Непэ Урысые обществэу «ШIэныгъэм» и Адыгэ шъолъыр къутамэ экскурсие зэхищагъ, Лицееу №34-м иинженернэ класс щеджэхэрэмэ МашинэшI заводыр арагъэлъэгъугъ.

Урысые обществэу «ШIэныгъэм» икъутамэ ипащэу Галина Измайловар ары кIэлэеджакIохэр Къыблэ Урысыем ит хъызмэтшIэпIэ анахь инхэм ащыщэу «Мыекъопэ машинэшI заводыр» кIэлэеджакIохэм язгъэлъэгъугъэр, ахэм ягъусагъ класснэ пащэу, физикэмкIэ кIэлэегъаджэу Елена Сайчук.

Мыекъопэ машинэшI заводым иинженер шъхьаIэу Александр Татаренкэм хъызмэтшIапIэм Iофэу щагъэцакIэрэм кIэлэеджакIохэр щигъэгъозагъэх. ГидроманипуляторхэмкIэ пхъэхэр, гъучIхэр, псэолъэшI пкъыгъохэр ыкIи конструкциехэр, чIыдагъэ комплексым щагъэфедэхэрэ Iэмэ-псымэхэр, трубэхэр ыкIи электропередачэмэ афытегъэпсыхьэгъэ пкъэухэр зэрахьэх, хьылъэзещэ машинэхэр аушъэх ыкIи аунэкIых.

1985-рэ илъэсым СССР-м апэрэу гидроманипуляторхэр серийнэу машинэшI заводым къыдигъэкIыхэу ыублагъ. А уахътэм къыщегъэжьагъэу гидроманипулятор 13000 ащ къыщыдагъэкIыгъ, экономикэм иотраслэ зэфэшъхьафхэм ахэр ащагъэфедэнхэ алъэкIы. Непэрэ мафэм Урысыем гидроманипуляторхэу щагъэфедэхэрэм япроцент 30-р заводым ипродукций.

—Экономикэм инновационнэ хэхъоныгъэхэр егъэшIыгъэнхэмкIэ ыкIи зэхъокIыныгъэшIухэр фэшIыгъэнхэмкIэ кадрэхэм ягъэхьазырын мэхьанэ иIэу щыт: Урысыем ит хъызмэтшIапIэхэр зэкIэ ныбжьыкIэ специалист гъэсагъэхэм, IофшIэным хэшIыкI фызиIэхэм ыкIи зиIэпэIэсэныгъэ хэзгъэхъоным дэлажьэхэрэм ащэкIэх. Непэрэ ныбжьыкIэ бэдзэрым гумэкIыгъоу иIэхэм ащыщэу хъугъэ апшъэрэ классхэм ащеджэхэрэр къыхахыщт сэнэхьатхэм зэрафытырамыгъэпсыхьэхэрэр. Инженернэ сэнэхьатыр къыхэхыгъэнымкIэ зишIуагъэ къакIорэр, ащ фэщэгъэнхэм епхыгъэ IофшIэныр ары. КIэлэеджакIохэм нахьыжьэу сэнэхьатыр къыхягъэхыгъэныр, инженернэ-техническэ кадрэхэр шъолъырым фэгъэхьазырыгъэнхэр апшъэрэ пшъэрылъэу тиIэхэм ащыщ, — къыхигъэщыгъ Урысые обществэу «ШIэныгъэм» икъутамэ ипащэу Галина Измайловам.

Мыщ фэдэ промышленнэ экскурсиехэм яшIуагъэ къэкIо, ныбжьыкIэхэр сэнэхьатым нэIуасэ фэхъух, тапэкIэ ар ежьхэм къыхахыным тырегъэпсыхьэх. Мэхьанэшхо зиIэ егъэджэн-гъэсэныгъэ IофшIэнэу экскурсиер алъытэ. КIэлэеджакIохэм инженернэ-техническэ сэнэхьатхэр къыхахынхэм, ар ашIогъэшIэгъоныным къыфегъэущых.