ШIэныгъэлэжь советыр
Мы тхьэмафэу икIыгъэм Мыекъопэ къэралыгъо технологическэ университетым ишIэныгъэлэжь совет изэхэсыгъо щыкIуагъ, ар зэрищагъ университетым иректорэу Къуижъ Саидэ.
Хабзэ зэрэхъугъэу, повесткэ шъхьаIэм тегущыIэнхэм ыпэкIэ, университетым ипрофессор-кIэлэегъэджэ купым щыщхэу зимэфэкI мафэхэр хэзгъэунэфыкIыгъэхэм Къуижъ Саидэ Казбек ыпхъур афэгушIуагъ.
УпчIэ шъхьаIэу «Апшъэрэ гъэсэныгъэмкIэ федеральнэ къэралыгъо бюджет гъэсэныгъэ учреждениеу «Мыекъопэ къэралыгъо технологическэ университетым» иректор хэдзыгъэнымкIэ Комиссием хэхьахэрэм зэхъокIыныгъэхэр афэшIыгъэнхэр» зыфиIорэмкIэ ректорэу Къуижъ Саидэ къэгущыIагъ. МКъТУ-м ишIэныгъэлэжь совет хахьэхэрэр ащ зэрэщигъэгъозагъэхэмкIэ, Комиссием хэтэу, технологическэ факультетым идеканэу Шъхьэлэхъо Анзаур ректор IэнатIэм IухьанымкIэ икандидатурэ къызэрагъэлъагъорэм фэшI, МКъТУ-м иректор хэдзыгъэнымкIэ Комиссием ар хагъэкIы. ШIэныгъэлэжь советым унашъоу ышIыгъэм тетэу, Комиссием хагъэхьагъ экологиемкIэ факультетым идеканэу Галина Коноваловар.
Нэужым упчIэхэу «Апшъэрэ гъэсэныгъэмкIэ федеральнэ къэралыгъо бюджет гъэсэныгъэ учреждениеу «Мыекъопэ къэралыгъо технологическэ университетым» игурыт профессиональнэ гъэсэныгъэ программэм елъытыгъэу еджэхэрэр чIэгъэкIыгъэнхэм, чIэгъэхьажьыгъэнхэм ыкIи нэмыкI чIыпIэ гъэкIожьыгъэнхэм», «МКъТУ-м и Политехническэ колледж ыкIи МКъТУ-м икъутамэ Политехническэ колледжэу поселкэу Яблоновскэм щыIэм сэнэхьатыкIэхэр къащызэIухыгъэнхэр» зыфиIохэрэм атегущыIагъэх. Джащ фэдэу, «2024-рэ илъэсым лэжьэщт Къэралыгъо УшэтэкIо Комиссием итхьаматэ зэблэхъугъэнымкIэ кандидатурэр къэгъэлъэгъогъэныр» зыфиIорэ упчIэм фэгъэхьыгъэ доклад къышIыгъ МКъТУ-м егъэджэн IофшIэнымкIэ ипроректорэу Людмила Задорожнаям.
МКъТУ-м и Политехническэ колледж ыкIи МКъТУ-м икъутамэ Политехническэ колледжэу поселкэу Яблоновскэм щыIэм сэнэхьатыкIэхэр гурыт профессиональнэ гъэсэныгъэм къыщызэIухыгъэнхэр зыпкъ къикIырэр гъэсэныгъэ программэу агъэцакIэхэрэм зэхъокIыныгъэхэр зэрафэхъугъэхэр ары. КолледжитIумэ мыщ фэдэ сэнэхьатхэр къащызэIуахыгъэх: 23.02.07 Автотранспортым техническэу лъыплъэгъэныр ыкIи гъэцэкIэжьыгъэныр; 35.02.18 Пхъэр къыдэгъэкIыжьыгъэным итехнологие; 38.02.08 Сатыу Iофыр.