Мыекъопэ къэралыгъо технологическэ университетым и Политехническэ колледж щеджэрэ студенткэхэу Елизавета ыкIи Екатерина Головановхэр Урысые зэнэкъокъоу «Илъэсым иунагъу» зыфиIорэм лъэныкъоу «Сабыибэ зэрыс унагъом» щытекIуагъэх. ШIухьафтын лъапIэм Москва лъыкIуагъэх, ащ торжественнэ зэхахьэр щыкIуагъ.

Урысые зэнэкъокъоу «Илъэсым иунагъу» зыфиIорэр Федерациемк1э Советым щызэфахьысыжьыгъ, текIоныгъэ къыдэзыхыгъэхэр Кремлевскэ ордэунэшхом щагъэшIуагъэх.  Головановхэм яунагъо Адыгэ Республикэр дэгъу дэдэу федеральнэ лъэгапIэм къыщыгъэлъэгъуагъ.

А текIоныгъэм хъишъэ шIагъо пылъ, ащ лъапсэу иIэр шIулъэгъуныгъ, IэпыIэгъу зэфэхъужьыныгъ, шъхьэкIэфагъэ зэфэшIыныгъ ыкIи пшъэдэкIыжьышху.  Александр Павел ыкъор ык1и Марина Александр ыпхъур илъэс 19 хъугъэу зэгъусэх, кIэлипшI зэдапIу ыкIи ежьхэмкIэ щысэ къагъэлъагъо цIыфым ищыIэныгъэкIэ узэкъотыныр анахь шъхьаIэу зэрэщытыр.

Унагъом ибысым Урысыем и МЧС и ГъэIорышIапIэу Адыгэ Республикэм щыIэм имэшIогъэкIосэ-къэгъэнэжьын отряд икуп ипащэу къулыкъу ехьы. Ипрофессиональнэ IофшIакIэ мызэу, мытIоу бгъэхалъхьэхэмкIэ къыхагъэщыгъ.  Маринэ Александр ыпхъур унэрыс, сабыйхэм япIун ищыIэныгъэ фигъэхьыгъ. Ащ щытхъу дипломэу  «Материнская слава» зыфиIорэр къыфагъэшъошагъ.

Головановхэр Джаджэ районым щэпсэух, хъызмэт ин зэрахьэ, мафэ къэс яфэIо-фашIэхэр зэгурыIохэу агъэцакIэ. Унагъом ис пэпчъ ышIэщтым щыгъуаз, фэгъэсагъ, зэдеIэжьынхэр ящыIэныгъэ щыщ шъыпкъэ хъугъэ. Джары яунагъо пэрытхэм ахэзгъэуцуагъэу  Александрэрэ Маринэрэ алъэгъухэрэр.  

— УнагъомкIэ нахь шъхьаIэр — шIулъэгъу, зэгурыIоныгъ ыкIи зэдеIэжьыныгъ. Сабый пэпчъ ышIэн фае: зэмыгъусэхэмэ, ахэм пкIэ яIэп, — къыхагъэщы ны-тымэ.

Сабыйхэр щыIэныгъэм чанэу хэтых, общественнэ, спортивнэ ыкIи творческэ IофшIэнмэ ахэлажьэх.  Елизаветэрэ  Екатеринэрэ ягъэсэныгъэ МКъТУ-м хэхьэрэ Политехническэ колледжым щылъагъэкIуатэ. 

Головановмэ ящыIэкIэ-псэукIэ — унагъор зэрэщытын фаем ищысэу щыт, узэдеIэжьмэ, узэгурэIомэ ык1и узэрэлъытэмэ лIэуж шIагъохэр уауж къызэрэкIыщтхэр къегъэлъагъо. Джащ фэдэ унагъохэр ары хэгъэгум инеущрэ мафэ къэзыгъэпсырэр!