Волгоград дэт политехническэ колледжэу В.И. Вернандскэм ыцIэ зыхьырэм апэрэ экспертнэ сессиеу щыкIуагъэм къыдыхэлъытагъэу гъэсэныгъэ кластерхэу гурыт профессиональнэ гъэсэныгъэм хахьэхэрэм якомандэхэм ыкIи гъэсэныгъэ-производственнэ кластерищэу Темыр-Кавказскэ ыкIи Къыблэ федеральнэ шъолъырхэм, джащ фэдэу Луганскэ ыкIи Донецкэ народнэ республикэхэм яехэм зыкъыщагъэлъэгъуагъ.

Урысыем гъэсэныгъэмкIэ и Министерствэ гурыт профессиональнэ гъэсэныгъэм ыкIи профессиональнэ егъэджэным афэгъэзэгъэ къэралыгъо политикэм и Департамент ипащэ игуадзэу Маргарита Скворцовам зэIукIэм хэлажьэрэмэ закъыфигъэзагъ ыкIи хигъэунэфыкIыгъ колледжхэмрэ техникумхэмрэ ащагъэхьазыррэ специалистхэм федеральнэ хабзэми, шъолъырым щыIэхэми нахь лъэшэу анаIэ атырагъэты зэрэхъугъэр.

Адыгэ Республикэм игъэсэныгъэ медицинэ кластерыр къэзгъэлъэгъуагъэхэр: гъэсэныгъэмрэ ыкIи шIэныгъэмрэкIэ АР-м иминистрэ ипшъэрылъхэр зыгъэцакIэхэрэ Евгений Лебедевыр, МКъТУ-м хэхьэрэ политехническэ колледжым ипащэу ХъутIыжъ Заурбэч, АР-м псауныгъэм икъэухъумэнкIэ иминистерствэ илIыкIохэр, гурыт профессиональнэ гъэсэныгъэ зиIэ специалистхэм ягъэхьазырынрэ кадрэ IофхэмрэкIэ пшъэдэкIыжь зыхьэу, Мыекъопэ медицинскэ колледжым ипащэу Алексей Самоквитовыр, гъэсэныгъэмрэ ыкIи шIэныгъэмрэкIэ АР-м и Министерствэ шIэныгъэмкIэ, профессиональнэ гъэсэныгъэмкIэ ыкIи дунэе зэдэлэжьэгъэнымкIэ иотдел ипащэу Емзэщ Марин. 

Зэхэт докладэу ХъутIыжъ Заурбэчрэ Алексей Самоквитовымрэ къашIыгъэм кластерым ипрограммэ къыщагъэлъэгъуагъ, ар Урысыем гъэсэныгъэмкIэ и Министерствэ иэкпертнэ комиссие ыпашъхьэ къыралъхьагъ. Федеральнэ программэу «Профессионалитетым» къыдыхэлъытагъэу республикэм щырагъэкIокIыгъэ Iофтхьабзэхэм ыкIи зэхащэнэу рахъухьэхэрэм ахэр къатегущыIагъэх. Кластерым ипрограммэ дэгъу дэдэу ухъумагъэ хъугъэ, докладэу къашIыгъэр агу зэрэрихьыгъэр экспертмэ къыхагъэщыгъ.

Ащ фэшъхьафэу, Сталинградскэ заом ТекIоныгъэ къызщыдахыгъэ илъэсэу зэрэщытыр къыдалъыти, Адыгэ Республикэм икIыгъэ лIыкIомэ Мамаев Iуашъхьэр зэрагъэлъэгъугъ.

— Мэзаем и 2-м, Сталинградскэ заом ТекIоныгъэ къызщыдахыгъэ илъэсым, нэмыкI шъолъырмэ къарыкIыгъэ тиIофшIэгъухэр тигъусэхэу къэгъагъэхэр Дзэ щытхъум и Зал кIэрытлъхьагъэх. Мыщ фэдэ Iофтхьабзэмэ уахэлэжьэным мэхьанэшхо иIэу сэлъытэ, титарихъи тэухъумэ, тишъхьафитныгъэ пае зищыIэныгъэ зытыгъэмэ яшIэжьи тэгъэлъапIэ,—игупшысэхэмкIэ къыддэгощагъ ХъутIыжъ Заурбэч.