Студентым имафэ ихэгъэунэфыкIын къыдыхэлъытагъэу Мыекъопэ къэралыгъо технологическэ университетым апэрэу киберспортивнэ зэнэкъокъоу Dota-2 зыфиIорэр щыкIуагъ.

Онлайн шIыкIэм тетэу апэрэ ешIэгъухэр рагъэкIокIыгъэх, ау финалыр шэмбэт мафэм офлайн шIыкIэм тетэу зэхащагъ. Джэгуным хэлажьэрэмэ афэгумэкIыхэрэр зэнэкъокъум лъыплъэнхэу амал яIагъ, ащ пае цифрэ экранышхо аудиториеу М-1-м щагъэуцугъагъ, ар университетым хэхъоныгъэ егъэшIыгъэнымкIэ ипрограммэ къыдыхэлъытагъэу агъэпсыгъ.

Iофтхьабзэм кIэщакIо фэхъугъэх МКъТУ-м цифровизациемкIэ ипроректорэу Дмитрий Игнатовыр, физиологиемкIэ ыкIи патологиемкIэ Мединститутым икафедрэ идоцентэу Дмитрий Муженя, техническэ амалхэм яотдел ипащэу Коблэ Инал, МКъТУ-м и Аккредитационнэ-симуляционнэ гупчэ илаборантэу Евгений Полищук.

Зэнэкъокъум зэфэхьысыжьэу фэхъугъэр:

I — Olympic Warriors (Медицинэ институтыр);

II — MDI (экономикэмрэ гъэIорышIэнымрэкIэ факультетыр);

III — ITDep (айти департаментыр).

Урысые Федерацием и Президентэу Владимир Путиным зыдыригъэштэгъэ спорт лъэпкъэу хъугъэ киберспортыр. Ащ елъытыгъэу тиапшъэрэ еджапIэ мы спорт лъэпкъым зыщегъэушъомбгъугъэнымкIэ пшъэрылъ гъэнэфагъэхэр щыIэх, факультетхэм азфагукIэ зэнэкъокъухэр зэхэщэгъэнхэм фытегъэпсыхьэгъэ программэ зэхагъэуцощт ыкIи IэпэIэсэныгъэ зыхэлъыщт киберспортивнэ командэ зэхащэщт.

Тыгу къыддеIэу текIоныгъэ къыдэзыхыгъэ студентмэ тафэгушIо, ахэм тарэпагэ ыкIи яIофшIэнрэ ягуетныгъэрэ тэгъэлъапIэ!

Шъхьафэу къыхэдгъэщыхэ тшIоигъу цифровизацием игъэIорышIапIэ щылажьэхэрэр, ахэм Iофтхьабзэр зэрэзэхащагъэм ыкIи щытхъу пылъэу зэрэрагъэкIокIыгъэм афэшI лъэшэу тафэраз.