Европэм анахь зэIухыгъэ бассейн инэу итыр зэрагъэцэкIэжьырэм МКъТУ-м истудентхэр щыгъозагъэх
Пкъэу хэтIагъэр 600 фэдиз мэхъу, чIыгу чIэгъым щычъэрэ псыхэр Iузыщырэ хэушъхьафыкIыгъэ системэр, мембраннэ гидроизоляциер ыкIи быгпкъыхэр гъэпытэгъэнхэр — джащ фэдэу мыекъопэ бассейным игъэцэкIэжьын IофшIэнхэр непэ къэлъагъох.
ПсэолъэшI Iофхэр зыщыкIорэ чIыпIэм еблэгъагъэх МКъТУ-м хэхьэрэ Политехническэ колледжым истудентхэр, ахэр нахьыбэрэмкIэ неущырэ псэолъэшIых, лъэныкъоу «Промышленнэ ыкIи гражданскэ псэолъэшIыныр» зыфиIорэм щеджэх. Экскурсиер зэхэзыщагъэр псэолъэшIынхэмкIэ ыкIи общепрофессиональнэ дисциплинэхэмкIэ кафедрэм идоцентэу Оксана Борсук. Техническэ IофшIэнхэм ыкIи гъэцэкIэжьынхэр зэрэкIорэмэ проектым ипащэу Зарэмыку Индарэ къатегущыIагъ.
Бассейныр 1977-рэ илъэсым ашIыгъагъ. Ащ икIахьыгъэ метрэ 450-рэ мэхъу, ишъомбгъуагъэ метрэ 35-м къыщегъэжьагъэу 80-м нэсы, ежь площадым квадратнэ метрэ мин 30,8-рэ иинагъ. Европэм ит зэIухыгъэ бассейнхэм ар анахь ин.
СтудентхэмкIэ экскурсиер десэхэу псыр аIэкIэгъэхьэгъэнымкIэ ыкIи псыр ящэлIэгъэнымкIэ ыкIи гидравликэр зилъапсэхэмкIэ зэрагъашIэрэм илъыгъэкIотэнэу хъугъэ. Ахэмэ алъэгъугъ пшъэрылъхэр практикэм зэрэщагъэцакIэхэрэр, чIыгу чIэгъым щычъэрэ псыхэр зэрагъэзекIохэрэр, зэрэIуащыхэрэр, псэолъэшI конструкциехэр зэрагъэпытэхэрэр. ГущыIэм пае, бассейным чIы чIэгъыпсэу къеуалIэрэр зэрэбэм къыхэкIэу бассейнэ чIэгъым псыхэр Iузыщырэ системэр щагъэпсы. Ари студентмэ нэрылъэгъу афэхъугъ. Бгыпкъыхэр агъэпытэхэ хъумэ пкъэухэр зэрэчIатIэхэрэр ыкIи зэрагъэчъыхэрэр, бетоннэ конструкциехэр агъэпсыжьынхэм пае торкретированиер зэрагъэфедэрэр, фэшъхьафыбэхэр зэрагъэшIагъэх.
Зарэмыку Индарэ къыIотагъ реконструкцием иапэрэ едзыгъо зэраухыгъэр. ПсэолъэшIмэ бассейнэм ипсэолъэжъхэр Iуахыжьыгъэх, пкъэу 600-м ехъу чIатIагъ, инженернэ коммуникациехэр лъагъэкIотагъэх. Джырэ уахътэм IофшIэнхэм яятIонэрэ едзыгъо агъэцакIэ. Зэрэпсаоу реконструкциер 2028-рэ илъэсым ибэдзэогъу мазэ аухынэу рахъухьэ.
ТапэкIэ бассейнэм зэхъокIыныгъэшхохэр щыкIощтых: ыкIоцI фэшъхьафыщт, нахь агъэкIэжьыщт, лъэсэу рызэпырыкIынхэу лъэмыдж телъыщт. Зыгъэкъэбзэщт станцие иIэщт, псыр зыукъэбзыщт фильтрацие фашIыщт, каскаднэ фонтаным метрэ 58-рэ илъэгэгъэщт. Комплексым итеплъэ лъэтегъэуцо видеороликэу студентмэ алъэгъугъ.
КIэлакIэхэр IофшIэнхэм ахэлэжьэнхэ амал зэрагъотыщтыр ашIогъэшIэгъоныгъ. Зарэмыку Индарэ объектым Iоф щызышIэ зышIоигъомэ яспискэ зэхагъэуцомэ, ахэмэ гъатхэм практикэ акIун амал къазэраритыщтыр къариIуагъ. ЯтIонэрэ экскурсиер Гъозэрыплъэ екIурэ гъогоу джырэ уахътэм агъэцэкIэжьрэм щаригъэкIун гухэлъ зэриIэри къафиIопщыгъ.
Iофтхьабзэр зэрагъашIэрэ дисциплинэу «Водоснабжение и водоотведение с основами гидравлики» зыфиIорэм, джащ фэдэу Урысыем истуденческэ отрядхэу Адыгеим щыIэхэм ягрантовэ проектэу сантехник рабочэ сэнэхьатым феджэхэрэм къадыхэлъытагъэу зэхащагъ.