Мыекъопэ къэралыгъо технологическэ университетым хэхъоныгъэхэр егъэшIыгъэнхэмкIэ Программэу щыIэм игъэцэкIэн къыдыхэлъытагъэу Iофтхьабзэхэр рахъухьагъэх, ахэр университетым мэкъу-мэщымкIэ ШIэныгъэ-ушэтэкIо институтыр къызэрэхагъэхьажьыгъэм фэшI агъэнэфагъэх.

Мэкъу-мэщ технологиехэм яфакультетрэ фармацевтическэ факультетымрэ ялIыкIохэр зыхэхьэхэрэ рабочэ купым изэхэсыгъо непэ щыIагъ, зэхэт проектэу «Аптекарскэ хатэм» зыфиIорэр зэрагъэцэкIэщт гъогу картэм тегущыIагъэх.

Проектым пшъэрылъэу иIэр прянэ-ароматическэ ыкIи эфирнэ дагъэ къызпыкIырэ уцхэр къызщыкIырэ чIыпIэхэу агротехнологиехэр зыщагъэфедэн алъэкIыщтхэр къыхэгъэщыгъэнхэр, «Аптекарскэ хатэр» МКъТУ-м мэкъу-мэщымкIэ и ШIэныгъэ-ушэтэкIо институт ибазэ щыгъэпсыгъэныр ары.

Проектыр гъэцэкIэгъэным пае рабочэ купым мыщ фэдэ пшъэрылъхэр къыгъэнэфагъэх:

1.Ресурснэ базэр къыхэгъэщыгъэным фэшI, чIыгу-чIыпIэ амалхэр зыфэдэхэм уасэ афэшIыгъэныр .

2.Анатомэ-морфологическэ ыкIи фитохимическэ зытетыр зэгъэшIэгъэныр, Iэлыуцхэу МКъТУ-м хэхьэрэ мэкъу-мэщымкIэ ШIэныгъэ-ушэтэкIо институтым ишъолъыр къыщыкIыхэрэм ящынэгъончъагъэ гъэунэфыгъэныр.

3.Прянэ-ароматическэ ыкIи эфирнэ дагъэ къызпыкIырэ уцхэр зыфэдэхэр гъэунэфыгъэнхэр, ахэмэ тапэкIэ яшIушIэгъэныр.

4.Проектэу «Аптекарскэ хатэм» изэхэгъэуцон ыкIи ащ игъэпсын.

5.Прянэ-ароматическэ ыкIи эфирнэ дагъэ къызпыкIырэ уцхэм адэлэжьэгъэнымкIэ технологием иэлементхэр гъэунэфыгъэнхэр ыкIи промышленнэ лъапсэм техьэгъэныр.

6.Прянэ-ароматическэ ыкIи эфирнэ дагъэ къэзытырэ уцмэ шапхъэу щыIэхэм адиштэрэ сырье дэгъу дэдэ ахэшIыкIыгъэныр.

7.Прянэ-ароматическэ ыкIи эфирнэ дагъэ къэзытырэ уцмэ къахахырэ сырьем ищынэгъончъагъэ гъэнэфэгъэныр, анатомэ-морфологическэ ыкIи фитохимическэ зытетэу ащ иIэр зэгъэшIэгъэныр.

8.Гъомлапхъэ ыкIи къызщыдагъэкIыжьрэ хъызмэтшIапIэхэм, парфюмернэ-косметическэ, фармацевтическэ промышленностым къэкIырэмэ къахахырэ сырьер ащыIугъэкIыгъэныр.

9.Мэкъу-мэщым пылъ хъызмэтшIапIэхэу Темыр-КъохьэпIэ Кавказым икъыблэ-къушъхьапэ чIыпIэхэм ащылажьэхэрэм прянэ-ароматическэ ыкIи эфирнэ дагъэ къызпыкIырэ уцхэр къагъэкIынхэмкIэ IэубытыпIэ ашIыщт тхылъхэр афэгъэхьазырыгъэнхэр.

Проектэу «Аптекарскэ хатэр» агъэцакIэфэ шIэныгъэм ыкIи творчествэм алъэныкъокIэ зэдэлэжьэнхэу зэзэгъыныгъэхэр адашIыщтых шIэныгъэхэмкIэ Федеральнэ къэралыгъо бюджетнэ учреждениеу «Мэкъу-мэщымкIэ Къырым и ШIэныгъэ ушэтэкIо институтрэ» ФГБНУ ВИЛАР ФГБНУ «Iэзэгъу ыкIи ароматическэ уцхэм я Урысые шIэныгъэ-ушэтэкIо институтым» и Темыр-Кавказскэ къутамэрэ.