Мыекъопэ къэралыгъо технологическэ университетым илIыкIохэр чанэу хэлэжьагъэх Дунэе научнэ-практическэ конференциеу «Инновации в интенсивном садоводстве» зыфиIорэм, ар къушъхьэ ыкIи къушъхьэтхы чъыгхатэ хъызмэтымкIэ Темыр_Кавказскэ ушэтэкIо институтыр илъэс 90-рэ зэрэхъурэм фагъэхьыгъ. Iофтхьабзэм чъыгхатэмэ, селекциемэ ыкIи мэкъу-мэщ наукэм яспециалистхэр зэрипхыгъэх.

МКъТУ-м мэфэкI Iофтхьабзэмэ къащызгъэлъэгъуагъэхэр: техническэ шIэныгъэхэмкIэ докторэу, профессорэу Хъоткъо Зурет ыкIи мэкъу-мэщ шIэныгъэхэмкIэ кандидатэу, МКъТУ-м хэхьэрэ мэкъу-мэщымкIэ Научнэ-ушэтэкIо институтым инаучнэ IофышIэу Дэгужъые Зар.

Торжественнэ Iахьым къыдыхэлъытагъэу Хъоткъо Зуретэ МКъТУ-м иректорэу Къуижъ Саидэ ишIуфэс псалъэ зытетхэгъэ тхылъыр институтым ипащэ ипшъэрылъхэр зыгъэцакIэрэ  Хасан Хагажеевым ритыжьыгъ. Тхылъым къыщыхагъэщыгъ хэгъэгум ичъыгхатэ хъызмэтхэм хэхъоныгъэ ягъэшIыгъэным, еджэпIэ учреждениемэ азыфагу зэдэлэжьэныгъэу дэлъыр гъэпытэгъэным научнэ купым иIахьышхо зэрэхэлъыр.

Техническэ шIэныгъэхэмкIэ докторэу, профессорэу Хъоткъо Зурет докладэу «Математическая оценка синергического эффекта антиоксидантной активности комбинаций пектиновых веществ» зыфиIорэр къышIыгъ. Научнэ-ушэтэкIо институтым инаучнэ IофышIэу Дэгужъые Зарэ идоклад ыцIагъэр: «Адыгэ мые ыкIи къужъ лъэпкъхэр: генофондым икъэухъумэн ыкIи изэгъэшIэн».

МКъТУ-м ишIэныгъэлэжьхэр конференцием зэрэхэлэжьагъэхэр Мыекъопэ къэралыгъо технологическэ университетымрэ чъыгхатэ хъызмэтымкIэ Темыр_Кавказскэ ушэтэкIо институтымрэ Iоф зэрэзэдашIэрэм лъыпыдзагъэ Iофтхьабзэу хъугъэ. Зэдэлэжьэныгъэм лъэныкъуабэ зэлъеубыты: селекцием къыщыублагъэу пхъэшъхьэ-мышъхьэ ыкIи цумпэ  лъэпкъым, дэжъыемэ язэгъэшIэн анэсыжьэу ыкIи адаптивнэ амалэу технологиехэм ягъэкIэжьынкIэ щыIэхэр къыдыхэлъытагъэхэу. Анахьэу анаIэ зытырадзэрэмэ ащыщ пхъэшъхьэ-цумпэ лъэпкъмэ ядэгъугъэ иуплъэкIун, ахэмэ яухъумэн ыкIи яIыгъын пIалъэ фэгъэхьыгъэ шIыкIэу уахътэм диштэрэр къэгъотыгъэныр, джащ фэдэу гъомлэпхъакIэхэу псауныгъэм фэсакъыхэрэр  къыхэгъэщыгъэнхэр.  

Зэдэлэжьэныгъэр практическэ IофшIэным лъынэсыгъ. Зэхэт ушэтын Iофмэ къадыхэлъытагъэу мые лъэпкъышIухэр къыхахыгъэх, ахэмэ  лабораторнэ уасэ афашIыщт, ядэгъугъэ ыкIи язытет агъэунэфыщт, къыдэгъэкIыжьыгъэнымкIэ ащ фэдэ екIолIакIэм мэхьанэ иI.