Дзэ гъэсэныгъэ гупчэр — МКъТУ-м хэхьэрэ подразделений, студентхэр дзэм фэгъэхьазырыгъэнхэм ипрограммэ егъэцакIэ, дзэ къулыкъум ишапхъэхэм щагъасэх, дзэ-патриотическэ пIуныгъэм щыпылъых ыкIи авиационнэ специалистхэр щагъэхьазырых.

Урысые Федерацием иунашъоу 186-у щылэ мазэм и 31-м 2024-рэ илъэсым къыдэкIыгъэм елъытыгъэу, Дзэ гъэсэныгъэ гупчэ Мыекъопэ къэралыгъо технологическэ университетым къыщызэIуахынэу тыраубытагъ.

Хэгъэгум ишъолъыр 82-у дзэм фэгъэсэгъэнхэм игупчэ 137-рэ зыщагъэпсыщтхэм Адыгеир зэу ащыщ хъугъэ. Непэрэ мафэм ехъулIэу апшъэрэ еджапIэхэм дзэ гъэсэныгъэ гупчэ 120-рэ ащэлажьэ—ахэмэ нэбгрэ мин 57-рэ ащырагъаджэ.

Урысыер къэухъумэгъэнымкIэ и Министерствэ ягъусэгъоу ыкIи АР-м и ЛIышъхьэу КъумпIыл Мурат яIэпыIэгъоу Дзэ гъэсэныгъэ гупчэр апшъэрэ еджапIэм къыщызэIухыгъэным 2023-рэ илъэсым игъэтхапэ мазэ къыщегъэжьагъэу ыуж итыгъэх. Урысыем и Ошъогу-космическэ кIуачIэхэр ары студентхэр дзэм фэгъэхьазырыгъэнхэм икIэщакIор.

Тхьамафэм «зы дзэ мафэ» къафыхагъэкIызэ, егъэджэн шъхьаIэу университетым щыряIэм къыпамыщыхэу, Дзэ гъэсэныгъэ гупчэм студентхэр щырагъэджэщтых, дзэ-учетнэ сэнэхьатхэр щарагъэгъотыщт. ИлъэситIум телъытэгъэ программэм сержантхэмрэ рядовойхэмрэ къытIупщыщтых (запасым хатхэщтых). Мыщ фэдэ сэнэхьатхэри гупчэм къытыщтых: «Механик шъхьаIэу планерыр ыкIи пилот зэрымыс быбырэ аппаратхэр зыгъэпсэолъэшъущтхэр ыкIи зыгъэцэкIэжьышъущтхэр», «Пилот зэрымыс быбырэ аппаратхэм яоператор шъхьаIэхэр». 

Дзэ гъэсэныгъэ гупчэр Мыекъопэ къэралыгъо технологическэ университетым къызэрэщызэIуахыгъэм фэгъэхьыгъэ зэхэсыгъохэр апшъэрэ еджапIэм щыкIуагъэх, IофшIэнхэр зэрэзэхэщэгъэщтхэм атегущыIагъэх, 1-3-рэ курсмэ ащеджэхэрэмэ зэIукIэхэр адашIыгъэх. Дзэм фэгъэхьазырыгъэнхэм ипрограммэ къыдилъытэрэ Iофыгъохэм студентхэр нэIуасэ фашIыгъэх.

Мы охътэ благъэм Дзэ гъэсэныгъэ гупчэм щырагъэджэщтхэр апэрэ ыкIи ятIонэрэ курсхэм арыс студентхэм къахахыщтых. Зэнэкъокъу шIыкIэм тетэу а Iофыгъор рагъэкIокIыщт. Егъэджэн процессыр 2024-рэ илъэсым иIоныгъо мазэ и 1-м рагъэжьэщт, ащ ехъулIэу студент нэбгри 100-м ехъу аштэщт, ахэр ары апшъэрэ еджапIэм икурсантыщтхэр.