ШIэныгъэлэжь советыр
Мы мафэхэм Мыекъопэ къэралыгъо технологическэ университетым шIэныгъэлэжь советым изэхэсыгъо щыкIуагъ, ащ тхьаматагъор щызэрихьагъ университетым иректорэу Къуижъ Саидэ.
Повесткэ шъхьаIэм къыдыхэлъытагъэу ректор IэнатIэм IухьанымкIэ кандидатурэу къагъэлъэгъуагъэхэм МКъТУ-м ишIэныгъэлэжь совет хэтхэр хэплъагъэх, джащ фэдэу университетым хэхъоныгъэхэр егъэшIыгъэнхэмкIэ Программэу щыIэм игъэцэкIэн фэгъэхьыгъэ предложениеу къахьыгъэхэм ядэIугъэх. Кандидатэу къагъэлъэгъуагъэхэм затегущыIэхэ ужым, ахэр «Мыекъопэ къэралыгъо технологическэ университетым иректор IэнатIэ IухьанхэмкIэ зыкъэзыгъэлъэгъогъэ кандидатхэм яспискэ» хагъэхьагъэх.
Ащ ыуж упчIэхэу «Апшъэрэ гъэсэныгъэм игъэсэныгъэ программэхэмкIэ рагъэджэнхэу аштэщтхэм и Шапхъэхэр гъэнэфэгъэнхэр — бакалавриатым ипрограммэхэмкIэ, специалитетым ипрограммэхэмкIэ, магистратурэм ипрограммэхэмкIэ Мыекъопэ къэралыгъо технологическэ университетым 2024/25-рэ еджэгъу илъэсым телъытагъэу», «Апшъэрэ гъэсэныгъэм игъэсэныгъэ программэхэмкIэ рагъэджэнхэу аштэщтхэм и Шапхъэхэр гъэнэфэгъэнхэр —шIэныгъэ ыкIи шIэныгъэ-кIэлэегъэджэ кадрэхэр Мыекъопэ къэралыгъо технологическэ университетым иаспирантурэ 2024/25-рэ еджэгъу илъэсым щыгъэхьазырыгъэнхэм ипрограммэхэмкIэ», «Апшъэрэ гъэсэныгъэм игъэсэныгъэ программэхэмкIэ рагъэджэнхэу аштэщтхэм апае контрольнэ цифрэхэр гъэнэфэгъэнхэр — бакалавриатым ипрограммэхэмкIэ, специалитетым ипрограммэхэмкIэ, магистратурэм ипрограммэхэмкIэ, шIэныгъэ ыкIи шIэныгъэ-кIэлэегъэджэ кадрэхэр Мыекъопэ къэралыгъо технологическэ университетым иаспирантурэ 2024/25-рэ еджэгъу илъэсым щыгъэхьазырыгъэнхэм ипрограммэхэмкIэ» зыфиIохэрэмкIэ къэгущыIагъ приемнэ комиссием пшъэдэкIыжь зыхьырэ исекретарэу Бэрзэдж Розэ.
ШIэныгъэлэжь советым щытегущыIагъэх ыкIи щаштагъ МКъТУ-м ипроектнэ офисэу «Къулыкъу зэрихьырэмкIэ егъэджэгъэныр» зыфиIорэм и Положение.
Студентхэм яегъэджапкIэ тефэрэ уасэр къегъэIэхыгъэным фэгъэхьыгъэ упчIэмкIэ къэгущыIагъ Мыекъопэ къэралыгъо технологическэ университетым ныбжьыкIэ политикэмкIэ ипроректорэу БрантIэ Мурат. Зэфэхьысыжьэу Мыекъопэ къэралыгъо технологическэ университетым ишIэныгъэлэжь совет фэхъугъэр — макъэ зыфэптынэу къыщаIэтыгъэ упчIэмэ зэкIэмэ адырагъэштагъ.