ЛъыплъэкIо советым изэхэсыгъорэ Урысые обществэу «ШIэныгъэм» ия IV-рэ Зэфэсрэ Москва щылэжьэрэ Дунэе къэгъэлъэгъон-форумэу «Урысыем» мы мафэхэм щыкIуагъэх.

Общественнэ ыкIи къэралыгъо IофышIэхэр, къэралыгъо корпорациехэм, УФ-м ишъолъырхэм, научнэ ыкIи кIэлэегъэджэ сообществэхэм ялIыкIохэр, лекторхэу ыкIи ягъусэгъухэу «ШIэныгъэм» иIофшIэн хэлажьэхэрэр гъэсэныгъэ организацием, Владимир Путиным иунашъокIэ 2021-рэ илъэсым ыуж зэхъокIыныгъэхэр зыфашIыгъэм, гъэхъагъэу ышIыгъэхэр, зэрэлэжьагъэр зэфахьысыжьыгъэх ыкIи пшъэрылъыкIэхэр агъэнэфагъэх.

Зэхэсыгъом къыщыгущыIэзэ, УФ-м и Президент и Администрацие и Iэшъхьэтет и Апэрэ гуадзэу, Обществэу «ШIэныгъэм» и ЛъыплъэкIо совет итхьаматэу Сергей Кириенкэм къыкIигъэтхъыгъ, Обществэу «ШIэныгъэм» анахь мэхьанэ зиIэ пшъэрылъэу иIэр — лекторхэм, гъэсакIохэм, гъусэгъухэм ренэу хэгъэхъогъэныр ары. Ахэр кIэлэегъэджэ ыкIи шIэныгъэлэжь IэпэIасэ къодыехэп — лектор мин 23-м гъэIорышIэкIо-практикхэри къыхеубытэх, шIэныгъэу зэрагъэгъотыгъэмкIэ нэмыкIхэм адэгощэжьхэрэр.

—Щысэ шIагъо къытэзгъэлъэгъурэр ти Президентэу Владимир Путиныр ары. Iофыбэ зэриIэзэ, уахътэ къыхигъэкIи, 2021-рэ илъэсым Обществэу «ШIэныгъэм» зэхищэгъэгъэ марафоным лекцие къыщеджэгъагъ, — къыIуагъ Сергей Кириенкэм.

Урысые обществэу «ШIэныгъэм» игенеральнэ пащэу Максим Древаль къыIотагъ зэхъокIныгъэхэм ауж Iофэу агъэцэкIагъэр, ащ изэфэхьысыжьхэр. Пятигорскэ дэт шIэныгъэ Гупчэу «Машук» зыцIэм нэбгрэ мин 19 зэрэщырагъэджагъэр ащ къыIуагъ, онлайн-платформэу «ШIэныгъэр. Академиер» зыфиIорэм нэбгрэ мин 90 къытIупщыгъ.

Хэгъэгум иапэрэ цIыфхэр лекторэу Iофым къызэрэхэлажьэхэрэм ишIуагъэкIэ, шIэныгъэзехьэм истатус уасэ фашIэу хъугъэ. Ар социологическэ ушэтынхэм къагъэлъагъо. ВЦИОМ-м ышIыгъэ ушэтынхэмкIэ, 2023-рэ илъэсым имэкъуогъу мазэ тихэгъэгу щыпсэурэмэ япроцент 25-мэ шIэныгъэзехьэм осэшхо фашIэу аIуагъ, илъэсныкъокIэ ар процент 31-м нэсэу къыдэкIоягъ. Илъэс 14-м къыщегъэжьагъэу илъэс 35-м нэс зыныбжь ныбжьыкIэхэр пштэхэмэ, ар процент 43-м нэсы.

Максим Древаль джащ фэдэу къыхигъэщыгъ, «ШIэныгъэм» илекторхэр хэгъэгум ишъолъыр 89-мэ мини 115-рэ лекциехэм къащеджагъэх. Ащ фэшъхьафэу сыхьат 7200-рэ хъурэ шIэныгъэзехьэ контент агъэпсыгъ, ащ млрд 2-м ехъу еплъыгъ, лайкэу ыкIи репостэу миллион 30 фэдиз соцсетьхэм къащыфагъэуцугъ.

АгъэкIэжьыгъэ Обществэу «ШIэныгъэм» иIофшIэн хэгъэгум ишъолъыр 89-мэ ащыпсэурэ нэбгрэ миллион 50 къыхэлажьэ. Ушэтынхэм къызэрагъэлъагъорэмкIэ, шIэныгъэзехьэ организациер зэрэщыIэм Урысыем щыпсэухэрэм япроцент 57-р щыгъуаз, ахэм ащыщэу ащ цыхьэ фэзышIырэр процент 76-м къехъу. Илъэс 14-м къыщегъэжьагъэу илъэс 35-м нэс зыныбжь ныбжьыкIэхэм цыхьэу ащ фашIырэр нахьыб, процент 81-м къырагъэхъугъ.

ЛъыплъэкIо советым ыгъэнэфэгъэ амбассадорхэм гукъэкIэу яIэхэр зэхэсыгъом къыщыраIотыкIыгъэх, интернет-порталэу атIупщыгъэм, къэгъэлъэгъон форумэу «Урысыем» хэхъоныгъэу тикъэралыгъо ышIыгъэхэу къыщатыгъэхэм, пкIэ зыхэмылъ мультимедийнэ контентэу шIэныгъэзехьэ фильмыхэр зыщагъэуцущтхэм, цифрэ платформэу «ШIэныгъэр.Вики» зыцIэм хэхъоныгъэхэр егъэшIыгъэнхэм къатегущыIагъэх. 

Графическэ новеллэм илинейкэу «ШIэныгъэр.ЛIыхъужъхэр» зыцIэм зырагъэушъомбгъунэу, гъэсэныгъэ учреждениехэм ар алъагъэIэсынэу, хэушъхьафыкIыгъэ дзэ операцием хэлажьэхэрэм афэгъэхьыгъэ къэтынхэм ягъусэу IофшIэным илIыхъужъхэм, врачхэм, нэмыкI сэнэхьат зиIэхэу гъэхъагъэ зышIыхэрэм къатегущыIэнхэу рахъухьагъ.

УФ-м и Президент иIэпыIэгъоу Владимир Мединскэм, гъэсэныгъэмкIэ УФ-м и Министрэу Сергей Кравцовым, ныбжьыкIэ IофхэмкIэ Федеральнэ агентствэм ипащэу Ксения Разуваевам, къэралыгъо корпорациеу «Роскосмос» зыфиIорэм игенеральнэ пащэу Юрий Борисовым ыкIи ЛъыплъэкIо советым хэтхэм а гукъэкIхэм къадырагъэштагъ.

УФ-м ишъолъырхэм яамалхэр къызфагъэфедэзэ, лекторскэ сообществэм социальнэ IэпыIэгъу етыгъэным фэгъэхьыгъэ гукъэкIыр игъоу алъэгъугъ. Белорусскэ обществэу «ШIэныгъэм» ипащэу Вадим Гигиным Урысые обществэу «ШIэныгъэм» дэлэжьэнхэ гухэлъ зэряIэр къыIуагъ, дунаем илекторхэм ясообществэ зэхэщэгъэныр, хэгъэгоу ащ фэдэ Iофыгъо зэрымылъми алъагъэIэсыныр тэрэзкIэ ылъытагъ.

Урысые обществэу «ШIэныгъэм» ия IV-рэ Зэфэс нэбгрэ 450-рэ хэлэжьагъ. Илъэсищым къыкIоцI организацием Iофэу ышIагъэм ахэр тегущыIагъэх, Уставым иредакциякIэ аштагъ, ренэу лэжьэщт пащэхэмрэ уплъэкIокIо органхэмрэ агъэнэфагъэх.

Лектор ыкIи шIэныгъэзехьэ гъэшIуагъэхэм къэралыгъо бгъэхалъхьэхэр зыщаратыжьыгъэхэ торжественнэ зэхахьэр Зэфэсым иIофшIэн къыдыхалъытагъ. Хэгъэгум ишъолъыр 17-мэ къарыкIыгъэ шIэныгъэлэжьхэу, кIэлэегъаджэхэу, къэралыгъо ыкIи общественнэ IофышIэхэу, культурэм ыкIи искусствэм ямастерхэу нэбгрэ 40-мэ бгъэхалъхьэхэр афагъэшъошагъэх.

ШIэныгъэзехьэмэ аратыгъэ бгъэхалъхьэхэр ыкIи тынхэр: я II-рэ степень зиIэ орденым имедалэу «Хэгъэгум ыпашъхьэкIэ гъэхъагъэу ышIыгъэхэм афэшI» зыфиIорэр, тамыгъэу «ГъэсакIоу зэрэщытыгъэм фэшI» зыфиIорэр, УФ-м и Президент и Рэзэныгъэ тхылъхэр, УФ-м и Федеральнэ ЗэIукIэ ФедерациемкIэ и Совет и Рэзэныгъэ тхылъ, Урысыем и Общественнэ палатэ ищытхъу грамотэхэр. Урысые обществэу «ШIэныгъэм» ытыгъэхэм ащыщыгъэх саугъэт цIыкIухэр ыкIи бгъэхалъхьэ тамыгъэхэу «Гъэсэныгъэм иIахьышхо зэрэхилъхьагъэм фэшI» зыфиIорэр, ахэр лектор гъэшIуагъэхэм ыкIи гъэсэныгъэ организацием игъусэгъухэм афагъэшъошагъэх.