Наукэм, практикэм ыкIи дунэе зэдэлэжьэныгъэм ямэфищ!
Мыекъопэ къэралыгъо технологическэ университетым илечебнэ факультет истудентхэр Дунэе ныбжьыкIэ форумэу «Медицинскэ наукэу гъунапкъэ зимыIэр» зыфиIорэм хэлэжьагъэх, ар Ставропольскэ къэралыгъо медицинскэ университетым щыкIуагъ.
Форумым хэгъэгу зэфэшъхьафхэм къарыкIыгъэ ныбжьыкIэ ушэтакIохэр, студентхэр, медицинскэ сообщестэм илIыкIохэр зэхищагъэх. Мэфищым къыкIоцI форумым хэлажьэрэмэ янаучнэ IофшIагъэхэр къагъэлъэгъуагъэх, яопытхэмкIэ зэхъожьыгъэх, непэрэ мафэхэм адиштэрэ медицинскэ гъэсэныгъэм илъэныкъохэм ыкIи практикэхэм нэIуасэ афэхъугъэх.
МКъТУ-р форумым нэбгырищ къыщызгъэлъэгъуагъэр, ахэмэ научнэ докладхэр къашIыгъэх:
· Алена Бахтина — докладэу къышIыгъэм цIэу иIагъэр: «Онкологическая настороженность в дифференциальной диагностике новообразований хориоидеи» (научнэ пащэр — врач-офтальмологэу Ашъхьэмэфэ Марин);
· Павел Хохлов — докладэу къышIыгъэр: «Влияние цифрового структурирования на скорость ориентирования и когнитивную нагрузку освоения материалов у студентов» (научнэ пащэр — биологие шIэныгъэхэмкIэ кандидатэу, физиологием ыкIи общэ патологием икафедрэ идоцентэу Тхагъо Асиет);
· Гъыщ Фарида — докладэу къышIыгъэр «Роль комплексного обследования в постановке диагноза хориоидальной меланомы» (научнэ пащэр — врач-офтальмологэу Ашъхьэмэфэ Марин).
Научнэ программэр лъагъэкIотагъ университетым нэIуасэ фашIыхэзэ, ащ елъытыгъэу профильнэ кафедрэхэр ыкIи практикэ зыщахьырэ гупчэхэр къаплъыхьагъэх, нэужым джэгукIэу «Медицинская мафия» зыфиIорэм хэлэжьагъэх ыкIи практическэ мастер-классхэр акIугъэх. Анахьэу студентмэ ашIогъэшIэгъоныгъэр анатомием икафедрэу студентмэ арагъэлъэгъугъэр ары, ащ чIэтыгъэ анатомическэ препаратхэр агу рихьыгъэх, ахэмкIэ цIыфым ыпкъ изэрэщыт нахь псынкIэу зэрагъэшIэшъущт.
Неущрэ медикхэм амал агъотыгъ ушэтынэу ашIыгъэхэр, научнэ IофшIагъэу яIэхэр ежь фэдэхэу фэшъхьаф къэралыгъомэ къарыкIыгъэмэ арагъэлъэгъунхэу, ягупшысэхэмкIэ адэгощэнхэу, япрофессиональнэ IэпэIэсэныгъэ хагъэхъонэу.
Форумым хэлэжьагъэхэр, научнэ пащэхэр ыкIи зэхэщакIохэр МКъТУ-м иректорэу Къуижъ Саидэ фэразэх, ар Iофтхьабзэм хэлэжьэнхэмкIэ IэпыIэгъу къазэрэфэхъугъэм пае.
Тистудентхэу наукэм хэхъоныгъэ щызышIыхэрэм, ащ дэгуIэхэрэм тарэгушхо!