Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ университетым иректорэу Къуижъ Саидэ.

Повесткэм упчIэ шъхьаIэу хэтыгъэр «Апшъэрэ гъэсэныгъэмкIэ федеральнэ къэралыгъо бюджетнэ гъэсэныгъэ учреждениеу «Мыекъопэ къэралыгъо технологическэ университетым» иректор ихэдзынхэр зэрэрагъэкIокIыхэрэм фэгъэхьыгъэ Положением зэхъокIныгъэхэр фэшIыгъэнхэр» зыфиIорэр ыкIи 2024-рэ илъэсым МКъТУ-м иректор ихэдзынхэм афэгъэхьыгъэ Iофтхьабзэхэр зэхэщэгъэнхэмкIэ Планыр гъэнэфэгъэныр ары.

МКъТУ-м иректор ихэдзынхэмкIэ комиссием итхьаматэу, научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар университетым иректор ихэдзынхэм афэгъэхьыгъэ конференциеу зэхащэщтым къытегущыIагъ. Структурнэ подразделение пэпчъ лIыкIо пчъагъэу конференцием къыгъэкIощтыр ыкIи хэдзынхэр зыщыкIощт мафэр агъэнэфагъ — мэзаем и 19-р 2024-рэ илъэсыр.

«Приоритет-2030-рэ» зыфиIорэ программэм къыдыхэлъытагъэу апшъэрэ гъэсэныгъэм иорганизациехэу хэхъоныгъэм ипрограммэ дэлэжьэгъэнымкIэ IэпыIэгъу зэрагъэгъотынэу агъэнафэхэрэм ахэфэнхэм фэшI, Мыекъопэ къэралыгъо технологическэ университетым ишIэныгъэлэжьхэм ясовет изэхэсыгъо щырахъухьагъ заявкэр атынэу.

Къуижъ Саидэ къызэрэхигъэщыгъэмкIэ, джырэ лъэхъаныр пштэмэ, тихэгъэгу ит университетхэм къэралыгъо IэпыIэгъу ятыгъэнымкIэ мы урысые проектыр анахь инхэм ащыщ. Программэм ипшъэрылъыр — университетхэр зыхэхьащтхэ купышхо зэхэщэгъэныр, научнэ шIэныгъэм, технологиехэм ягъэпсынкIэ пэрытныгъэр ащ егъэубытыгъэныр, шIэныгъакIэхэр урысые экономикэмрэ социальнэ сферэмрэ ащыгъэфедэгъэнхэр.

«Дзэ егъэджэн гупчэм и Положение апшъэрэ гъэсэныгъэмкIэ федеральнэ къэралыгъо бюджетнэ гъэсэныгъэ учреждениеу «Мыекъопэ къэралыгъо технологическэ университетым щыштэгъэныр» зыфиIорэ упчIэм къыдыхэлъытагъэу Къуижъ Саидэ Дзэ егъэджэн гупчэм ипшъэрылъ шъхьаIэхэр, дзэ-учетнэ сэнэхьатэу ащ къытыщтхэр, студентхэм ягъэхьазырын, штатнэ расписанием ыкIи Положением къытырэ Iофыгъохэр къыIотагъэх.

«Къэралыгъо ыкIи муниципальнэ къулыкъушIэхэм яфитныгъэхэр зыфэдизыр къэзгъэлъэгъорэ шъолъыр Гупчэр зэхэщэгъэныр» зыфиIорэ упчIэм къытегущыIагъ научнэ IофшIэнымкIэ ыкIи инновационнэ хэхъоныгъэмкIэ МКъТУ-м ипроректорэу Татьяна Овсянниковар. Ащ къызэрэхигъэщыгъэмкIэ, шъолъыр Гупчэм икъызэIухын фэгъэхьыгъэ зэхэсыгъом хабзэм игъэцэкIэкIо органхэм япащэхэр хэлэжьагъэх ыкIи къэралыгъо ыкIи муниципальнэ къулыкъушIэхэм яфитныгъэхэр зыфэдизыр къэзгъэлъэгъорэ шъолъыр Гупчэр Мыекъопэ къэралыгъо технологическэ университетым иструктурнэ подразделениеу гъэпсыгъэнэу унашъо ашIыгъ.

Научнэ IофшIэнымкIэ ыкIи инновационнэ хэхъоныгъэмкIэ университетым ипроректор къызэрэхигъэщыгъэмкIэ, непэрэ мафэм ехъулIэу Адыгэ Республикэм IофшIэнымкIэ ыкIи социальнэ хэхъоныгъэ егъэшIыгъэнымкIэ и Министерствэ ягъусэу Гупчэм игъэпсынкIэ Iофтхьабзэу зэхащэщтхэм «ягъогу картэ» и План рахъухьагъ ыкIи аштагъ.

Финансовэ гъэIорышIапIэм ипащэу Екатерина Мельниковам упчIэу «Апшъэрэ ыкIи гурыт профессиональнэ гъэсэныгъэм ипрограммэхэм, шIэныгъэ ыкIи шIэныгъэ-кIэлэегъэджэ кадрэхэр аспирантурэм щыгъэхьазырыгъэнхэм, ординатурэм ипрограммэ ягъэсэныгъэ уасэ индексацие шIыгъэным фэгъэхьыгъ» зыфиIорэм къытегущыIагъ. 

НыбжьыкIэ политикэмкIэ университетым ипроректорэу БрантIэ Мурат джэпсалъэу «Университетым щеджэрэ студентмэ егъэджэныпкIэу къатырэр егъэIыхыгъэныр» зыфиIорэм шIэныгъэлэжьхэм ясовет хэтхэр едэIугъэх.

Повесткэм хэтыгъэ упчIэхэу зымакъэ зыфатынэу щытыгъэмэ зэкIэмэ адырагъэштагъ.