Мыекъопэ къэралыгъо технологическэ университетым 2024-2025-рэ еджэгъу илъэсхэм ателъытэгъэ бюджетнэ чIыпIэхэр гъорекIорэм къыщымыкIэу къыгъэнэжьыгъэх
Гъэсэныгъэмрэ шIэныгъэмрэкIэ Урысыем и Министерствэ бюджетнэ чIыпIэхэр апшъэрэ еджапIэхэм ыкIи шIэныгъэ организациехэм атегощэгъэнхэмкIэ зэIухыгъэ зэнэкъокъоу 2024-2025-рэ илъэсхэм ателъытагъэм зэфэхьысыжьхэр фишIыгъэх. Мыекъопэ къэралыгъо технологическэ университетым 2024-2025-рэ еджэгъу илъэсхэм ателъытагъэу бюджетнэ чIыпIэ 1126-рэ къыратыгъ.
Ащ елъытыгъэу, тиапшъэрэ еджапIэ учIэхьанымкIэ гъорекIорэ пчъагъэу иIагъэхэр къэнэжьыгъэх, ау гъэсэныгъэ программэ зэфэшъхьафхэмкIэ чIыпIэ пчъагъэу яIэщтхэр зэблэхъугъэ хъугъэх. Непэрэ экономикэм къыгъэнэфэрэ шапхъэхэм планыр адештэ. Ащ фэшI, 2023-рэ илъэсым бюджетнэ чIыпIэхэр апшъэрэ еджапIэмэ атегощэгъэнымкIэ зэнэкъокъур нахь кIасэу рагъэкIокIыгъ. Кадрэу ящыкIагъэхэр къызщагъэнэфэщт пIалъэмрэ чIэхьэгъу пчъагъэхэу апшъэрэ еджапIэхэм атырагуащэрэр къызщыхагъэщырэмрэ зэрагъэкIэкIыгъэм ишIуагъэкIэ, анахьэу зыфэныкъохэр къыхэщыгъэх.
Мыекъопэ къэралыгъо технологическэ университетым къыфагъэнэфэгъэ бюджетнэ чIыпIэхэр нахьыбэрэмкIэ зытырагощагъэхэр инженернэ, техническэ ыкIи медицинэ лъэныкъохэр ары. Джащ фэдэу анаIэ тырагъэтыгъ цифрэ экономикэм фэгъэзэгъэ кадрэхэм ягъэхьазырын. Непэрэ бэдзэрыр анахьэу зыщыкIэрэр инновационнэ IT Iофыгъохэр, импортыр зэрэзэблахъурэ цифрэ Iэмэ-псымэхэр ыкIи ахэм ягъэцэкIэн ары. Ахэмэ якадрэхэр гъэхьазырыгъэным телъытэгъэ бюджетнэ чIыпIэхэр бакалавриатыми, специалитетыми, магистратурэми къафыхахыгъэх.
Апэрэу бюджетнэ чIыпIэхэр къаратыгъэх ординатурэм исэнэхьатыкIэхэм, анестезиолог-реаниматологхэм ыкIи оториноларингологием, ахэмкIэ 2022-2023-рэ илъэсхэм Мыекъопэ технологическэ университетым щытхъу пылъэу лицензированиер ыкIугъагъ.
Пчъагъэу агъэнэфагъэм щыщэу чIыпIэ 515-рэ бакалавриатым ипрограммэ ратыгъ, специалитетым ипрограммэ – чIыпIэ 188-рэ, чIыпIэ 98-рэ - магистратурэм, ординатурэм ипрограммэ – чIыпIэ 23-рэ, чIыпIи 7–аспирантурэм ишIэныгъэ сэнэхьатхэм. Гурыт профессиональнэ гъэсэныгъэм ипрограммэхэм чыпIэ 295-рэ аратыгъ, ащ щыщэу 30-р медицинэ сэнэхьатхэм апай.
Бюджетнэ чIыпIэ пчъагъэу 2024-2025-рэ еджэгъу илъэсхэм ателъытагъэхэу бакалавриатым, специалитетым ыкIи магистратурэм игъэсэныгъэ программэхэм апае къагъэнэфагъэхэр щылэ мазэм и 20-м нэс хэушъхьафыкIыгъэ сайтым къыщыхаутыщтых. Апшъэрэ еджапIэм чIэхьэгъэнымкIэ ищыкIэгъэщт документхэм яштэн мэзае мазэм и 1-м къыщегъэжьагъэу аублэщт.
ШIэныгъэмрэ ыкIи апшъэрэ гъэсэныгъэмрэкIэ Урысыем и Министерствэ 2024-2025-рэ еджэгъу илъэсхэм бюджетнэ чIыпIэ мин 620,5-рэ апшъэрэ еджапIэмэ зэкIэмэ атырилъытагъ. Министерствэм къызэрэщыхагъэщыгъэмкIэ, ащ ипроцент 70-р шъолъырхэм арыт гъэсэныгъэ организациехэм аратыгъ.