Адыгеим щыпсэурэмэ яфинансовэ гъэсэныгъэ МКъТУ-м щыхагъахъо
Финансовэ гъэсэныгъэм и Фестиваль Адыгеим щылъагъэкIуатэ. Финансовэ гъэсэныгъэм и Шъолъыр гупчэ иIофышIэхэр мы тхьамафэм МКъТУ-м гъэсэныгъэ Iофтхьабзэ заулэ кIэлэеджакIохэм ыкIи пенсионерхэм апае щырагъэкIокIыгъ. ЗэIукIэхэр ахъщэм итарихъ, финансхэр акъыл хэлъэу зэрэбгъэзекIощтхэм, гъэпцIакIомэ зызэращыухъумэщтым афэгъэхьыгъагъэх.
Гурыт еджапIэу № 7-м иублэпIэ классмэ ащеджэрэмэ апае Финансовэ гъэсэныгъэм и Шъолъыр гупчэ ипащэу, финансхэмрэ кредитымрэ якафедрэ идоцентэу Татьяна Паладовам десэу «Ахъщэу щыIэхэр зэрэзэтекIыхэрэр ыкIи ахъщэмэ ятарихъ» зыфиIорэр аригъахьыгъ. ДжэгукIэ шIыкIэм тетэу кIэлакIэмэ ашIагъ пкъыгъохэу апэрэ ахъщэмэ апае агъэфедагъэхэр, гъучI ахъщэхэр къызэрэхъугъэхэр, тхьапэ купюрэхэр нэужым щыIэ зэрэхъугъэхэр. Ахъщэмэ агъэцакIэрэ Iофыгъомэ ащыщхэр кIэлакIэмэ защагъэгъозагъ, монетэхэмрэ банкнотэхэмрэ зэрэзэтекIыхэрэр, джащ фэдэу бгъэIылъырэ ахъщэм узэрэфэсакъын фаери къагурыIуагъ.
ЗэIукIэгъум илъыпыдзагъэу нысхъэпэ къэгъэлъэгъонэу «Доверчивый зайчик» зыфиIорэр щыIагъ, ар студент-гуфакIомэ къагъэхьазырыгъ, экономикэмрэ гъэIорышIэнымрэ ифакультет щеджэхэрэм. Пшысэ лIыхъужъхэр щысэу къафахьыхэзэ, кIэлэцIыкIумэ финансовэ щынэгъончъэным имэхьанэ агурагъэIуагъ, умышIэрэмэ цыхьэ ахъщэр афэпшIы зэрэмыхъущтыр, шIухьафтынхэр къыуатынхэу укъызэрагъэгугъэрэр пшIошъы бгъэхъунэу зэрэщымытыр арагъэшIагъ.
Нахьыжъхэр зыхагъэлэжьэгъэхэ зэIукIэгъуитIу джыри станицэу Джаджэм, цIыфхэм ясоциальнэ Iофхэр зыщагъэцакIэрэ Комплекснэ гупчэм щызэхащагъэх.
Финансхэмрэ кредитымрэ якафедрэ идоцентэу Татьяна Паладовар лекциеу «Финансовое мошенничество» зыфиIорэм къеджагъ. Ащ едэIугъэхэр ащыгъозагъэх нэпцI схемэу щыIэхэм, телефонымкIэ ыкIи интернетымкIэ зыкъыпфэзыгъазэрэ пцIыусхэр къызэрэхэбгъэщыщтхэм. Джащ фэдэу банковскэ картэхэр къызэрэуухъумэщт шIыкIэхэр зэхафыгъэх. Анахьэу анаIэ зытырадзагъэмэ ащыщхэр: умышIэрэ цIыфмэ СМС-кIэ кодхэр ыкIи парольхэр афэбгъахьы зэрэмыхъущтхэр ары.
Финансхэмрэ кредитымрэ якафедрэ ядоцентэу Мамыекъо Людмилэ лекциеу «Финансовая грамотность: успешное управление деньгами» зыфиIорэм къеджагъ. Ащ къыIотагъэх унэе бюджетыр зэрэбгъэнэфэщтыр, ащ утемыкIэу узэрэпсэушъущтыр, пенсием шIуагъэ къытэу зэрэбгощышъущтыр, щынэгъончъэ шъхьантэ уиIэ зэпытынэу зэрэщытыр. Банковскэ картэу «Мир» зыфиIорэр зэрэбгъэпсэолъэщт шIыкIэми зэIукIэм игугъу къыщашIыгъ.
Фестивалым иIофтхьабзэхэр Адыгеим щыпсэурэ цIыфмэ адэIэпыIэх, ныбжь зэфэшъхьаф зиIэмэ финансовэ гъэсэныгъэ икъу арагъэгъоты, ахэмэ практическэ шIэныгъэхэр яIэхэ мэхъу, щыIэныгъэм къащышъхьэпэщтхэм арэгъуазэх: ахъщэмэ уазэрэдэзекIощт апэрэ шIыкIэу щыIэмэ къащыублагъэу унэе ахъщэ зэIугъэкIагъэмэ анэсыжьэу.