Къуижъ Саидэ Казбек ыпхъур Мыекъопэ къэралыгъо технологическэ университетым иректорэу хадзыжьыгъ
Мыекъопэ къэралыгъо технологическэ университетым ректорым ихэдзынхэм афэгъэхьыгъэ торжественнэ конференцие щыкIуагъ.
Ректорым ихэдзынхэр зэнэкъокъу шIыкIэм тетэу рагъэкIокIыгъэх. Конференцием хэлажьэрэ лIыкIуи 111-у ыпэкIэ агъэнэфэгъагъэхэм амакъэ атынэу фитныгъэ яIагъ. Ахэр мэзаем и 12-м къыщегъэжьагъэу и 14-м нэс университетым иIофшIэкIо купмэ къыхахыгъагъэх.
ЗэкIэмкIи хэдзынхэм ахэлэжьагъэр нэбгритIу: МКъТУ-м иректорэу Къуижъ Саидэрэ МКъТУ-м итехнологическэ университет идеканэу Шъхьэлэхъо Анзауррэ. Ахэр къэгущыIагъэх, япрограммэхэр конференцием хэлажьэрэмэ къафаIотагъэх. Конференцием илIыкIохэр а программэхэм защагъэгъозагъ ыкIи ежьхэр зыфаехэм амакъэ фатыгъ. Шъэф шIыкIэм тетэу кIогъэ мэкъэтыным ыуж, лъытэкIо комиссием итхьаматэу БрантIэ Мурат хэдзынхэм зэфэхьысыжьэ афэхъугъэр къыIуагъ. Къуижъ Саидэ текIуагъ, мэкъи 102-рэ ригъэкъугъ.
Ректорэу хадзыгъэм университетым ихьакIэхэри МКъТУ-м и Президентэу ТхьакIущынэ Аслъани фэгушIуагъэх.
Конференцием иIофшIэн хэлэжьагъ Адыгэ Республикэм и ЛIышъхьэу КъумпIыл Мурат. Ар Къуижъ Саидэ МКъТУ-м иректорэу зэрэхадзыжьыгъэм фэшI къыфэгушIуагъ ыкIи къыхигъэщыгъ хэдзынхэм къагъэлъэгъогъэ зэфэхьысыжьыр ректорым ипрофессиональнэ гъэхъагъэхэм, ректор IэнатIэм Iутэу Iофышхоу ыгъэцэкIагъэхэм ыкIи университетым иIофышIэхэм цыхьэ ыкIи осэшхо къызэрэфашIырэм яшыхьатэу зэрэщытыр. Адыгеим и ЛIышъхьэ джащ фэдэу къыIуагъ тиреспубликэ IофышIэхэм ащымыкIэным иIахьышIу зэрэхэлъыр, ащ къыдыхэлъытагъэу мэкъумэщым, зекIоным, псэолъэшIыным яIофышIэ хъущтхэр къызэрэчIитIупщыхэрэр. Ащ фэшъхьафэу, МКъТУ-р медицинэ кадрэхэр гъэхьазырыгъэнхэмкIэ апшъэрэ еджапIэ шъхьаIэу щыт.
— Сицыхьэ телъ, Къуижъ Саидэ зипащэ университетым тапэкIи хэхъоныгъэхэр ышIыщтых, ипшъэрылъ шъхьаIэ игъэцэкIэн лъигъэкIотэщт — Адыгеим щылэжьэщт специалистхэр ыкIи научнэ IофышIэхэр ыгъэхьазырыщтых, — къыIуагъ КъумпIыл Мурат.
Къуижъ Саидэ Мыекъуапэ къыщыхъугъ. 1988-рэ илъэсым гурыт еджапIэу N 3-р дэгъу дэдэу, нэужым Адыгэ къэралыгъо университетыр къыухыгъэх. Апшъэрэ еджапIэм сэнэхьатэу «Хьисапыр, информатикэр ыкIи лъытэкIо техникэр» зыфиIорэр щызэригъэгъотыгъ. Апшъэрэ еджапIэм кафедрэм ипащэ иIэпыIэгъоу щыригъажьи, ар ректор IэнатIэм нэсыгъ. Экономикэ шIэныгъэхэмкIэ доктор, физикэ-хьисап шIэныгъэхэмкIэ кандидат, хьисапымкIэ, физикэмкIэ ыкIи системнэ зэхэфынымкIэ кафедрэм ипрофессор. 2013-рэ илъэсым ишышъхьэIу мазэ къыщегъэжьагъэу непэрэ мафэм нэс Мыекъопэ къэралыгъо технологическэ университетым иректор.
Ар зипащэ апшъэрэ еджапIэр мэхьанэшхо зиIэ къэралыгъо программэхэм ахэлажьэ ыкIи гъэхъагъэхэри ащишIыгъэх. ГущыIэм пае, МКъТУ-р апэрэу Урысыем икIэугъоекIо апшъэрэ еджапIэу ыкIи кIэугъоекIо производствэм фегъэджэгъэнхэмкIэ федеральнэ инновационнэ площадкэу хъугъэ.
2022-рэ илъэсым МКъТУ-м мэкъумэщымкIэ Адыгэ шIэныгъэ-ушэтэкIо институтыр къыхагъэхьажьыгъ, ащ мэкъумэщ промышленнэ комплексым иIофышIэхэм ягъэхьазырын анахь лъэгэпIэ инхэм алъыкIигъэхьагъ, агробиотехнологие ыкIи цифрэ технологиехэр производствэм щыгъэфедэгъэнхэмкIэ амалышIухэр ыгъотыгъэх.
МКъТУ-м Дзэ егъэджэн гупчэр къщызэIуахыгъ, Урысыем и Ошъогу-космическэ кIуачIэхэм ящыкIэгъэщт дзэ сэнэхьатхэр 2024-рэ илъэсым иIоныгъо мазэ и 1-м къыщегъэжьагъэу щагъэхьазырыщтых.
Шъугу къэдгъэкIыжьын, шIэныгъэмрэ ыкIи апшъэрэ гъэсэныгъэмрэкIэ УФ-м и Министерствэ ыгъэнэфэгъэ графикым елъытыгъэу ректорым ихэдзынхэм языфэгъэхьазырын фэгъэхьыгъэ Iофтхьабзэхэр 2023-рэ илъэсым итыгъэгъазэ мазэ и 26-м аублагъэх. МКъТУ-м иректор хъунымкIэ кандидатэу зыкъэзгъэлъэгъуагъэхэр шIэныгъэмрэ ыкIи апшъэрэ гъэсэныгъэмрэкIэ УФ-м и Министерствэ иаттестационнэ комиссие мэзаем и 6-м пхырыкIыгъагъэх ыкIи хэдзынхэм ахэлэжьэнхэмкIэ фитныгъэ яIэ хъугъагъэ. Ректорым ихэдзынхэм афэгъэхьыгъэ Iофхэм апылъыгъэр шIэныгъэлэжьхэм ясовет щызэхащэгъэгъэ Комиссиер ары. Ащ пащэ фашIыгъагъ научнэ IофшIэнымкIэ ыкIи инновационнэ хэхъоныгъэ МКъТУ-м егъэшIыгъэнымкIэ проректорэу Татьяна Овсянниковар. Положениеу щыIэм елъытыгъэу Комиссием зэхэсыгъохэр зэхищагъэх, ахэм ащашIыгъэ унашъохэр МКъТУ-м исайт къыщыхаутыгъагъ.