«Зыпкъ ит туризмэр» зыфиIорэ хэушъхьафыкIыгъэ номинацием лъэтегъэуцо фашIыгъ
ХэушъхьафыкIыгъэ номинациеу «Зыпкъ ит туризмэр» зыфиIорэр Проектнэ офисым ыгъэнэфагъ, ар къушъхьэ экокурортэу «Лагъо-Накъэм» игъэпсын фытегъэпсыхьагъ.
ХэушъхьафыкIыгъэ номинациеу «Зыпкъ ит туризмэр» зыфиIорэм илъэтегъэуцо зыфызэхащэгъэ командэхэу IэкIоцI ыкIи икIын зекIоныр Урысыем ишъолъырхэм ащызыгъэпсыхэрэр ыкIи ныбжьыкIэ командэхэу проектэу «Уигухэлъ факIу» зыфиIорэ Урысые зэнэкъокъум хэлажьэхэрэр ары.
Зыпкъ ит туризмэм ипрактикэ анахь дэгъухэм ныбжьыкIэхэр нэIуасэ фэшIыгъэнхэр зэIукIэм ипшъэрылъ шъхьаIэу щытыгъ. Адыгеим ищысэкIэ зекIонымкIэ Iофтхьабзэу зэхэпщэн плъэкIыщтхэм атегущыIагъэх, шъолъырым ирекреационнэ амалхэм афэсакъыгъэным иIофыгъохэри къаIэтыгъэх.
МКъТУ-м и Точка кипение ипрограммнэ Iэшъхьэтетэу, ныбжьыкIэ проектхэу «Уигухэлъ факIу» зыфиIорэм и Урысые зэнэкъокъу ипащэу Светлана Новиковам зэIукIэр зэрищагъ.
Iофтхьабзэм хэлэжьагъэхэр: курортэу «Красная Поляна» зыфиIорэм хэхъоныгъэхэр егъэшIыгъэнхэмкIэ ыкIи ащ къыуцухьэрэ дунаир ухъумэгъэнымкIэ ипащэу Лев Шагаровыр, ООО «Лагъо-Накъэ» зыфиIорэм игенеральнэ пащэу Къэлэшъэо Инвер, РОО «Туристическая Адыгея» зыфиIорэм ипащэу Ольга Ивановар, Адыгэ Республикэм и Лэпкъ музей ипащэ игуадзэу Шэуджэн Налмэс, АНО «Заповедный Кавказ» зыфиIорэм ипащэу, ландшафтыр ягъэхьыгъэнымкIэ ыкIи мэз хъызмэтымкIэ МКъТУ-м икафедрэ идоцентэу, биологие шIэныгъэхэмкIэ кандидатэу Алексей Бибиныр, АНО «Заповедный Кавказ» зыфиIорэм иIофышIэу Жанна Фроловар, социальнэ проектмэ яменеджерэу Марина Мельникыр, зекIо бизнесым, хабзэм, гъэсэныгъэм, общественнэ ыкIи тыкъэзыуцухьэрэ дунаир къэзыухъумэхэрэ организациехэм ялIыкIохэр.
Къушъхьэ курортэу «Лагъо-Накъэ» щагъэфедэн алъэкIыщт проектхэу зекIоным изэхэщэн епхыгъэхэр зэхэгъэуцогъэнхэр зэнэкъокъум хэлажьэрэ командэхэм пшъэрылъэу афагъэуцу. ТекIоныгъэ къыдэзыхырэ командэхэм зыпкъ ит зекIонымкIэ стажировкэ Шъачэ Паркым (Сириусым ифедеральнэ шъолъыр) мэкъуогъум и 24-м къыщегъэжьагъэу и 29-м нэс щарагъэхьыщт.
ЗэIукIэм хэлэжьэгъэ командэмэ гухэлъыкIэхэр яIэ хъугъэх, зекIоным зегъэушъомбгъугъэнымкIэ проектыкIэхэр агу къэкIыгъэх, экспертэу нэIуасэ зыфэхъугъэхэм яIэпыIэгъуи агъотыным щыгугъунхэ алъэкIы.