МКъТУ-м щеджэрэ студентхэу IэкIыб хэгъэгумэ ащыщхэр Адыгеим икультурэрэ итарихърэ нэIуасэ афэхъугъэх
IэкIыб гражданхэр хэгъэгум социальнэ-культурнэу хэгъэгъозэгъэнхэмкIэ проектэу «Тэ Урысыем тыщыI» зыфиIорэм къыдыхэлъытагъэу Мыекъопэ къэралыгъо технологическэ университетым истудентхэр поселкэу Каменномостскэм щыIэ музейнэ комплексэу «Беловодье» зыфиIорэм экскурсиеу щыIагъэх.
ЗекIо Iофтхьабзэм изэхэщэкIуагъэр Урысые обществэу «ШIэныгъэр» ары, тхьаматагъор Къэлэшъэо Дариет зэрихьагъ, Лямэ Бэлэ ащ игодзагъ. Лъэпкъ ыкIи дин зыкIыныгъэм, IэкIыб студентхэр Урысыем ыкIи Адыгеим якультурэ, ятарихъ ыкIи яшэн-хабзэхэм нэIуасэ афэшIыгъэнхэм проектыр фытегъэпсыхьагъ.
Музеир зыгъэуцугъэу, краеведэу Владимир Меликовым хьакIэхэр къырищэкIыгъэх, экспозициехэр аригъэлъэгъугъэх, тарихъ зэман зэфэшъхьафхэр къизыIотыкIырэ пкъыгъохэм къатегущыIагъ. Студентмэ аммонитхэр, ижъырэ мамонтхэм ацэхэу мыжъо хъужьыгъэхэр ыкIи фэшъхьаф палеонтологическэ экспонатхэр алъэгъугъэх. Шъхьафэу Хэгъэгу зэошхом илъэхъан щытыгъ, ащ зы Iахьыр телъытэгъагъ. Ахэр нахьыбэрэмкIэ нэмыц оккультнэ обществэу «Аненербе» Кавказ щишIагъэхэм афэгъэхьыгъагъ.
Ижъырэ лъэхъаным исп унэм дэжь щытегущыIагъэх — саугъэтэу лъэхъанэ чыжьэм къытфыщинагъэм. Ащ ыуж студентмэ адыгэ культурэм ыкIи адыгэ шэн-хабзэмэ ягугъу къызщашIырэ къэгъэлъэгъоным Iофтхьабзэр щылъагъэкIотагъ
«Хьалэмэт унэмэ» ыкIи зыфэдэ къэмыхъугъэ экспонатмэ экскурсиер гъэшIэгъонэу къашIыгъ, ащымыгъупшэжьэу студентмэ ар агумэ джыри бэрэ арылъыщт.
Музейнэ паркым зекIо гъогур щаухыгъ, ащ щалъэгъугъэ псыхъураемэ хьарзэ фыжьхэр ащесыщтыгъэх.
Мыщ фэдэ зэIукIэмэ IэкIыб хэгъэгумэ къарыкIыгъэ студентхэмкIэ IофыгъошIух, лъэпкъыбэ хъурэ Адыгеим нахь псынкIэу хэгъуазэх, щыщ шъыпкъэ мэхъух.