Дунэе сатыум и Гупчэу Москва дэтым форумэу «ГукъэкI лъэшхэр лъэхъаныкIэм фытегъэпсыхьагъэхэу» зыфиIорэр щыкIуагъ, ащ хэлэжьагъ МКъТУ-м маркетингымкIэ, сервисымкIэ ыкIи зекIонымкIэ икафедрэ идоцентэу, «Точка кипением» ипрограммнэ пащэу, зэнэкъокъоу «Уигухэлъ факIу» зыфиIорэм иIэшъхьэтетэу Светлана Новиковар.

Шъугу къэдгъэкIыжьын, мэзаем иапэрэ мафэхэм Урысые зэнэкъокъоу «Уигухэлъ факIу» зыфиIорэр форумэу «ГукъэкI лъэшхэр лъэхъаныкIэм фытегъэпсыхьагъэхэу» зыцIэр гукъэкI ТОП-1000-мэ ахэхьэгъагъ. Джащ фэдэу Мыекъопэ къэралыгъо технологическэ университетым и «Точка кипение» форумым изыфэгъэхьазырынкIэ зэхащэгъэ IофтхьабзэхэмкIэ анахь дэгъоу къыхагъэщыгъ.

Мэзаем и 19-м «Точка кипением» икомандэхэм, авторхэм ыкIи зэгъусэгъу авторхэм ягукъэкI лъэшхэр къагъэлъэгъуагъэх, сессием хэлажьэхэрэмрэ экспертхэмрэ ащкIэ агъэрэзагъэх. Командэмэ джэнджэш лъапIэхэр яIофшIэгъухэм къафашIыгъ, предложение дэгъухэр къафахьыгъ, тапэкIэ зыдэлэжьэщт лъэныкъохэр агъэнэфагъэх. УФ-м и Президент зыхэлэжьэщт пленарнэ сессием «Точка кипением» икомандиплI къырагъэблэгъагъ, ахэмэ МКъТУ-м и «Точка кипение» ахэфагъ.

Адыгэ Республикэм ыцIэкIэ ТОП-1000-м проектищ хэхьагъ:

— лъэныкъоу «ШIуагъэ къэзытрэ IофшIэныр ыкIи гъэсэныгъэр» зыфиIорэмкIэ МКъТУ-м ипроектэу «Уигухэлъ факIу» зыфиIорэр;

— лъэныкъоу «Экономикэмрэ предпринимательствэмрэ хэхъоныгъэ ягъэшIыгъэныр» зыфиIорэм Андрей Собкаловым (МКъТУ) къыгъэлъэгъогъэ проектэу «Симбиотическэ регенеративнэ биоэономикэр — Урысыем имэкъу-мэщ комплекс я XXI-рэ лIэшIэгъум хэхъоныгъэ езгъэшIырэм ылъапс» зыфиIорэр;

— лъэныкъоу «ЦIыфхэм ящыIэкIэ-псэукIэ нахьышIу шIыгъэныр» зыфиIорэмкIэ   Ольга Ивановам ипроектэу «Къоджэ гукъэкIмэ яеджапI» зыцIэр.

Форумэу «ГукъэкI лъэшхэр» — гъэ къэс зэхащэрэ Iофтхьабз, анахь гукъэкI гъэшIэгъонхэу хэгъэгум щаушэтыхэрэр зэхэзыугъоежьырэр ары, УФ-м и Президент иунашъокIэ рагъэкIокIы. Форумым ипшъэрылъыр анахь проект дэгъухэр, общественнэ мэхьанэ зиIэхэр къыхэгъэщыгъэнхэр ары, къэралыгъом истратегие гъэпсыгъэныр.