Урысые гъэсэныгъэ акциеу ШIэныгъ.Наукэр зыфиIорэм хэгъэгум ишъолъыр 89-рэ зэлъеубыты ыкIи шIэныгъэлэжь ныбжьыкIэхэмрэ ягъэсакIохэмрэ шIэныгъэм ылъэныкъокIэ гъэхъагъэу ашIыгъэхэр зэхахьэмэ ахэлажьэхэрэм къафаIуатэ.

ШIэныгъэм иушэтакIохэм Iофтхьабзэм хэлажьэрэмэ къафаIуатэ непэрэ урысые шIэныгъэлэжьхэр нейробиологием, космонавтикэм, медицинэм, IT-м, экологием, тарихъым ыкIи педагогикэм алъэныкъокIэ зыпылъхэр. Мастер-классхэр, батлэхэр, квизэхэр, лекциехэр, арт-лабораториехэр къызфагъэфедэхэзэ къядэIухэрэр щагъэгъуазэх урысые шIэныгъэлэжьхэм квантовэ технологиехэм ыкIи нейросетьхэм алъэныкъокIэ IофшIагъэу яIэхэм, «гъонэ шIуцIэхэу» ауплъэкIугъэхэм, археологическэ экспедициехэм. Я 21-рэ лIэшIэгъум гъэхъагъэу щашIыгъэхэм шъхьафэу лъэтегъэуцо фашIыщт.

Республикэм иапшъэрэ еджапIэмэ якIэлэегъаджэхэр, шIэныгъэлэжь ныбжьыкIэхэр, профессорскэ-кIэлэегъэджэ купхэр Урысые обществэу «ШIэныгъэм» илекторхэу ыкIи изещакIохэу щытыгъэх.

МКъТУ-м иполитехническэ колледж щеджэхэрэр гъэсэныгъэ Iофтхьабзэу «Наукэм убзылъфыгъэу ухэтыныр къины, ау ар пфэгъэхъущт. Бзылъфыгъэхэр наукэм хэтхэу: тарихъ ыкIи гендернэ аспектхэр» зыфиIорэм хэлэжьагъэх. Лекциер зэрищагъ техническэ шIэныгъэхэмкIэ кандидатэу, шIэныгъэлэжь ныбжьыкIэу, Урысые обществэу «ШIэныгъэм» изещакIоу Iэшъынэ Анжеликэ.

Ащ фэшъхьафэу, индустриальнэ техникумым щеджэхэрэм апае лекциеу «Надёжные и гибкие распределительные сети» зыфиIорэм къеджагъ МКъТУ-м ичIыдагъэ-газовэ Iофым икафедрэ идоцентэу, Урысые обществэу «ШIэныгъэм» и Адыгэ шъолъыр къутамэ хэтэу Николай Старковыр.

ШIэныгъэм и Мафэ фэгъэхьыгъэ гъэсэныгъэ лекциехэр Урысые обществэу «ШIэныгъэм» и Адыгэ шъолъыр къутамэ республикэм инэмыкI чIыпIэхэми ащырегъэкIокIы.