Мыекъопэ къэралыгъо технологическэ университетым Урысые обществэм иобщественнэ организациеу «ШIэныгъ» зыфиIорэм зэхэсыгъо щыригъэкIокIыгъ, ащ зэхэгущыIэжь органэу Адыгэ Республикэм и ЛIышъхьэу КъумпIыл Мурат зипащэр щызэхащагъ.

Урысые обществэу «ШIэныгъэм» шъолъыр отделениехэм ыкIи къутамэхэм лъэшэу ынаIэ атырегъэты, ар анахь гъэсэныгъэ организацие инэу хэгъэгум щалъытэ, Iофтхьабзэ гъэшIэгъоныбэ зэхещэ.

ЛъыплъэкIо советхэр шъолъырмэ зыкIащызэхащэхэрэр шъолъыр къутамэхэм къэралыгъомрэ обществэмрэ зэдеIэжьхэзэ шIэныгъэ, культурнэ ыкIи гъэсэныгъэ амалхэр цIыфхэм апагъохышъунхэм фэшI. Мыщ фэдэ ЛъыплъэкIо советхэу тихэгъэгу щызэхащагъэхэмкIэ Адыгеир я 57-рэ, Къыблэ федеральнэ округымкIэ ятIонэрэ хъугъэ.

Зэхэсыгъом ЛъыплъэкIо советым итхьаматэ игуадзэхэр щыхадзыгъэх —АР-м иминистрэхэм я Кабинет и Тхьаматэу КIэрэщэ Анзауррэ АР-м и ЛIышъхьэрэ минист­рэхэм я Кабинетрэ я Адми­нистрацие ипащэу Владимир Свеженецрэ.

— «Урысые обществэу «ШIэныгъэм» гъэсэныгъэ Iофышхо ыпшъэ релъхьажьы. Сицыхьэ телъ, ЛъыплъэкIо советэу республикэм щызэхэщагъэ хъугъэм шъолъыр къутамэм нахь амалышхохэр къыритыщтых, Адыгэ Республикэм щыпсэурэ цIыфхэр шIэныгъэ, гъэсэныгъэ ыкIи культурнэ щыIакIэм къыфищэщтых», — къыхигъэщыгъ Владимир Свеженец. 

Iофтхьабзэм къыхэлэжьагъэх Обществэу «ШIэныгъэм» игенеральнэ пащэ игуадзэу Георгий Буднэр, Къыблэ федеральнэ шъолъырым хэхъоныгъэ егъэшIыгъэнымкIэ и ГъэIорышIапIэ ипащэу Александр Шматько, республикэ правительствэм хэтхэр, шIэныгъэ ыкIи гъэсэныгъэ сообществэм илIыкIохэр.

— «ЛъыплъэкIо советым игъэпсын – ар джыри зы шэпхъэ лъагэу къэралыгъомрэ гражданскэ обществэмрэ зэрэзэдеIэжьхэрэм ишыхьатэу щыт, шIэныгъэ, культурнэ ыкIи гъэсэныгъэ амалыкIэхэр цIыфхэм ятыгъэным фэIорышIэ. Тэ пшъэрылъышхохэр зыфэтэгъэуцужьых, апэрэр – лекторхэм ягъэхьазырын, Урысые обществэу «ШIэныгъэм» илектор куп ренэу къащэтхъух. Лектор лъэшхэр тиIэхэ хъумэ, къытэдэIущтхэри нахьыбэ хъущтых. ЯтIонэрэ пшъэрылъыр – шIэныгъэу цIыфмэ къафэтхьын тлъэкIыщтым зедгъэушъомбгъуныр ары. Гъэхъагъэу тиIэхэр нахьыбэмэ зэралъыдгъэIэсыщтхэм тыпылъын фае. «Урысые обществэу «ШIэныгъэм» и Адыгэ шъолъыр къутамэ инепэрэ Общественнэ зэхэсыгъо упчIэ шъхьаIэу иIэр — ар ЛъыплъэкIо советымрэ ащ хэтыщтхэмрэ хэдзыгъэнхэр ары. Административнэ органыр гъэнэфэгъахэ. Шъолъыр правительствэм иминистрэхэр ыкIи Адыгэ Республикэм ицIыф пэрытхэр ащ хэхьагъэх», — къыIотагъ Александр Шматько, Къыблэ федеральнэ шъолъырым хэхъоныгъэ егъэшIыгъэнымкIэ и ГъэIорышIапIэ ипащэ. 

ЛъыплъэкIо советыр зэхэгущыIэжь органэу щыт, ащ ипшъэрылъыр къэралыгъо хабзэр ыкIи чIыпIэ зыгъэIорышIэжьыным иорганхэр, общественнэ объединениехэр, шIэныгъэ, гъэсэныгъэ ыкIи нэмыкI организациехэр зэдэгъэлэжьэгъэнхэр ыкIи гъэсэныгъэ Iофым хэхъоныгъэхэр егъэшIыгъэнхэм фэгъэIорышIэгъэныр. 

Джащ фэдэу зэхэсыгъом щырахъухьагъ Адыгэ Республикэм Урысые обществэу «ШIэныгъэм» ишъолъыр къутамэ дэлэжьэщт уполномоченнэхэм я Институт щызэхащэнэу, ащ иIофшIэн гъэсэныгъэ Iофыр республикэм имуниципалитетхэм щылъагъэкIотэщт.

— «Адыгэ Республикэм ишъолъыр къутамэ адрэхэм зэратекIырэр проектхэм ягъэцэкIэнкIэ екIолIэкIэ шъхьаф зэряIэр ары. Лекторхэр цIыф куп зэфэшъхьафмэ адэлажьэх, гъэсэныгъэ Iофтхьабзэхэр зэхащэх. Сицыхьэ телъ, ЛъыплъэкIо советым ишIуагъэкIэ республикэм иорганизацие ыпэкIэ лъыкIотэщт», — къыхигъэщыгъ Урысые обществэу «ШIэныгъэм» игенеральнэ пащэ игуадзэу Георгий Буднэм.

Урысые Федерацием и Президентэу Владимир Путиным лъэпкъ пшъэрылъэу къэралыгъом къыщигъэнэфагъэмэ ялъытыгъэу Урысые обществэу «ШIэныгъэм» Iофтхьабзэ зэфэшъхьафыбэ регъэкIокIы, ахэмэ яшIуагъэкIэ шIэныгъэм, культурэм, тарихъым, псауныгъэм икъэухъумэн, экологием ыкIи нэмыкI лъэныкъохэмкIэ гъэхъагъэу ашIыгъэхэм цIыфхэр ащэгъуазэх.