Мыекъопэ къэралыгъо технологическэ университетым IофшIэгъу зэIукIэгъу ащыдыряIагъ Воронежскэ къэралыгъо мэз техническэ университетэу Г.Ф. Морозовым ыцIэ зыхьырэм (ВГЛТУ) илIыкIо куп иIэшъхьэтетхэм. Зэфэхьысыжьэу зэIукIэгъум фэхъугъэр зэдэлэжьэныгъэмкIэ зэзэгъыныгъэм зэрэкIэтхагъэхэр ары, ащ елъытыгъэу гъэсэныгъэ, научнэ ыкIи сэнэхьат къыхэхын IофшIэнхэр зэдагъэцэкIэщтых.

Воронежскэ къэралыгъо мэз техническэ университетым илIыкIо куп ипэщагъэр ректорэу Михаил Драпалюк. МКъТУ-м ылъэныкъокIэ зэIукIэгъум хэлэжьагъ ректорэу Къуижъ Саидэ. ЗэхэгущыIэжьым джащ фэдэу яIахь халъхьагъ апшъэрэ еджапIэхэм яIэшъхьэтетхэм, профильнэ подразделениемэ япащэхэм ыкIи профессорскэ-кIэлэегъэджэ купым.

Ыпэ рапшIэу апшъэрэ еджапIэмэ ялIыкIохэр гъэсэныгъэ процессыр зэрэзэхащэрэр, университетхэр зэрагъэIорышIэхэрэр, практикэхэр зэрэрагъэкIокIыхэрэр, абитуриентэу афэхъущтхэм зэрадэлажьэхэрэр къызафаIотагъ. Анахьэу анаIэ зытырагъэтыгъэр сэнэхьат къыхэхыным фэгъэхьыгъэ IофшIэнэу кIэлэеджакIохэм ыкIи колледжхэм ястудентхэм адашIыхэрэр, джащ фэдэу екIолIакIэу ныбжьыкIэмэ апшъэрэ еджапIэр къыхахынымкIэ къафагъотырэр ары.

ЗэIукIэгъум хэлажьэрэмэ зэдэлэжьэныгъэр зэрэзэгъэфэщтым нахь игъэкIотыгъэу атегущыIагъэх, ахэмэ ащыщыгъэх научнэ ыкIи гъэсэныгъэ амалэу университетитIумэ яIэхэр къызэрэзыфагъэфедэщтхэр, гукъэкIэу студентмэ яIэхэмрэ практикэхэмрэ зэрэзэдагъэцэкIэщтхэр, студентмэ яухьазырыныгъэ зэрэзэхэщэгъэщтыр.

Мыекъопэ къэралыгъо технологическэ университетымрэ Воронежскэ къэралыгъо мэз техническэ университетэу Г.Ф. Морозовым ыцIэ зыхьырэмрэ зэрэзэдэлэжьэщтхэ зэзэгъыныгъэм зэрэкIэтхагъэхэр хъугъэ-шIагъэм Iофыгъо шъхьаIэу фэхъугъ.
Зэзэгъыныгъэм къыделъытэ илъэсыбэхэм гъэсэныгъэм, наукэм ыкIи сэнэхьат къыхэхыным алъэныкъокIэ Iоф задашIэныр. Лъэныкъохэу апэ рагъэшъыхэрэр — зэгъусэхэу научнэ ыкIи научнэ-методическэ конференциехэр зэхэщэгъэнхэр, ныбжьыкIэхэр егъэджэгъэнхэмкIэ ыкIи гъэсэгъэнхэмкIэ, приемнэ кампаниехэм язэхэщэнхэмкIэ ыкIи сэнэхьат къыхэхыным фэгъэхьыгъэ IофтхьабзэхэмкIэ опытхэмкIэ зэхъожьынхэр.

Шъхьафэу документым анаIэ щытырадзагъ ыкIи къыщыхагъэщыгъ инновационэ IофшIэныр гъэсэныгъэ, научнэ ыкIи производственнэ проектхэм зэращагъэцэкIэщтхэм, зэпхыныгъэхэр гъэпытэгъэнхэм ыкIи студенческэ стажировкэхэр зэхэщэгъэнхэм.  

МКъТУ-м ыкIи ВГЛТУ-м опытэу яIэмрэ яресурсхэмрэ зэпхыгъэхэу зэрэзэдэлэжьэщтхэм апшъэрэ еджапIэхэм япрактикэхэм заушъомбгъунымкIэ, шIэныгъэхэм ыкIи профессиональнэ компетенциехэм ахагъэхъонымкIэ, джащ фэдэу шъолъырхэм гъэсэныгъэ ыкIи научнэ зэпхыныгъэхэу яIэхэр гъэпытэгъэнхэмкIэ амал къытыщт.