Профессиональнэ IэпэIэсэныгъэу «Профессионалы — 2024-рэ» зыфиIорэмкIэ Адыгэ Республикэм ишъолъыр Чемпионатыр рагъэжьагъ.

Политехническэ колледжым ыкIи Мыекъопэ къэралыгъо гуманитарнэ-техническэ колледжым истудентхэмрэ эксперт-гъэсакIохэмрэ ащ хэлажьэх. Индустриальнэ экспертэу зэнэкъокъум зыкъыщызгъэлъэгъуагъэр ООО «Техспецзащита» зыфиIорэм игенеральнэ пащэу Хъот Ирин ары. МКъТУ-м икъутамэу поселкэу Яблоновскэм дэтым идоцентэу Лъащэкъо Заремэ Чемпионатым иэксперт шъхьаI.

Мы тхьэмафэм икъихьэгъум МКъТУ-м и Политехническэ колледж «Бухгалтерскэ учетыр» зыфиIорэ лъэныкъомкIэ апэрэ зэнэкъокъухэр щызэхащагъэх, ащ хэлэжьагъэмэ яшIэныгъэхэр щаушэтыгъэх.

Бухгалтерскэ учетым ихэушъхьафыкIыгъэ программэхэм яIофшIэн къыдалъытэзэ десэхэр къашIыгъэх: организацием иучетнэ политикэ зэхагъэуцуагъ; продукциеу къыдагъэкIыгъэм ыуасэ къалъытагъ; бухгалтерскэ учетым ирегистрэ ахэр щатхыгъэх; организацием иIофшIэн финансовэ зэфэхьысыжьэу фэхъугъэр аушэтыгъ; охътэ гъэнэфагъэм телъытэгъэ оборотно-сальдовэ ведомостыр агъэпсыгъ.

Тыгъуасэ МКъТУ-м и Политехническэ колледж лъэныкъоу «Туризм» зыфиIорэмкIэ джыри зы площадкэ къыщызэIуахыгъ, ащ хэхьэх туризмэм фытегъэпсыхьэгъэ продуктэу зекIор къызкIэлъэIугъэр командэм ыгъэхьазырыныр. Апэрэ десэм къызэритыщтыгъэмкIэ, пшъэшъитIу зекIоу Марокко агъэкIонхэ фэягъ. Къэугупшысыгъэ десэр мыщ фэдэ лъэныкъохэмкIэ зэтеутыгъагъ: «Пшъашъэмэ хэгъэгум ихэушъхьафыкIыгъэ чIыпIэ закъохэр арэп ашIогъэшIэгъоныр, ахэр фаех щыгъозэнхэу ащ якультурэ, яшхыныгъомэ, ащ пае мастер-классмэ ахэлэжьэнхэр, цIыф къызэрыкIомэ аIукIэнхэр къыдалъытэ». ЗекIомэ агу римыхьыгъэхэм, ятхьаусыхэмэ адэлэжьэгъэныр ятIонэрэ десэр афэгъэхьыгъагъ. Командэхэу нэбгрэ тIурытIу хъухэрэр зэнэкъокъугъэх, ахэр турагентствэм иIофшIэн пэблэгъагъэх.

Чемпионатыр зызэхащагъэм къыщегъэжьагъэу апэрэу мэзаем и 29-м Мыекъопэ къэралыгъо технологическэ университетым лъэныкъоу «Финансы» зыфиIорэмкIэ зэрагъэнэкъокъугъэх. Площадкэр къызэIуихыгъ эксперт шъхьаIэу Хьамырзэ Саидэ. Зэнэкъокъум иапэрэ мафэ эксперт шъхьаIэм пшъэрылъыр къыгъэнэфагъ — муниципальнэ гъэпсыкIэ зиIэ къалэу Мыекъуапэ ибюджет анализ шIыгъэныр ыкIи финансхэм алъэныкъокIэ чIыпIэ бюджетыр зэрэбгъэIорышIэщтыр зэхэгъэуцогъэныр.

Зэнэкъокъум хэлажьэрэмэ бюджетым ифедэ къэкIуапIэхэмрэ хъарджэу ышIыхэрэмрэ зэрагъэпшагъэх, щыкIагъэу е тегъахъоу фэхъухэрэр зэхафыгъэх ыкIи федэхэр къызхэкIын лъэныкъохэр зэрагъэшIагъэх.

Бюджетым изытет зэхэфыгъэныр зэкIэмэ ашIогъэшIэгъоныгъ, ащ елъытыгъэу къалэм социальнэ-экономическэ хэхъоныгъэ зэришIыщтыр къыхагъэщыгъ, муниципальнэ гъэсэныгъэм ылъэныкъокIэ нахь федэ къытэу бюджетыр зэрэбгъэфедэн плъэкIыщтым тегущыIагъэх. Индустриальнэ экспертэу Iофтхьабзэм хэлэжьагъ Федеральнэ Казначействэм и ГъэIорышIапIэу Адыгэ Республикэм щыIэм ипащэ игуадзэу Делэкъо Заурбый, ащ зэнэкъокъум хэлэжьагъэхэм осэшIу къафишIыгъ, къалэм дэт организациехэу финансхэм афэгъэзагъэхэм ащылэжьэщт кадрэхэм ягъэхьазырын яIахь ахэм зэрэхалъхьэрэр къыхигъэщыгъ.

Профессиональнэ IэпэIэсэныгъэу «Профессионалы — 2024-рэ» зыфиIорэмкIэ Адыгэ Республикэм ишъолъыр Чемпионат гъэтхапэм и 5-м нэс рагъэкIокIыщт. Программэм къызэрэдыхэлъытагъэу мыщ фэдэ лъэныкъохэмкIэ зэнэкъокъущтых: «Туризмэр», «Тыкъэзыуцухьэрэ дунаим икъэухъумэн», «Бухгалтерскэ учетыр», «БизнесымкIэ программнэ хэкIыпIэу щыIэхэр», «Финансхэр», «Предпринимательствэр», «Рестораннэ сервисыр», «Мобильнэ приложениехэм язэхэгъэуцон».

Зэнэкъокъум хэлажьэрэмэ текIоныгъэ къыдахынэу, урысые лъэгапIэхэми анэсынхэу тафэлъаIо!