Проектхэм хэхъоныгъэхэр ягъэшIыгъэнымкIэ ыкIи социальнэ сферэмкIэ экспертэу, гуфэкIо гупчэмэ я Ассоциацие и Совет итхьаматэ игуадзэу, социальнэ франшизэу «ШIур.Гупчэр» зыфиIорэм ыкIи программэу «Обучение служением» зыфиIорэм якураторэу Алина Яшинар МКъТУ-м и «Точка кипение» щаIукIагъ апшъэрэ классхэм ащеджэрэ кIэлэеджакIохэм, студентхэм ыкIи социальнэ проектхэр зыгъэпсырэ ныбжьыкIэ командэхэм.

ЗэIукIэм изещэкIуагъэр МКъТУ-м и «Точка кипение» ипрограммнэ Iэшъхьэтетэу, зэнэкъокъоу «Уигухэлъ къыздэгъэхъу» зыфиIорэм ипащэу Светлана Новиковар ары.

ИлъэсипшIым къехъугъ Алина Яшинар социальнэ сферэм зыхэтыр, проектхэр ыкIи программэхэр зигъэIорышIэхэрэр, проектыкIэхэу апэрэу атIупщыгъэхэри ахэтхэу, ахэм якомандэхэм зяпащэр. Къэралыгъо секторэу лъэгэпIэ зэфэшъхьафхэм (муниципальнэхэм, шъолъырхэм, федеральнэхэм) атетхэм Iоф адешIэ, джащ фэдэу кIэлэегъэджэ IофшIэнымкIи опыт иI, Санкт-Петербург иапшъэрэ еджапIэхэм социальнэ проектированием ылъэныкъокIэ щырегъаджэх.

Студентхэмрэ кIэлэеджакIохэмрэ апае агъэцакIэрэ социальнэ проектхэу мэхьанэшхо зиIэхэм экспертыр къатегущыIагъ. ГукъэкIхэу проектхэм апае агъэфедэхэрэр къыздахыщтхэм, зэнэкъокъухэу ыкIи программэхэу командэхэр зыхэлажьэхэмэ нахьышIур игъэкIотыгъэу ащ къыIотагъэх.

Мы Iофтхьабзэр зэнэкъокъоу «Уигухэлъ къыздэгъэхъу» зыфиIорэ купым къыщагъэлъэгъуагъ. Ащ ишIуагъэкIэ экспертым едэIугъэх Иркутскэ, Новосибирскэ, Сургут, Тула, Ростов-на-Дону, Черкизовэ, Севастополь, Ярославль, Троицкэ ыкIи Луганскэ ащыщхэу зэхахьэм хэлэжьагъэхэр.

ЗэIукIэм ухэлэжьэныр — ар командэмэ социальнэ проект лъэшхэр зэхагъэуцонхэмкIэ, гукъэкIыкIэхэр зэрагъэгъотынхэмкIэ, экспертхэм нэIуасэ афэхъунхэмкIэ ыкIи ахэр къыздырагъэIэнхэмкIэ амалышIу.