НыбжьыкIэ политикэм и Стратегие и Проект Урысые Федерацием щытегущыIагъэх
НыбжьыкIэ политикэм и Стратегие ипроектэу 2030-рэ илъэсым нэс агъэнэфагъэм Къэралыгъо Думэм щытегущыIагъэх.
Урысые проектэу «О уикIогъу» зыфиIорэр студенческэ сообществэм МКъТУ-м истудентэу Павел Дорошенкэм къыхилъхьагъ.
«Проектэу «О уикIогъум» и Стратегие хагъэхьанэу» зыфэе гукъэкIэу Павел иIэр къыриIотыкIыгъ, еджапIэхэмрэ колледжхэмрэ къэзыухыгъэхэр апшъэрэ гъэсэныгъэм къыхэмыщэу хэщэгъэнхэм ар фэгъэхьыгъ.
Урысыем и Президентэу Владимир Путиным иунашъо игъэцэкIэн къыпкъырыкIыхэзэ Стратегиер зэхагъэуцуагъ. Мы проектым ишIуагъэкIэ гумэкIыгъохэр зэфахьысыщтых, ныбжьыкIэ политикэм гъэхъагъэхэр ыкIи хэхъоныгъэхэр ышIыщтых.
Апэ рагъэшъырэ лъэныкъохэр: мэхьанэ зэратэу, хабзэ хъугъэ шэнхэм зягъэушъомбгъугъэныр; унэгъо ныбжьыкIэмэ амалышIухэр афэшIыгъэнхэр, сабыибэ ахэм къарыхъухьаным фытегъэпсыхьэгъэнхэр, джащ фэдэу ныбжьыкIэмэ яIэпэIэсэныгъэ хэгъэхъогъэныр.
Урысые ныбжьыкIэмэ япащэу Ксения Разуваевам къызэриIуагъэмкIэ, стратегием дэлажьэрэ купым федеральнэ ведомствэ 25-мэ ялIыкIохэр хагъэхьагъэх, джащ фэдэу апшъэрэ еджэпIиплIымэ — Бауманым ыцIэ зыхьырэ МКЪТУ-м, Томскэ, Псковскэ университетхэм ыкIи РАНХиГС-м ялIыкIохэр. Непэрэ мафэм ехъулIэу стратегием хагъэхьанэу институтхэм, общественнэ организациехэм ыкIи шъолъырхэм предложение мини 2-м ехъу къырахьылIагъ. Документыр зэрагъэнафэрэмкIэ нэфэшъхьаф лъэныкъохэм афэгъэзэгъэ стратегиехэм атекIынэу щытэп.
Финансэ бэдзэрхэмкIэ комитетым ипащэу Анатолий Аксаковым предложение къыхьыгъ ныбжьыкIэхэр финанс Iофхэм афэгъэсэгъэнхэу. Лъэпкъ Iофхэм апылъ комитетым ипащэу Геннадий Семигиным зэхэсыгъом хэлажьэрэмэ анаIэ тыраригъэдзагъ — унэгъо ныбжьыкIэхэмкIэ гумэкIыгъоу джырэкIэ къэуцурэр псэупIэмрэ псэупIэ-коммунальнэ хъызмэтымрэ арэу зэрэщытым.
Зэхэсыгъом хэлажьэрэмэ Стратегием хагъахьэ ашIоигъо лъэныкъохэр джащ фэдэу къыраIотыкIыгъэх: психологическэ псауныгъэм IэпыIэгъу фэхъугъэнымкIэ комплекснэ программэхэр штэгъэнхэр, «зекIокIэ пхэнджхэр къэмыхъунхэм пэшIорыгъэшъэу уадэлэжьэн къодыеу щымытынэу», унэгъо ныбжьыкIэмэ IэпыIэгъоу аратыщтхэр гъэнэфэгъэнхэр, сэнэхьатыр зэблэзыхъущтхэм ыкIи зиIэпэIэсэныгъэ хэзгъэхъощтхэм апае программэхэр зэхэгъэуцогъэнхэр, IофшIэным ибэдзэр псынкIэу зэрэзэхъокIырэр къыдалъытэзэ; ныбжьыкIэ политикэр пхырыщыгъэнымкIэ ыкIи ныбжьыкIэхэм адэлэжьэгъэнымкIэ фитныгъэхэр федеральнэ, шъолъыр ыкIи муниципальнэ хабзэхэм атегощэгъэнхэр; ныбжьыкIэмэ яшIоигъоныгъэмэ ялъытыгъэу пшъэрылъ шъхьаIэхэр агъэнэфэжьынхэу.
Предложениеу къахьыгъэхэр зэкIэ документыр зэхэзгъэуцорэмэ къыдалъытэщтых, ащ елъытыгъэу ар нахьышIу зэрашIыщтым дэлэжьэщтых.