ЗэлъашIэрэ сурэтышIэу, скульпторэу ыкIи дизайнерэу Зураб Церетели ыныбжь илъэс 90-рэ зэрэхъугъэм фэгъэхьыгъэу, акциеу «ШIэныгъ. Лекторий» зыфиIорэм къыдыхэлъытагъэу МКъТУ-м иполитехническэ колледж Iофтхьабзэ щыкIуагъ.

МКъТУ-м и ШIэныгъэ тхылъеджапIэ инаучнэ-методическэ отдел ипащэу Ирина Константиновар «СурэтышIэм ынэхэмкIэ» зыфиIорэ лекцием къеджагъ.

Студентхэр лъэтегъэуцом нэIуасэ фэхъугъэх, скульпторым итворчествэ зэрагъэшIагъ, ищыIэныгъэ щыщ пычыгъо гъэшIэгъоныбэмэ защагъэгъозагъ.

Зураб Церетели произведение 5000 фэдиз ыIапэ къычIэкIыгъ, ахэр графикэу, скульпторэу, монументальнэ-декоративнэ искусствэу щытыгъэх, ежь зэрэпсаоу искусствэ Iофым зыфигъэшъошагъ. ИIофшIагъэхэр Урысыем, ежь ихэгъэгу гупсэу Грузием ыкIи нэмыкI къэралыгъохэм ащыIэх.

Шъугу къэдгъэкIыжьын, «ШIэныгъ. Лекторий» зыфиIорэр — ар Урысые обществэу «ШIэныгъэм» ипроект, ащ гъэсэныгъэ лекциехэр, мастер-классхэр зэфэшъхьаф гъэсэныгъэ учреждениехэм ащызэхещэх, нахь ныбжьыкIабэ а Iофым къыхагъэлэжьэным, ахэм шIэныгъакIэхэр арагъэгъотыным пылъых, непэрэ лъэхъаным хэхъоныгъэхэр щашIынхэмкIэ амалышIу афэхъу.

Лекторием къыдыхэлъытэгъэ лекциехэр къихьащт тхьэмафэм, мэзаем и 20-м ыкIи и 21-м Мыекъопэ къэралыгъо технологическэ университетым щыкIощтых, зыщызэхащэщтхэр аудиториехэу М1, М2 ыкIи нэмыкI чIыпIэхэр.