МКъТУ-м пэрыт ныбжьыкIэм и ЕджапIэу «Точка притяжения» зыфиIорэр щыкIуагъ
ГукъэкI лъэшыр сыдэущтэу проект шъыпкъэу бгъэхъущт, аудиторием ыпашъхьэкIэ умытхъытхъэу укъэгущыIэщт ыкIи зы пшъэрылъ зиIэ цIыфхэр зэхэпщэщтых? Ахэр МКъТУ-м истудентмэ щызэрагъэшIагъэх пэрыт ныбжьыкIэмэ я ЕджапIэу «Точка притяжения» зыфиIорэм, ащ гукъэкIыкIэ байхэр, ахэмэ апае пшъэдэкIыжь зыхьышъущтхэр зэрипхыгъэх.
Мэфищым къыкIоцI хэлажьэхэрэр хъурэ-шIэрэ менеджментым идунае хэтыгъэх, пэрытныгъэ шэнхэр къызэрэзыхагъэфэщтым дэлэжьагъэх, Iофтхьабзэ инхэм язэхэщэнкIэ къашъхьэпэщт Iофыгъохэр зэрагъэшIагъэх.
Программэр ныбжьыкIэ IофхэмкIэ Адыгэ Республикэм и Комитет итхьаматэу Максим Галушкинрэ ГАУ РА «Адыгеим иныбжьыкIэхэр» зыфиIорэм ипащэу Абрэдж Зауррэ къызэIуахыгъ. Ахэр ЕджапIэм иIофтхьабзэ хэлажьэрэмэ дэгъоу Iоф ашIэнэу, шIуагъэ къырагъэтынэу ыкIи гукъэкIыкIэхэр къагъотынхэу афэлъэIуагъэх.
Апэрэ мафэр псалъэ къашIыным иискусствэ фагъахьыгъ. Зэнэкъокъоу «ШIэныгъэр. Лекторыр» зыфиIоу 2025-рэ илъэсым зэхащэгъагъэм щытекIогъэ Адам Шухарт тематическэ лъэныкъуитIур зэрищагъ, ащ аудиторием Iоф зэрэдэпшIэщтыр, зэпхыныгъэхэр зэрэбгъэпытэщтхэм ягугъу къафишIыгъ.
КъыкIэлъыкIорэ едзыгъор команднэ IофшIэным фытегъэпсыхьэгъагъ, шIыкIэ-амалхэм ахагъэхъоным. ЗещакIоу Милена Попковар япащэу студентхэр нэIуасэ зэфэхъугъэх, командэу зэхэхьагъэх ыкIи яцыхьэ зэтелъыжьэу пэрытныгъэ шэнхэр къызхэкIыхэрэр зэрагъэшIагъ. Практическэ Iахьэу еджапIэм фэхъугъэр социальнэ проектхэм язэхэгъэуцон ары. Командэхэр яунэе гукъэкIхэм адэлажьэщтыгъэх, ахэр зэрагъэцэкIэщтхэм ягупшысэщтыгъэх ыкIи зэфэхьысыжьхэр агъэхьазырыщтыгъэ. Экспертмэ зэраIукIэхэрэм ахэр нахь нэкъокъоным фищэщтыгъэх: ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэрэ ыкIи къалэу Мыекъуапэ иадминистрацие ныбжьыкIэ политикэмкIэ иотдел ипащэу Егор Сергеевымрэ экспертыгъэхэр.
Программэр проектхэм якъэухъумэнкIэ ыкIи зэфэхьысыжьхэмкIэ зэфашIыжьыгъ. ЕджапIэм мэфищэ зыщеджэхэм, студентмэ амал агъотыгъ зэхащакIоу зыкъагъэлъэгъонэуи, командэм хэтхэу Iоф ашIэнэуи, апэрэ гукъэкIым къыщегъэжьагъэу проектым нэсырэ гъогури къакIун алъэкIыгъ.
Проектэу мыщ щызэхагъэуцуагъэмэ ащыщыр МКъТУ-м щагъэцэкIэщт, университетым иадминистрацие ащкIэ IэпыIэгъу къафэхъущт. Джыри гукъэкI заулэ «Адыгеим иныбжьыкIэхэр» зыфиIорэм фагъахьыщтых, ащ игъэцэкIэн щылъагъэкIотэщт.
«Точка притяжения» зыфиIорэр гукъэкI инхэр зиIэ студентхэм площадкэ шIагъо афэхъугъ, ащ зэдэгупшысэгъухэр къыщызэрэгъотыгъэх, нэбгырабэ нэIуасэ щызэфэхъугъэх. Пэрытныгъэр зэгорэ пшIэнымкIэ къежьэ, зэхъокIыныгъэхэри анахь гукъэкI цIыкIухэмкIэ рагъажьэ, етIанэ командэм къыбдыхэхьагъэмэ лъагъэкIуатэ, ар зэрагъэцэкIэщтыр зышIошъ хъурэмэ. ЕджапIэм изэхэщэкIуагъэх Мыекъопэ къэралыгъо технологическэ университетымрэ ГАУ РА «Адыгеим иныбжьыкIэхэр» зыфиIорэмрэ.