Блыпэм къыщыублагъэу Мыекъопэ къэралыгъо технологическэ университетым иструктурнэ подразделениехэм яIофшIэкIо купмэ зэIукIэхэр зэхащэх, ахэр зыфэгъэхьыгъэхэр рагъаджэхэрэмрэ езыгъаджэхэрэмрэ ащыщхэу конференцием хэлэжьэщтхэм яхэдзын ары.

ШIэныгъэмрэ ыкIи апшъэрэ гъэсэныгъэмрэкIэ УФ-м и Министерствэ ыгъэнэфэгъэ графикым елъытыгъэу ректорым ихэдзынхэм языфэгъэхьазырын фэгъэхьыгъэ Iофтхьабзэхэр 2023-рэ илъэсым итыгъэгъазэ мазэ и 26-м аублагъэх. ЛIыкIохэм яхэдзынхэр мэзаем и 12-м къыщегъэжьагъэу и 14-м нэс апшъэрэ еджапIэм щырагъэкIокIых.

Ащ фэгъэхьыгъэ игъэкIотыгъэ къэбарыр МКъТУ-м исайт инэкIубгъоу  «Выборы ректора» зыфиIорэм къихьагъ.

Шъугу къэдгъэкIыжьын, МКъТУ-м иректор хъунымкIэ кандидатэу зыкъэзгъэлъэгъуагъэхэр шIэныгъэмрэ ыкIи апшъэрэ гъэсэныгъэмрэкIэ УФ-м и Министерствэ иаттестационнэ комиссие мэзаем и 6-м пхырыкIыгъэх ыкIи хэдзынхэм ахэлэжьэнхэмкIэ фитныгъэ яIэ хъугъэ. Ащ фэгъэхьыгъэ къэбарыр блэкIыгъэ бэрэскэшхом шIэныгъэлэжьхэм ясоветэу университетым зэхищэгъагъэм къыщиIопщыгъ МКъТУ-м иректор ихэдзынхэмкIэ комиссием итхьаматэу Овсянникова Татьяна Анатолий ыпхъум.

ШIэныгъэлэжьхэм ясовет джащ фэдэу щагъэнэфагъ структурнэ подразделение пэпчъ лIыкIо пчъагъэу конференцием къыгъэкIощтыр ыкIи хэдзынхэр зыщыкIощт мафэр агъэнэфагъ — мэзаем и 19-м сыхьатыр 14:30-м. Конференцием зэкIэмкIи лIыкIо 111 хэлэжьэщт.

Ащ фэшъхьафэу, зэIукIэм къыдыхэлъытагъэу МКъТУ-м иректорэу Къуижъ Саидэ университетым иIофышIэхэр рэзэныгъэ тхылъхэмкIэ къыхигъэщыгъэх, ахэр илъэс пчъагъэхэм къакIоцI агу етыгъэу апшъэрэ еджапIэм хэхъоныгъэхэр ышIынхэм зэрэфэлэжьагъэхэм ыкIи Мыекъопэ къэралыгъо технологическэ университетым ыныбжь илъэс 30 зэрэхъугъэм афэшI.