Проектэу «Медицинэ эволюциер: Iэзэгъум лъыхъухэзэ» зыфиIорэм ифинал мы мафэхэм Мыекъопэ къэралыгъо технологическэ университетым щыкIуагъ.

Медицинскэ, эколого-биологическэ ыкIи химико-биологическэ лъэныкъохэм нахь афэгъэзэгъэ кIэлэеджакIохэу я 10-11-рэ классхэм арысхэр, МКъТУ-м истудентхэу медицинэ сэнэхьатхэм афеджэхэрэр ары зэнэкъокъум хэлэжьагъэхэр. Командэхэр зэфэмыдэнхэм фэшI зэкIэхэми зэфэдэ фитныгъэхэр аратыгъэх, командэ пэпчъ зы студент-медик, СПО-м щеджэрэ зы нэбгыр ыкIи зы кIэлэеджакIо хэтэу агъэпсыгъ.

Проектым ифинал егъэджэн Iофтхьэбзэ закъор арэп къыдилъытэрэр, ащ хэлажьэрэмэ амал ареты профессиональнэу хэхъоныгъэхэр ашIынхэу. Сценарием зэритыгъэм тетэу едзыгъуи 3-5 зэнэкъокъу пэпчъ хэтыгъ, ахэмэ ахахьэщтыгъэх: ошIэ-дэмышIэу къэхъугъэ Iофым узэрэзекIощтыр къэбгъэлъэгъоныр; медицинэмрэ хабзэмрэ уазэрэхэдэщтым фэгъэхьыгъэ Iофхэм уатегущыIэныр, сымаджэм илажьэ игъэунэфынкIэ унашъо зэрэпшIыщтыр.

Командэ пэпчъ хъугъэ шъыпкъэхэр ыушэтынхэшъ, ахэмэ ушъхьагъэу афэхъугъэхэр къыриIотыкIынхэ фэягъ. Тарихъыр агъэфедэзэ непэрэ IэзакIэр къаубытыныр, медицинэм епхыгъэ шIэныгъэхэр ащ фагъэIорышIэныр япшъэрылъыгъ.

Финалым щызэIукIагъэх командэхэу «Медицинскэ хьаIухэр» ыкIи «Хъугъэ-шIагъэ хьылъ» зыфиIохэрэр. ТекIоныгъэр «Медицинскэ хьаIухэм» къыдахыгъ.

«Медицинэ эволюциер: Iэзэгъум лъыхъухэзэ» зыфиIорэ проектыр — неущрэ мафэм щылэжьэщт врачхэмкIэ, фармацевтхэмкIэ, провизорхэмкIэ, медицинэ сестрахэмкIэ ыкIи нэмыкI медицинскэ IофышIэхэмкIэ амалышIу, заушэтыжьынымкIэ, ясэнаущыгъэ агъэIорышIэнымкIэ IэпыIэгъушIу.

Зэнэкъокъум ипшъэрылъыр — ныбжьыкIэхэр медицинэ шIэныгъэм фэщэгъэнхэр, ятворческэ ыкIи научнэ гупшысэхэм ахэгъэхъогъэныр, медицинэм идунай нахь благъэу нэIуасэ фэшIыгъэнхэр ыкIи командэм хэтхэу Iоф ашIэным фэгъэсэгъэнхэр.

Гъэсэныгъэ организациехэм ыкIи профессиональнэ гурыт гъэсэныгъэм якIэлэеджакIохэу командэу текIуагъэм хэтыгъэхэм фэгъэкIотэнхэр яIэщтых МКъТУ-м чIахьэхэ хъумэ, Медицинэ институтым щеджэнхэу къыхахмэ, ахэмэ рагъэкъущт баллхэм джыри афытырагъэхъощтых. Ащ фэшъхьафэу, МКъТУ-м и Медицинскэ институт истудентхэу текIоныгъэ къыдэзыхыгъэ командэм хэтыгъэхэм е апэрэхэм ахэфагъэхэм къэралыгъо академическэ стипендие анахь иныр афагъэшъошэщт.