МКъТУ-м икIэлэегъаджэхэмрэ иаспирантхэмрэ яушэтынхэр ФАРР-2026-м къыщагъэлъэгъуагъэх
Мыекъопэ къэралыгъо технологическэ университетым илIыкIомэ научнэ докладитф Урысыем ианестезиологхэм ыкIи реаниматологхэм я Форум (ФАРР-2026) къыщашIыгъ, ар Санкт-Петербург щыкIуагъ. Профессиональнэ Iофтхьабзэм хэгъэгу 24-мэ ыкIи Урысыем икъэлэ 322-мэ яспециалистхэр хэлэжьагъэх. Очнэ шIыкIэм нэбгырэ 4 464-рэ къекIолIагъ.
Медицинскэ институтым физиологиемрэ общэ патологиемрэ якафедрэ икIэлэегъаджэхэр ыкIи иаспирантхэр ары МКъТУ-р къэзгъэлъэгъуагъэхэр.
Кафедрэм ипащэу, медицинэ шIэныгъэхэмкIэ докторэу Виктория Мясниковам офтальмохирургием «RS-OphSurg+» зыфиIорэмкIэ ушэтынэу ышIыгъэхэр къыриIотыкIыгъэх. Джащ фэдэу лъэныкъуабэу зэхэт лъыплъэкIо клиническэ ушэтынхэу «ПРОдети-риск» зыфиIорэр, ащ МКъТУ-р икоординаторэу зыдэщытым къытегущыIагъ. Ащ фэшъхьафэу, Виктория Владимир ыпхъум моделирование форумым исекциищ ышIыгъ: «Анестезиер офтальмохирургием зэрэщашIырэр», «Анестезиер ыкIи интенсивнэ терапиер сабыйхэм зэрафашIырэр» ыкIи постернэ секциеу «Анестезиолого-реаниматологическэ IэпыIэгъоу сабыймэ арагъэкIырэр».
Кафедрэм иушэтэкIо ныбжьыкIэмэ янаучнэ IофшIагъэхэу къагъэлъэгъуагъэхэр:
· КIэлэегъаджэу ыкIи аспирантэу Мария Яновам докладэу къышIыгъэр зыфэгъэхьыгъэр хэушъхьафыкIыгъэу автономнэ нервнэ системэм Iоф зэришIэрэр цIыфым уз иIэ хъумэ ыкIи дзэкIолIыр посттравматическэ стрессым зэIигъэхьагъэ хъумэ. Иушэтынхэм ягупчэу щытыгъэр — клинико-патофизиологическэ профильхэр ыкIи хэукъоныгъэхэм ягъэтэрэзыжьын екIолIакIэу къыфагъотырэр ары.
· Аспирантэу, врач анестезиолог-реаниматологэу АРДКБ-м щылажьэрэ Сусана Маушевам ушэтынэу къыгъэхьазырыгъэр сабыйхэр операцие зашIыхэрэм ыуж персонализированнэ профилактикэу арахьылIэрэр, нейровегетативнэ ыкIи нейрофизиологическэ статусыр фэзыгъэуцурэ комплекснэ лъапсэр зыфэдэр.
· Аспирантэу, врач анестезиолог-реаниматологэу академикэу С. Н. Федоровым ыцIэ зыхьырэ МНТК «Микрохирургия глаза» зыфиIорэм щылажьэрэ Владимир Коломыцевыр къатегущыIагъ зэкIэлъыкIуакIэу, структурэу ыкIи узтещыныхьанэу интраоперационнэ инцидентхэу офтальмохирургием къыхэкIыхэрэм.
Ушэтынхэу Форумым къырахьылIагъэхэмэ патофизиологическэ механизмэхэм ялъапсэхэу щытых, уахътэм къыздихьыгъэ клиническэ пшъэрылъыбэ зэшIуахы. Ахэмэ зэфэхьысыжьэу къатырэм елъытыгъ узтещыныхьэу хъухэрэр гъэмэкIэгъэнхэр, узыр пэшIорыгъэшъэу къыхэбгъэщыныр ыкIи анестезиолого-реаниматологическэ IэпыIэгъур игъом ябгъэкIыныр.