МКъТУ-м финансовэ гъэсэныгъэм и Фестиваль щэкIо
Мыекъопэ къэралыгъо технологическэ университетым ибазэ финансовэ гъэсэныгъэм и Фестиваль щэкIо. Ащ ипрограммэ хэтых лекциехэр, Iоф ыкIи стол кIыIу джэгукIэхэр, ахэр студентмэ яфинансэ Iофхэр зэрагъэзэфэнхэмкIэ ыкIи экономическэ щынэгъончъагъэ яIэнымкIэ адэIэпыIэщтых.
Финансовэ гъэсэныгъэмкIэ Адыгэ Республикэм и Шъолъыр гупчэ Iофтхьабзэм изэхэщэкIуагъ: гупчэм ипащэу, финансхэмкIэ ыкIи кредитымкIэ кафедрэм идоцентэу Татьяна Паладовар, гупчэм испециалистэу, финансхэмкIэ ыкIи кредитымкIэ кафедрэм идоцентэу Мамыекъо Людмилэ.
Фестивалым темэу къыщаIэтыгъэмэ ащыщ финансовэ гъэпцIэныр. ПАО Сбербанкым и Адыгэ къутамэ лэжьэпкIэ проектхэмкIэ именеджерэу Ламжъые Долэт студентмэ къафиIотагъ гъэпцIэнымкIэ шIыкIэу нахьыбэрэ агъэфедэхэрэр, банковскэ счетхэмрэ унэе къэбархэмрэ къызэрэуухъумэщтхэр. Лекциеу «Финансовое мошенничество» зыфиIорэм хэлэжьагъэмэ зэхафыгъэх телефонхэмкIэ къазщыфытеуагъэхэу, агъэпцIэнхэу къазщыпыхьагъэхэр, джащ фэдэу сайт нэпцIэу агъэфедэхэрэр, электроннэ письмэхэр, зэрагъэшIагъ финансовэ пирамидэр къызхэкIырэр, гъэпцIакIохэр къыпшIонагъэмэ апэ дэдэ зызыфэбгъэзэщтхэр.
Практическэ лъэныкъоу финансовэ гъэсэныгъэм МКъТУ-м истудентмэ къыхахыгъэр макIэп, ахэр джэгукIэу «Proмониторинг» зыфиIорэм нахьыбэрэмкIэ щызэрагъэшIагъ, Адыгэ Республикэм и Лъэпкъ Банк иIофышIэмэ ар рагъэкIокIыгъ.
КомандиплIымэ зэрагъэшIагъ предприятиехэр мониторинг зэрэпшIыщтхэ шIыкIэр, ар алъапсэу агъэнафэ ахъщэ-кредитнэ политикэм ылъэныкъокIэ конъюнктурнэ обзорхэр зэрэпшIыщтхэр. Зэнэкъокъоу нэужым афызэхащагъэм хэлажьэхэрэмэ викторинэм иупчIэмэ джэуапхэр къаратыжьыгъэх, анкетэхэр агъэпсыгъэх, бизнес-климатым ииндикатор къалъытагъ ыкIи яунэе обзорхэр агъэхьазырыгъэх. ДжэгукIэхэм язэфэхьысыжьэу командэхэмрэ гуфакIохэмрэ Урысыем и Банк ишIухьафтынхэр аратыгъэх.
Мыекъопэ къэралыгъо технологическэ университетым хэхьэрэ Политехническэ колледжым финансовэ гъэсэныгъэмкIэ игуфакIохэр — экономикэм ыкIи гъэIорышIэным ифакультет истудентхэу Иныхъу Изабелла, Къушъхьэ Динара ыкIи Марина Хажи, ахэмэ стол кIыIу джэгукIэхэр финансовэ гъэсэныгъэмкIэ рагъэкIокIыгъэх.
ДжэгукIэу «Личный финансовый план» зыфиIорэм хэлэжьэгъэ студентмэ зэрагъэшIагъ финансовэ пшъэрылъхэр зэрагъэуцущтхэр, хъарджхэр зэрэзэрагъэфэщтхэр, мылъкоу зэIуагъэкIагъэм зэрэдэзекIощтхэр, ахъщэм уасэ зэрэфашIыщт шIыкIэхэр.
ДжэгукIэу «Инвестируй в мечту» зыфиIорэм нэIуасэ ахэр фишIыгъэх инвестированием ылъапсэхэм, инвестиционнэ проектмэ Iахьыр зэрахэплъхьащтыр. ДжэгукIэу «Инвестиции» зыфиIорэм капиталыр зэрагъэIорышIэщтым зыщыфагъэсагъ, джащ фэдэу бэдзэрэу ренэу зэхъокIырэр къыдалъытэзэ активхэр зэрэзэрагъэгъотыщтыр, экономикэм иотраслэ зэфэшъхьафхэм зэрахалэжьэщтхэр.
Финансовэ гъэсэныгъэм и Фестиваль студентмэ къадэIэпыIэ практическэ шIэныгъэхэр зэрагъэгъотынымкIэ, ахэр ящыIэныгъэкIэ къашъхьэпэщтых: федэу агъотырэр акъылыгъэ хэлъэу агъэзекIонымкIэ, инвестиционнэ амалэу яIэм уасэ фашIынэу, финансовэ щынагъохэр къашIэнхэу.
Фестивалым ипрограммэ лъагъэкIуатэ. МКъТУ-м икъэбармэ шъуалъыплъ — IофтхьабзакIэхэр ыкIи шIуагъэ къэзытыщт зэIукIэхэр тапэ илъых!