МКъТУ-м имедицинэ эволюцие финалныкъом пхырыкIыгъ!
Мы мафэхэм Мыекъопэ къэралыгъо технологическэ университетым медицинэм иIофышIэ хъущтхэм язэнэкъокъу щыкIуагъ, ахэр финалныкъом щызэнэкъокъугъэх. «Медицинэ эволюциер: Iэзэгъум лъыхъугъэныр» зыфиIорэр ары темэ шъхьаIэу ащ иIагъэр.
Iофтхьабзэм къыдыхэлъытагъэу студентхэм зэрагъэшIагъэхэр, апэрэ IэпыIэгъур сымаджэ хъугъэм зэрэрагъэкIыщтыр къагъэлъэгъуагъэх. Анатомием ыкIи физиологием алъэныкъокIэ шIэныгъэу яIэхэр зэнэкъокъум хэлажьэрэмэ къыраIотыкIыгъэх ыкIи анатомическэ моделыр къызфагъэфедэзэ цIыфым ыIэпкъ-лъэпкъхэр ыкIи иорганхэр къагъэлъэгъуагъэх, ахэр зэрэзэпхыгъэхэр агъэунэфыгъэх.
ЦIыфым ыпкъышъолрэ иорганхэмрэ физиологием ылъэныкъокIэ процессэу къащекIокIыхэрэр зыфэдэхэр врач сэнэхьатым тапэкIэ рылэжьэщтхэм зэхафыгъэх. Гум иIофшIакIэ, жьыр къызэращэрэр, кIэтIэйхэм ыкIи нэмыкIхэм язытет игъэкIотыгъэу къызэIуахыгъ.
«Тарихъ хырыхыхьэмэ яедзыгъо» къыкIэлъыкIорэ IофшIэныр фэгъэхьыгъагъ. Командэ пэпчъ хъугъэ шъыпкъэхэр ыушэтынхэшъ, ахэмэ ушъхьагъэу афэхъугъэхэр къыриIотыкIынхэ фэягъ. Тарихъыр агъэфедэзэ непэрэ IэзакIэр къаубытыныр, медицинэм епхыгъэ шIэныгъэхэр ащ фагъэIорышIэныр япшъэрылъыгъ.
Бэрэ зэжагъэхэ финалыр мэзаем и 29-м сыхьатыр 11-м МКъТУ-м иактовэ зал щыкIощт.