Мыекъопэ гимназием икIэлэеджакIомэ афызэхищагъ
Цифрэ шIэныгъэмкIэ ыкIи киберщынэгъончъэнымкIэ Урысые гъэсэныгъэ проектэу «Цифрэ мышIэныгъэр дэгъэзыжьыгъэным» зыфиIоу МКъТУ-м «Точка кипения» зыцIэу хахьэрэм къыдыхэлъытагъэу ЗэIухыгъэ республикэ Iофтхьабзэр рагъэкIокIыгъ. Темэ шъхьаIэу ащ фэхъугъэр «Интернет хъытыум щынэгъончъэу ухэтыныр» зыфиIорэр ары.
ЗэIукIэм хэлэжьагъэх Мыекъопэ гимназиеу №5-м икIэлэеджакIохэу я 7-8-рэ классхэм ащеджэхэрэр ыкIи икIэлэегъаджэхэр. Ащ фэшъхьафэу, республикэм инэмыкI еджапIэмэ ялIыкIохэр пэIудзыгъэ шIыкIэм тетэу Iофтхьабзэм къыхэлэжьэнхэ амал яIагъ, ар къязытыгъэр къэбар-коммуникационнэ платформэу «Сферум» зыфиIорэр ары.
ЗэIукIэр зэращагъ МКъТУ-м къэбар щынэгъончъэнымкIэ ыкIи бгъэфедэн плъэкIырэ информатикэмкIэ кафедрэм ипащэу Цундышк Вячеславрэ Республикэ естественнэ-хьисап еджапIэм гъэсэныгъэ цифровизациемкIэ и Гупчэ ипащэу Елена Пономаренкэмрэ.
ЗэIукIэм хэлажьэрэмэ къагурыIуагъ интернетым узыхахьэкIэ сакъыныгъэ къызхэбгъэфэн зэрэфаер, арымырмэ къиныгъохэм уяолIэн ылъэкIыщт. Джащ фэдэу кIэлэеджакIомэ арагъэшIагъ мыхъун къэбар лIэужэу интернетым къырагъанэрэм иягъэ нэужым къызэрякIыжьыщтыр, IофшIэным культурэу пылъыр, иягъэ къямыкIэу гаджетхэр сыхьат пчъагъэу зэрагъэфедэхэрэр.
ЩыIэныгъэм щыщ щысэхэр къахьыхэзэ зещакIохэр къэгущыIагъэх, къэбарыр нахь алъагъэIэсыным пылъыгъэх. ШIэныгъакIэу аратыгъэр зэрагурыIуагъэри ауплъэкIужьыгъ, афагъэхьазырыгъэ ушэтыныр арагъэкIугъ.
Гъэсэныгъэмрэ шIэныгъэмрэкIэ Адыгэ Республикэм и Министерствэ яIэпыIэгъоу Iофтхьабзэр рагъэкIокIыгъ. УрысыемкIэ мы проектэу «Цифрэ мышIэныгъэр дэгъэзыжьыгъэныр» зыфиIорэм изэхэщакIохэр цифрэхэмкIэ УФ-м и Министерств, гъэсэныгъэмкIэ УФ-м и Министерств ыкIи АНО «Цифрэ экономикэр». Проектым игъусэх – Сбербанкым и ШIушIэ фондэу
«Вклад в будущее», VК, Avito ыкIи Лабораториеу Kaspersky.