Общественнэ лъытэныгъ
Адыгэ Республикэм и Къэралыгъо Совет-Хасэ Мыекъопэ къэралыгъо технологическэ университетым иIофшIэкIо 17 Рэзэныгъэ тхылъхэмкIэ къыхигъэщыгъэх.
Гъэсэныгъэм ылъэныкъокIэ илъэс пчъагъэхэм агу етыгъэу Iоф зэрашIагъэм, егъэджэн-пIуныгъэ, шIэныгъэ-ушэтын Iофхэм, IэпэIэсэныгъэшхо зыхэлъ специалистхэр зэрагъэхьазырыгъэхэм ыкIи МКъТУ-р загъэпсыгъэр илъэс 30 зэрэхъугъэм афэшI а щытхъу тхылъхэр IофшIакIохэм къафагъэшъошагъэх.
Шъолъыр парламентым итхьаматэ ыцIэкIэ Рэзэныгъэ тхылъхэр Адыгэ Республикэм и Къэралыгъо Совет-Хасэ итхьаматэ игуадзэу, Урысыем и ЛIыхъужъэу Цэй Эдуард IофшIакIомэ аритыжьыгъ, а IофыгъошIур МКъТУ-м иректор ихэдзынхэм афэгъэхьыгъэ конференцием щигъэцэкIагъ.
Адыгэ Республикэм и ЛIышъхьэу КъумпIыл Мурат, МКъТУ-р зыгъэпсыгъэу, ащ и Президентэу ТхьакIущынэ Аслъан, шъолъырым финансхэмкIэ иминистрэу Виктор Орловыр Iофтхьабзэм хэлэжьагъэх.
Гъэсэныгъэм ылъэныкъокIэ МКъТУ-р лъэгапIэ инхэм зэранэсыгъэр а щытхъу тхылъхэм къагъэлъагъо. Инновационнэ шIыкIэхэр, апшъэрэ гъэсэныгъэ методикэхэр университетым щагъэфедэх, шIэныгъэм епхыгъэ IофшIэныр лъегъэкIуатэ.