Нэмыц-фашист техакIохэр рафыжьхи, Мыекъуапэ шъхьафит зашIыжьыгъэ мафэр хагъэунэфыкIыгъ
Мыекъуапэ исаугъэт зэхэтхэу ЕгъэшIэрэ машIор зыщыблэрэм щыкIогъэ патриотическэ акцием МКъТУ-м иIофшIакIохэмрэ истудентхэмрэ хэлэжьагъэх, ар Адыгеир нэмыц-фашист техакIомэ къатырахыжьи, шъхьафит зашIыжьыгъэр илъэс 81-рэ зэрэхъугъэм фэгъэхьыгъагъ.
Мыекъуапэ шъхьафит зашIыжьыгъэр щылэ мазэм и 29-м хагъэунэфыкIы. Адыгеим ишъолъыр зэрэпсаоу шъхьафит зыхъужьыгъэр — мэзаем и 18-р ары. Мы мафэм, 1943-рэ илъэсым Краснэ армием Тэхъутэмыкъое раоным ит къуаджэхэу Афыпсыпрэ Псэйтыкурэ шъхьафит ышIыжьыгъэх.
— Тэ тиреспубликэкIэ мэзаем и 18-р— мэфэ хэушъхьафыкIыгъ, Хэгъэгу зэошхом илъэхъан Адыгеим ицIыфхэм лIыгъэу ыкIи шъырытныгъэу къахэфагъэр къеушыхьаты, шIэжьым итамыгъэу щыт, щымыIэжьхэм, мамыр щыIакIэм, шъхьафитныгъэм апае цIыфыпсэ осэшхоу атыгъэм имаф. ТичIыгогъухэу, тикъэралыгъо щыщ миллионхэу фашист техакIохэм ябэныгъэнымкIэ зышъхьамысыжьыгъэхэм шъхьэкIэфэныгъэшхо мы мафэм афэтэшIы, — къыIотагъ Адыгэ Республикэм и ЛIышъхьэу КъумпIыл Мурат.
ЧIыгу такъыр пэпчъ лъыр зыгъэчъэгъэ тятэжъ пIашъэхэм къинэу алъэгъугъэр непэ тыгу къэтэгъэкIыжьы. Заом иилъэс къинхэм къалэм щыпсэухэрэр партизанскэ движением, подпольнэ организациехэм ахэтыгъэх, техакIомэ псэемыблэжьэу апэуцужьыгъэх.
Тэ тщыгъупшэ хъущтэп илъэс фыртынэхэр, текIоныгъэм тыфэзыщагъэхэр. А тарихъым инэкIубгъохэр ары тиIэм уасэ фэтэзгъэшIырэр, дунай мамырым имэхьанэ зэхэтэзгъэшIыкIырэр.