«ГъэсакIом исыхьат» зыфиIорэ проектыр МКъТУ-м щызэфашIыжьыгъ
Мыекъопэ къэралыгъо технологическэ университетым проектэу «ГъэсакIом исыхьат» зыфиIорэм изэфэшIыжьын фэгъэхьыгъэ Iофтхьабзэ щыкIуагъ, ныбжьыкIэ проектхэм я Урысые зэнэкъокъоу «Россмолодежь гранты: Микрогранты» зыфиIорэр ащ IэпыIэгъу къыфэхъугъагъ.
НыбжьыкIэ IофхэмкIэ Адыгэ Республикэм и Комитет итхьаматэу Сергей Галушкинымрэ Мыекъопэ къэралыгъо технологическэ университетым ныбжьыкIэ политикэмкIэ ипроректорэу БрантIэ Муратрэ шIуфэс гущыIэхэмкIэ Iофтхьабзэм хэлажьэрэмэ закъыфагъэзагъ.
Проектым къыдыхэлъытагъэу студенческэ гъэсакIохэм ясистемэ дэгъоу зэтырагъэпсыхьагъ, апэрэ курсым къычIэхьагъэхэ нэбгрэ 1100-рэ еджэным хагъэгъозагъэх. Ахэр бакалавриатымрэ специалитетымрэ япрограммэхэмкIэ факультети 10-мэ ащеджэх. ГъэсакIохэм яIофшIэн мыщ фэдэ лъэныкъохэмкIэ агъэцэкIагъ: апэрэ курсым къычIэхьагъэхэр апшъэрэ еджапIэм ищыIакIэ хэгъэгъозэгъэнхэр, гъэсакIохэм ясистемэ ыкIи зэкIэлъыкIокIэ хабзэр студенческэ зыгъэIорышIэжьыным хэлъхьэгъэныр, IэкIыбым къикIыгъэ студентхэр джащ фэдэу апшъэрэ еджапIэм ищыIакIэ хэгъэгъозэгъэнхэр, еджапIэм щеджэрэ студентмэ ашъхьэкIэ хэхъоныгъэ ашIышъуным къыфэщэгъэнхэр.
ГъэсакIомэ якорпус Мыекъопэ къэралыгъо технологическэ университетым зыщатIупщыгъэр 2022-рэ илъэсыр ары. Я 2-6-рэ курсмэ ащеджэхэрэ студент нэбгрэ 16-мэ гъэсэкIо сэнэхьатыр агъэцэкIагъ, апэрэ курсым иакадемическэ купмэ афэсакъыгъэх. Илъэс IофшIэным зэфэхьысыжьышIухэр къыдэкIуагъэх: факультетипшIымэ гъэсакIо 73-рэ къахэкIыгъ, апэрэ курсым щеджэхэрэ студент 350-рэ апшъэрэ еджапIэм иIофыгъохэм чанэу ахагъэлэжьагъэх, 2023-2024-рэ еджэгъу илъэсым иапэрэ семестрэм къыкIоцI апэрэ курсым щеджэрэмэ зэIукIи 116-рэ адыряIагъ, деканатмэ апшъэ дэлъыгъэ Iофыр нахь макIэ ашIышъугъ, академическэ куп 41-рэ зэлъаубытыгъ, апэрэ курсым щеджэрэмэ ямафэхэр щытхъу пылъэу рагъэкIокIыгъэх, къалэм щымыщ студентмэ экскурсиехэмрэ зэхэт зэIукIэхэмрэ афызахащагъэх.
Ахэм афэшъхьафэу, зэфэшъхьаф форумхэм ыкIи Iофтхьабзэхэм гъэсакIомэ якорпус ахэлэжьагъ, шъолъыр форумэу «О уикIогъу» зыфиIорэр ахэм зэу ащыщ, студент 900 ащ щызэлъаубытыгъ. Джащ фэдэу гъэсакIомэ апэрэ сессием студентхэр фагъэхьазырыгъэх.
Апэрэ илъэсым къыкIоцI гъэсакIомэ якорпус МКъТУ-м Iоф зэрэщишIагъэм къыгъэлъэгъуагъ системэм мэхьанэ зэриIэр, политическэ зыпкъитыныгъэ зыщыщымыIэ уахътэм ныбжьыкIэхэмкIэ IэпыIэгъушIоу зэрэхъурэр. Ащ фэшI, студенческэ гъэсакIохэм нахь шIуагъэ къатэу, ящыкIэгъэ шъыпкъэу алъытагъ.