьаф шапхъэ зиIэ сымаджэхэм зэралъыплъэхэрэр ыкIи канцеропревенцие ашIынымкIэ агъэфедэрэр шапхъэхэр шIэныгъэлэжьым ышъхьэ къырихыгъэх.

Урысыем игастроэнтерологмэ янаучнэ обществэ ипрезидентэу, А.И. Евдокимовым ыцIэ зыхьырэ МГМСУ-м иIэзэпIэ терапие икафедрэ ипрофессорэу, терапевтмэ я Урысые шIэныгъэ медицинэ обществэ ивице-президентэу, медицинэ шIэныгъэхэмкIэ докторэу, профессорэу (Москва)   Леонид Лазебникым докладэу къышIыгъэр «Стеатознэ узэу шIум фэхъурэм» фэгъэхьыгъагъ.

«Хъулъфыгъэ ыкIи бзылъфыгъэ псауныгъэр: канцеропревенцием фэгъэхьыгъэ Iофтхьабзэр» зыфиIорэ Iэнэ хъураер нэужым зэхащагъ. Ащ экспертэу иIагъэх медицинэ шIэныгъэхэмкIэ докторэу, №1 ОмГМУ зыфиIорэ мамыку ыкIи гинекологием икафедрэ ипащэу Ирина Савельевамрэ ДПО-м хирургическэ узхэм ыкIи урологием икафедрэ ипащэу Антон Цукановымрэ. Хъулъфыгъэхэм ыкIи бзылъфыгъэхэм адэбз узыр яIэмэ зэраушэтырэр ыкIи скрининг зэрашIырэм фэгъэхьыгъэу ахэр къэгущыIагъэх.

«Канцеропревенцием иунэе упчIэхэр» зыфиIорэ Симпозиумыр шIэныгъэ-практическэ конференцием къыдыхэлъытагъэу зэхащагъ. Ащ хэлажьэхэрэр докладхэу «Иммунитетымрэ адэбз узхэмрэ», «Параканкрознэ экксудативнэ плеврит зиIэхэм зэряIазэхэрэр», «Панкреатитэу хэужъыныхьагъэр адэбзым ыпэкIэ къызэрэхъурэм» зыфиIохэрэр ыкIи нэмыкIхэр къыщашIыгъэх.

Конференцием икIэухым Урысыем испециалист шъхьаIэмэ упчIэхэр аратыгъэх ыкIи зэхэугуфыкIыгъэ джэуапхэм ядэIугъэх. Мы конференциер шIэныгъэ амалхэмрэ, ахэр практикэм зэрэщагъэфедэхэрэмрэ ялъэмыджэу хъущт, адэбз узхэм ябэныгъэнымкIэ шIэныгъэлэжьхэр зэрипхыщтых.