Загъэпсыгъэм къыщегъэжьагъэу непэрэ лъэхъаным нэс: МКъТУ-м итарихъ
Тыгъэгъазэм и 13-м, 1993-рэ илъэсым Урысые Федерацием и Правительствэ Мыекъопэ къэралыгъо технологическэ институтым икъызэIухын фэгъэхьыгъэ Унашъоу зи № 1279-м кIэтхагъ. Ащ икIэщэкIуагъэр, ар зыгъэпсыгъэр ыкIи апэрэ ректорэу иIагъэр ТхьакIущынэ Аслъанчэрый Кытэ ыкъор ары—Адыгэ Республикэм и Къэралыгъо упчIэжьэгъу, Адыгэ Республикэм и ЛIышъхьэу щытыгъ, ФГБОУ ВО «МКъТУ-м» и Президент, социологие шIэныгъэхэмкIэ доктор, МКъТУ-м философиемкIэ, социологиемкIэ ыкIи педагогикэмкIэ икафедрэ ипрофессор
Илъэс 30-м къыкIоцI Мыекъопэ къэралыгъо технологическэ университетым урысые гъэсэныгъэ шъолъырым ежь ичIыпIэ хэхыгъэ щиубытыгъ; апшъэрэ ыкIи гурыт техническэ гъэсэныгъэ зиIэ специалист мин 20-м ехъу ыгъэхьазырыгъ; Къыблэ УрысыемкIэ технологическэ апшъэрэ еджэпIэ пэрытмэ ащыщ хъугъэ.
Мыекъопэ къэралыгъо технологическэ университетым непэ факультет 12, Медицинскэ институтыр, поселкэу Яблоновскэм дэт къутамэр, колледжитIу, мэкъу-мэщымкIэ шIэныгъэ ушэтыпIэ институтыр, шIэныгъэ-техническэ ыкIи опытнэ-экспериментальнэ базэр, шIэныгъэ-гъэсэныгъэ гупчих, лабораторие 12, шIэныгъэ тхылъеджапIэр, дзэ егъэджэпIэ гупчэр ащ хэтых.
МКъТУ-м технологическэ предпринимательствэм IэпыIэгъу фэхъугъэнымкIэ программэр егъэцакIэ, къэралыгъо корпорациеу «Росатомым» игъусэу проектэу «АмалышIухэр къэзытырэ шъолъыр» зыфиIорэм дэлажьэ. Нэбгырэ мини 3-м ехъу процессхэм яфабрикэу МКъТУ-м щызэхащагъэм щырагъэджагъэх, ахэм ащыщых АР-м и ЛIышъхьэ иадминистрацие ыкIи министрэхэм я Кабинет иIофышIэхэр, УФ-м ишъолъырхэм ащыщхэм ягъэцэкIэкIо хабзэ ыкIи гъэсэныгъэ учреждениехэм ялIыкIохэр.
Университетым ищыIэкIэ-псэукIэкIэ анахь шъхьаIэр студентхэр ары. Ахэр шIэныгъэ ыкIи общественнэ IофшIэнхэм чанэу ахэлажьэх. Студентмэ ащыщыбэ шIэныгъэ IофшIэнхэмкIэ ыкIи экономикэмрэ производствэмрэ афэгъэзэгъэ бизнес-проектхэмкIэ урысые зэнэкъокъухэм гъогогъу пчъагъэрэ ащытекIуагъэх. Университетым щеджэхэрэм амал агъоты художественнэ ыкIи социальнэ творчествэм защаушэтынэу.
Апшъэрэ еджапIэм спортым упылъынымкIэ амал дэгъухэр иIэх. Университетыр арэгушхо апшъэрэ лигэм щешIэхэрэ волейболымкIэ ыкIи баскетболымкIэ командэхэу «Динамо-МКъТУ-м» хахьэхэрэм. Урысые зэнэкъокъухэм университетыр щытхъу пылъэу ахэм къащагъэлъагъо. Тиспортсмен-бэнакIохэм мызэу, мытIоу дышъэ ыкIи тыжьын медальхэр зэнэкъокъухэм къащахьыгъэх—Урысые, Европэ ыкIи Дунэе чемпионатхэм.
Университетым ишIэныгъэлэжьхэм лъэныкъо зэфэшъхьафхэмкIэ шIэныгъэ-ушэтын IофшIэнхэр чанэу зэшIуахых. МКъТУ-м шIэныгъэ лабораторие заулэу иIэхэм цифрэ технологием, медицинэм, химическэ технологиехэм, шъолъыр экономикэм ыкIи нэмыкIхэм алъэныкъокIэ ушэтынхэр ащарагъэкIокIых.
Тикъалэ, Адыгэ Республикэр, зэрэ Темыр Кавказ пштагъэми, тиапшъэрэ еджапIэ мэхьанэу иIэр гъунэнчъ. Тиуниверситет къычIитIупщыгъэмэ ащыщыбэм IэнэтIэшхохэр аIыгъых. Ахэмэ ащыщых финансхэмкIэ Адыгэ Республикэм иминистрэу Орлов Виктор Николай ыкъор; Грозненскэ чIыдагъэ техническэ университетым цифрэ экономикэмкIэ ыкIи технологическэ предпринимательствэмкIэ иинститут ипащэу, экономикэ шIэныгъэхэмкIэ докторэу Магамаева Лейла Руман ыпхъур, Росгвардием иполковникэу Юнаев Саид-Магомед ыкIи нэмыкIхэр.
Теубытагъэ хэлъэу къэпIон плъэкIыщт—аужырэ илъэсишъэр зыпштэкIэ, Мыекъопэ къэралыгъо технологическэ университетыр анахь мэхьэнэ ин зиIэ проектэу хъугъэ. Арэущтэу зылъытэхэрэр университетым епхыгъэ закъохэр арэп.