Адыгеим истудент-медикхэм дунаимкIэ анахьыжъэу щыт медицинэ университетым зыщаушэтын алъэкIыщт
ЗэрэзэдэлэжьэщтхэмкIэ лъэныкъуищ хъурэ зэзэгъыныгъэм Мыекъопэ къэралыгъо технологическэ университетыр дыкIэтхагъ Санкт-Петербургскэ къэралыгъо педиатрическэ медицинэ университетым.
Документым аIапэхэр кIэзыдзагъэхэр: Санкт-Петербургскэ къэралыгъо педиатрическэ медицинэ университетым иректорэу Дмитрий Ивановыр, псауныгъэр къэухъумэгъэнымкIэ Адыгэ Республикэм иминистрэу Мэрэтыкъо Рустем ыкIи МКъТУ-м иректорэу Къуижъ Саид.
Зэзэгъыныгъэм къыделъытэ Адыгеим пае кадрэхэр гъэхьазырыгъэнхэр, Санкт-Петербургскэ къэралыгъо педиатрическэ медицинэ университетым ишIэныгъэлэжь-кIэлэегъэджэ купыр МКъТУ-м и Мединститут игъэсэныгъэ ыкIи ишIэныгъэ процессхэм къахэгъэлэжьэгъэныр. Документым джащ фэдэу зэрэратхагъэмкIэ, МКъТУ-м ипедиатрическэ факультет истудентхэм педиатрическэ IэзапIэ шIагъоу Педиатрическэ университетым хахьэрэм зыщаушэтын алъэкIыщт. Ащ ишIуагъэкIэ сэнэхьатыр зэзгъэгъотырэмэ апшъэрэ технологичнэ ыкIи непэрэ медицинэ шэпхъэшIухэу педиатрием иIэхэр зэрагъэшIэщтых.
Санкт-Петербургскэ къэралыгъо педиатрическэ медицинэ университетыр загъэпсыгъэр илъэс 99-рэ зыщыхъугъэ мафэхэм атефэу зэзэгъыныгъэм кIэтхагъэх. Зэрэзэдэлажьэхэрэм ыкIи IэпыIэгъу къазэрэфэхъурэм пае Къуижъ Саидэ университетым иректор тхьаегъэпсэу риIуагъ, апшъэрэ еджапIэм щылажьэхэрэм ямэфэкIыкIэ афэгушIуагъ.
Педиатрическэ университетыр — апшъэрэ педиатрическэ еджэпIэ анахьыжъэу дунаимкIэ щыт. Ащ щеджэрэ студентхэмрэ кIэлэегъаджэхэмрэ урысые ыкIи дунэе зэнэкъокъухэм ялауреатых, премиехэр къафагъэшъошагъэх.
КIэлэцIыкIу клиническэ сымэджэщэу Санкт-Петербургскэ къэралыгъо педиатрическэ медицинэ университетым хахьэрэр федеральнэ медицинэ IофшIапIэу игъэкIотыгъэ шIэныгъэ лъапсэ зиIэу гъэпсыгъэ. Сымэджэщым щылажьэрэ врачмэ технологиякIэхэр яIофшIэн хагъахьэх. Апшъэрэ еджапIэм кафедрэ 60, отделение 50 хэт. Гъэ къэс ащ щылажьэхэрэм операцие мин 15 щашIы.